EMĨBĨRĨ Y'ABAKWENDA 7

1Neryo omũhererĩ mukulu oko bahererĩ bosĩ mwabũlya Setefano ati, Emyatsi eyĩ ni kwenene kwehĩ? 2Neryo Setefano mwasũbĩryabo ati, Balĩkyetu, n'abotata, mũnyowe! Nyamuhanga w'olukengerwa mwabutukira tata wetu Abrahamũ, omugulu abya eMesopotamia, ate ayĩkala eHaranĩ. 3Neryo mwamubwira ati, Ũlũe omo kihugo kyenyũ, noko b'ekĩtũnga kyawe, neryo uye oko kihugo ekyo nasyakũkangya. 4Neryo mwalũa omo kihugo ky'Abanya Kaldea, mwĩkala eHaranĩ. Neryo ĩse wa Abrahamũ abere ahola, Nyamuhanga mwamũhũmya erĩhĩka omo kihugo ekĩ aho mwĩkere lino. 5Oko mugulu oyo Nyamuhanga mwataha Abrahamũ oko kihugo ekĩ, kutse n'ekitswe ky'emetere nguma. Nĩkwa mwamulagakyo isiawite mwana, ati asyamuhakyo mo kitaka kiwe, n'eky'abana buwe. 6Nĩkwa Nyamuhanga mwabwira Abrahamũ ati, Abitsikulu bawe basyabya babunga, basyĩkala omo kihugo ky'obubunga, eyo basyabya abakobe n'erikolwa nabi emyaka magana ani (400). 7Nĩkwa Nyamuhanga ati, Nasyatswera ekihanda ekyo ekikayirabo mo bakobe, n'enyũma w'aho basyalũa eyo, ibanyikolera hano. 8Neryo Nyamuhanga mwaha Abrahamũ, omwatsi w'erĩbanĩa mo kĩmĩnyĩsyo ky'endagane. Neryo Abrahamũ mwabuta Isaka, mwamũbanĩa ekiro ky'omunani; neryo Ĩsaka mwabuta Yakobo, na Yakobo mwabuta abotata-kulu erĩkũmĩ n'ababiri. 9Neryo abotata-kulu abo mobakwa Yosefũ y'obũha, mobamũgũlya mo mukobe eMĩsĩrĩ. Nĩkwa Nyamuhanga abya haguma naye. 10Kandi mwamũlamya omo malĩge wuwe gosĩ. Kandi mwaha Yosefũ y'amenge n'erĩsĩmwa omo meso wa Farao, omwami w'eMĩsĩrĩ. Kandi Farao mwayira Yosefũ mo mũtabalĩ mukulu w'eMĩsĩrĩ, n'ow'ekĩtũnga kyosĩ ky'omwami. 11Neryo enzala moyahĩka omo kihugo ky'eMĩsĩrĩ n'eky'eKanana kyosĩ, n'obũlĩge bunene, n'abotata-kulu wetu mobabula akalyo. 12Nĩkwa omugulu Yakobo owa ko hali akalyo eMĩsĩrĩ, mwatuma, abotata-kulu wetu b'eyo engendo y'erĩmbere. 13N'oko lugendo lw'akabiri Yosefũ mwayĩmĩnyĩkalya oko bagala babo, n'ekĩtũnga kya Yosefũ mokyamĩnyĩkalĩbwa uku Farao. 14Neryo Yosefũ mwatumira uku Yakobo tata wuwe erimubirikira n'ekĩtũnga kiwe kyosĩ, abandu makũmĩ alinda n'abatanu eriasa eMĩsĩrĩ. 15Neryo Yakobo mwandagalira eMĩsĩrĩ, neryo mwaholerayo iye haguma n'abotata-kulu wetu. 16Neryo ebĩnda byabo mobyatabwa eSekemũ omo mahero ago Abrahamũ agula oko franka uku bagala ba Hemora. 17Neryo omugulu w'endagane eyo Nyamuhanga alahĩraya Abrahamũ abya akasonda erĩhĩka, abandu mobakanyirira, mobabya bangi eMĩsĩrĩ. 18Neryo eMĩsĩrĩ mohasinga ogundi mwami, oyũtasĩ Yosefũ. 19Iye mwakola menge n'ekihanda kyetu, mwakola abotata-kulu betu bo nabi, ati baguse abana babo bahole. 20Neryo Musa mwabutwa oko mugulu oyo. Abya mubuya kutsibu omo meso wa Nyamuhanga, mobamulembera omo nyũmba y'ĩse emikera ĩsatu. 