EMĨBĨRĨ Y'ABAKWENDA 8

1Neryo Saũlo abya akalĩga erĩĩta Setefano. Oko kiro ekyo, erĩendererya lĩnene molyatsũka busana n'ekanĩsa eYerũsalema. Kandi abandu bosĩ b'ekanĩsa mobapanzikanira omo bihugo by'eYũdea n'eSamarĩa, abakwenda bate kubo. 2N'abandu bagenge mobata Setefano, mobamulira kutsibu. 3Nĩkwa Saũlo mwatsũka erĩherya ekanĩsa yo kutsibu, mwingira omo buli nyũmba akakura abalume n'abakalĩ, n'erĩhĩrabo omo mũlĩkĩ. 4Neryo abapanzikana mobaya eyĩ n'eyĩ bakatũla Engulu Yowene. 5Fĩlĩpo naye mwandagalira oko mũyĩ w'eSamarĩa, neryo mwakangĩrĩryabo Kristo. 6Neryo esyondeko syako mobatega matwĩ wabo oko byo Fĩlĩpo abũga. Abosĩ mobahulikirira, n'erilangira ebitiko-tiko ebyo akola. 7Ebĩrĩmũ bibi mobyalũa oko bandu bangi ĩbĩkabũga n'omulenge munene; kandi abandu bangi ababasĩre n'ebirema, mobalamĩbwa. 8Nĩkwa mohabya obutseme bunene eSamarĩa. 9Neryo habya mundu muguma oyukahulawa mo Sĩmonĩ, oyutula akakola obusaki omo mũyĩ oyũ w'eSamarĩa. Abya akaswekya Abanya Samarĩa, iniakayahula mo mundu mukulu. 10Neryo abandu bosĩ, b'omo mũyĩ oyo, abake-bake, n'abakulu-bakulu, mobamuhulikirira bati, Omundu oyũ, yo yukahulawa mo Bũtokĩ Bunene bwa Nyamuhanga. 11Neryo babya bakamuhulikirira kusangwa abya ĩnĩakaswekayabo ebiro bingi omo busaki buwe. 12Nĩkwa omugulu bĩkĩrĩraya erĩtũlaganĩa lya Fĩlĩpo ly'Engulu Yowene y'obwami bwa Nyamuhanga, n'ey'erĩna lya Yesu Kristo, mobabatĩsĩbwa, abalume n'abakalĩ. 13Sĩmonĩ naye mwĩkĩrĩrya neryo abere abĩbatĩsĩbwa, mwĩkala hakũhĩ na Fĩlĩpo, iniakasweka akalangira ebiminyikalo, n'ebitiko-tiko ebyakolawa. 14Neryo abakwenda ababya eYerũsalema babere bowa ngoko abandu b'eSamarĩa babiriangirira ekĩnywa kya Nyamuhanga, mobatuma kubo ko Petero na Yoane. 15Nabo mobandagalirayo, mobasabirabo bati bangirire Omũlĩmũ Abũyĩrĩre. 16Kusangwa Omũlĩmũ Abũyĩrĩre abya ĩsyalĩahĩka kubo. Babya ĩbamatabatĩsĩbwa lisa omo lĩna ly'Omukama Yesu. 17Neryo Petero na Yoane mobahĩra kubo kw'ebyala, neryo mobangirira Omũlĩmũ Abũyĩrĩre. 18Nĩkwa Sĩmonĩ abere alangira ngoko Mũlĩmũ Abũyĩrĩre ahabawa busana n'erĩhĩra ly'ebyala by'abakwenda, Sĩmonĩ mwahererya Petero na Yoane b'obũgũlĩ. 19Ati, Nage, mumbe ehamũlĩ eyĩ, neryo ukw'oyo nasyahĩra kw'ebyala asyangirira Omũlĩmũ Abũyĩrĩre. 20Nĩkwa Petero mwamũsũbĩrya ati, Obũgũlĩ bwawe buhere haguma nawe, kusangwa waganĩraya uti wangabana olũsũnzo lwa Nyamuhanga l'omo bũgũlĩ! 21Suwite ekihande kutse erĩgabo omo mũbĩrĩ oyũ, kusangwa omutima wawe siatunganene embere sya Nyamuhanga. 22Neryo ubindule omutima wawe uleke obubi bwawe obũ, usabe Omukama, erisonda ly'omutima wawe, libuyirawe uk'uwe. 23Kusangwa namalangira goswĩre m'obũha bũkalĩre, n'omo mũlĩkĩ w'ebibi. 