21Neryo omugulu ahĩrawa eyĩhya, mwali wa Farao mwamwĩmya, mwamulembera eribya mugala wuwe. 22Musa mwakangĩrĩrĩbwa omo menge gosĩ w'Abanya Mĩsĩrĩ, kandi mwabya mundu mukulu omo bĩnywa n'emĩbĩrĩ. 23Nĩkwa emyaka ya Musa yabere yasonda eribya makũmĩ ani, mwaganĩrya eriyabana abalĩkyabo abana ba Israelĩ. 24Nĩkwa Musa mwalangira Omunya Mĩsĩrĩ oyukakola Omũĩsraelĩ yo nabi, neryo Musa mwimira Omũĩsraelĩ mwakĩsya mwĩta Omunya Mĩsĩrĩ. 25Musa mwaganĩrya ati abalĩkyabo Abaĩsraelĩ bangaminya ngoko Nyamuhanga abya akalamyabo omo byala biwe, nĩkwa mobataminya batya. 26N'engyakya Musa mwahuluka kubo ibakalwa, neryo mwalenga erĩsanganĩabo omo buholo ati, Batahi muli baguma, busana nakĩ mukakolerana nabi kwehĩ? 27Nĩkwa oyo wabya akahũtalya mũlĩkyabo, mwakũna Musa ati, Nindi wakũhĩrĩre mo mũtabalĩ n'omũtswerĩ wetu kwehĩ? 28Wanzĩre erĩnyĩta ngoko wĩta Omunya Mĩsĩrĩ yo mũlĩgolo kwehĩ? 29Nĩkwa omugulu Musa owa ekĩnywa ekĩ mwatibita, mwabya mubunga omo kihuga ky'eMĩdĩanĩ. Kandi eyo Musa mwabutirayo bagala babiri. 30Neryo emyaka makũmĩ ani yabere yahwa, omũlaĩka mwahuluka uku Musa omo kirimi ky'omuliro omo kisaka ky'omusakisaki omo mbwarara y'ekitwa ky'eSĩnaĩ. 31Nĩkwa Musa mwaswekera ekyo alangira, neryo abere ayĩtũnda erĩyĩtegererya ndeke, omulenge w'Omukama mwabũga ati, 32Ĩngye indi Nyamuhanga w'aboso-kulu wawe, Nyamuhanga wa Abrahamũ, na Ĩsaka, na Yakobo. Neryo Musa mwatitimana n'eriubaha, mwataswalenga erilangira. 33Nĩkwa Omukama mwabũga naye ati, Ũlũsaye esyongendero oko bisando byawe, kusangwa aho uhangene ni kitaka kĩbũyĩrĩre. 34Nabirilangira kwenene amalĩge w'abandu bage eMĩsĩrĩ. Kandi nabĩrĩowa erĩsĩmba lyabo, nabĩrĩkĩma erĩlamyabo. Neryo wase ngakutuma eMĩsĩrĩ. 35Musa oyo Baĩsraelĩ bagana bati, Nindi wakũyĩrĩre mo mũtabalĩ n'omũtswerĩ kwehĩ? Yoyo Nyamuhanga atuma eribya mũtabalĩ n'omũlamya, haguma n'erĩwatĩkya ly'omũlaĩka oyo wamubutukirako omo kisaka ky'emisakisaki. 36Omundu oyo mwasondola Abaĩsraelĩ erĩlũsyabo eMĩsĩrĩ, iniakakola eby'eriswekera, n'ebitiko-tiko omo myaka makũmĩ ani, omo kihugo ky'eMĩsĩrĩ, n'omo Ngetsi y'eNgula, n'omo mbwarara. 37Oyũ ni Musa oyo wabwira bandu ba Ĩsraelĩ ati, Nyamuhanga asyabahanganĩrya omũmĩnyererĩ, ngoko anyituma, oyũkalũa oko balĩkyenũ. 38Yoyo wabya haguma n'abandu ba Ĩsraelĩ omo mbwarara. Abyayo haguma n'abotata-kulu wetu, kandi haguma n'omũlaĩka oyo wabũga naye oko kitwa ky'eSĩnaĩ. Iye mwangirira amahano w'engebe n'erituhago. 39Kandi abotata-kulu wetu mobagana erĩowa Musa, nĩkwa mobamupona, kandi omo mitima yabo mobasuba eMĩsĩrĩ. 40Mobabwira Harũnĩ bati Utuyirire esyonyamuhanga esikandisyatusondola. Kusangwa sĩtwasĩ ebyahĩkĩre uku Musa oyo watũlũsaya eMĩsĩrĩ. 41Neryo mobayira esanamu y'ekyana ky'ende mo sanamu, ibakaleterayo ehongo, n'eritsemera omũbĩrĩ w'ebyala byabo. 