24Neryo Sĩmonĩ mwabwira Petero na Yoane ati, Ĩnywe munyisabire oko Mukama, emyatsi mũkabĩbũga eyĩ sĩyĩmbĩkeko n'omuguma. 25Neryo Petero na Yoane, babere babĩtũla omwatsi go ndeke, n'erĩbũga ekĩnywa ky'Omukama, mobatsũka erisuba eYerũsalema. Neryo omo nzira mobatũla Engulu Yowene omo hĩyĩ hingi hy'Abanya Samarĩa. 26Nĩkwa omũlaĩka w'Omukama mwabũga na Fĩlĩpo ati, Uhangane, ugende oko kitambi ky'eyĩkwa oko nzira eyikandagala ĩkalũa eYerũsalema eriya eGaza. Eyĩ ni nzira y'embwarara. 27Neryo Fĩlĩpo mwahangana mwayayo. Neryo habya omundu oyũbũnĩre ow'eEtĩopĩa, iniakasuba ewabo. Omundu oyo abya mundu mukulu oyukabika ebindu byosĩ by'omwamikalĩ ye Kandake w'eEtĩopĩa. Kandi abya ĩnĩayĩre eYerũsalema erĩyaramya Nyamuhanga, 28iniakasuba eEtĩopĩa omo galĩ yiwe. Omugulu abya akagenda omo galĩ yiwe eyo, abya akasoma omo kitabu ky'omũmĩnyererĩ Ĩsaya. 29Neryo Omũlĩmũ Abũyĩrĩre mwabwira Fĩlĩpo ati, Ugende, uyitomeke oko galĩ eyo. 30Neryo Fĩlĩpo mwatibita eyo ali, nĩkwa mowa akasoma ekitabu ky'omũmĩnyererĩ Ĩsaya, neryo mwamũbũlya ati; Unemuminya ebyo ukasoma kwehĩ? 31Nĩkwa omukulu oyo mwabũga ati, Ko nangaminya nyiti ndawite oyũkanyowĩsayabyo kwehĩ? Neryo mwabũlya Fĩlĩpo ati asambire oko galĩ n'erĩĩkala naye. 32Nĩkwa omulondo w'Amasako awabya akasoma waya, ati, Abya ng'embũlĩ eyikatwalawa erikerwa, Abya ng'ekyana ky'embũlĩ ekikabya bũkũtũ omugulu bakatwa obweya bwakyo. Mwatabũga kĩnywa n 'ekiguma . 33Kandi mwahemulwa, kandi mobamukaga erĩbanza. Nindi wasyatũla omwatsi w'abana buwe kwehĩ? Kusangwa engebe yiwe omo kihugo yabĩrĩlũsĩbwaho. 34Neryo omukulu oyo mwabũga na Fĩlĩpo ati, Unyibwire omũmĩnyererĩ ng'akahulandi. Akayahula kutse akahula ogundi kwehĩ? 35Neryo Fĩlĩpo mwatsũka oko mulondo oyo w'Amasako, mwamũtũlĩra Engulu Yowene ya Yesu. 36Neryo babere bakagenda omo nzira eyo, mobahĩka ahabya magetsi, neryo omukulu oyo mwabũga ati, Lebaya, hano hali amagetsi! Ekyanganyĩkakĩrya erĩbatĩsĩbwa ni kyahi kwehĩ? [ 37Neryo Eĩlĩpo mwabũga naye ati, Wangabatĩsĩbwa wamĩkĩrĩrya n'omutima wawe gosĩ. Naye mwasũbirya ati, Namĩkĩrĩrya ko Yesu Kristo ni Mugala wa Nyamuhanga.] 38Neryo mwahamula ati egalĩ ihangane, neryo ababiri bosĩ, Fĩlĩpo n'omukulu oyo, mobandagalira omo magetsi, na Fĩlĩpo mwamũbatĩsya. 39Neryo omugulu balũa omo magetsi, Omũlĩmũ w'Omukama mwabakula Fĩlĩpo, n'omukulu oyo mwataswamulolako, nĩkwa mwaya omo lugendo luwe ĩnĩatsemĩre ndeke. 40Neryo Fĩlĩpo mwayabanika eAzoto. Neryo mwalaba omo mĩyĩ yosĩ ĩnĩakatũla Engulu Yowene, erĩhĩka eKaĩsarĩ.

will be added

X\