42Nĩkwa Nyamuhanga mwalũa kubo, mwalekabo ĩbakaramaya esyongũnũnũ sy'ekyanya; ngoko kĩsakĩre omo kitabu ky'abamĩnyererĩ kiti, Abandu ba Ĩsraelĩ! Mwaherera amahere ayo n'esyohongo ũkw'ĩngye, kwehĩ? Emyaka makũmĩ ani omo mbwarara. 43Mwabya mukaheka ehema ya nyamuhanga yo Molokĩ. N'esyosanamu sy'engũnũnũ ya nyamuhanga wenyũ Refanĩ; Syabya sanamu esyo mwabumba erĩramyasyo. Nage nasyabahũmĩrya eyisirya w'eBabelĩ. 44Abotata-kulu wetu babya n'ehema embere sya Nyamuhanga omo mbwarara. Moyabambwa ngoko Nyamuhanga ahana Musa eribambayo, ng'olulengo olo Musa alolako. 45N'enyũma w'aho abotata-kulu wetu, abahabawa ehema eyo, mobatwalayo haguma na Yosũa omugulu bĩmaya ekihugo ekyo ky'ebihanda ebyo Nyamuhanga ahiga embere sy'abotata wetu. Neryo moyabyaho erĩhĩka oko mugulu wa Dawĩdĩ. 46Dawĩdĩ oyo mwabana erĩsĩmwa omo meso wa Nyamuhanga, neryo mwabũlya Nyamuhanga ehamũlĩ y'eribanira Nyamuhanga wa Yakobo y'enyũmba. 47Nĩkwa ni Solomono yo wamũhĩmbĩra enyũmba. 48Nĩkwa, Owendata Kutsibu sĩalĩkala omo manyũmba awakahĩmbawa n'abandu, ngoko mũmĩnyererĩ akabũga ati, 49Olubula nĩ kĩtũmbĩ kyage ky'obwami, Omukama atya; N'ekihugo nĩ kĩtũmbĩ ky'ebisando byage. Mwasyambĩmbĩra enyũmba y'omuhanda wahi kwehĩ? N'aho nasyaluhukira ni hahi kwehĩ? 50Ebyala byage byo bitahangika emyatsi yosĩ eyĩ kwehĩ? 51Ĩnywe muli bandu bakalĩre! Muli batwenge omo mitima yenyũ, n'amatwĩ wenyũ sĩalĩowa omwatsi wa Nyamuhanga. Kandi mukalwa n'Omũlĩmũ Abũyĩrĩre ebiro byosĩ. Muli ng'aboso-kulu wenyũ. 52Nindi oko bamĩnyererĩ oyo aboso-kulu wenyũ batendereraya kwehĩ? Kandi mobĩta abakwenda abatũla omwatsi w'erĩhĩka ly'Oyutunganene. Na lino ĩnywe mwabirihotera oyo n'erĩmwĩta. 53Ĩnywe mwabiriangirira Emigambo ya Nyamuhanga eyo mwahabawa n'abamalaĩka, nĩkwa simwetakengayo. 54Neryo abandu b'erĩbũgĩro, omugulu bowa ebĩnywa bya Setefano ebĩ, mobahitana mobayĩsyolya. 55Nĩkwa Setefano ĩnĩoswĩre n'Omũlĩmũ Abũyĩrĩre mwasamalira elubula mwalangira olukengerwa lwa Nyamuhanga, na Yesu inianimene oko byala by'amali bya Nyamuhanga. 56Neryo mwabũga ati, Lebaya! namalangira olubula ĩlũnakĩngwĩre, n'Omugala w'Omundu iniahangene oko byala by'amali bya Nyamuhanga! 57Nĩkwa mobabirikira n'omulenge munene, kandi mobalĩba amatwĩ wabo, mobamugulukirako, iguma-guma. 58Mobamuhigira eyĩhya w'omũyĩ, mobamwĩta omo mabwe. Nĩkwa abalangĩrĩ mobabika esyongimba syabo oko mũlwana oyukahulawa mo Saũlo. 59Kandi mobaswagusa uku Setefano kw'amabwe, naye mwabirikira Omukama ati, Mukama Yesu, wangirire ekĩrĩmũ kyage! 60Neryo Setefano mwakũkama, iniakabirikira n'omulenge munene ati, Mukama, Suganzire kubo kw'ekibi ekĩ! Neryo abere abĩbũga atya, mwalekula.

will be added

X\