EMĨBĨRĨ Y'ABAKWENDA 6

1Neryo oko biro ebĩ, omugulu eriganza ly'abiga lyabya likakanya, Abayũda b'ekihugo ky'Abagĩrĩkĩ mobasĩnĩngũlĩra Bayũda, kusangwa abakwakalĩ babo mobataganzwa okw'igabirwa ly'akalyo k'obuli kiro. 2Neryo abakwenda erĩkũmĩ n'ababiri, mobabirikira endeko y'abiga bati, Sĩryowene tukaleka ekĩnywa kya Nyamuhanga busana n'erikolera akalyo. 3Nĩkwa balĩkyetu, muyisoge abandu balinda omo katĩkatĩ kenyũ, abakasĩmawa, aboswĩre n'Omũlĩmũ Abũyĩrĩre n'amenge, tũhĩrebo oko mũbĩrĩ oyũ. 4Nĩkwa ĩtwe twasyayĩhĩra okw'isaba, n'omũbĩrĩ w'erĩkangĩrĩrya ekĩnywa. 5Neryo endeko yosĩ mobasĩma omwatsi oyo, Mobayisoga Setefano oyo goswĩre n'erĩkĩrĩrya n'Omũlĩmũ Abũyĩrĩre, na Fĩlĩpo, na Porokoro, na Nĩkanora, na Tĩmonĩ, na Parmena, na Nĩkolao w'eAntĩokĩa, oyo wabinduka eribya Mũyũda. 6Neryo endeko moyahĩra aba embere w'abakwenda, neryo babere babisaba mobahĩra kubo kw'ebyala. 7Litya ekĩnywa kya Nyamuhanga mokyakanyirira. N'eriganza ly'abiga nalyo molyakanyirira kutsibu eYerũsalema, n'abahererĩ bangi mobalĩga erĩkĩrĩrya eryo. 8Neryo Setefano, ĩnĩoswĩre n'olukogo n'obũtokĩ, mwabya akakola eby'eriswekera n'ebitiko-tiko omo katĩkatĩ k'abandu. 9Nĩkwa abandi bandu, ababya bandu b'enyũmba y'erĩhĩndanamo eyikahulawa mo Bandu b'obwĩranda. Ibo ni bandu b'eKũrene, n'eAlesandũrĩa, n'abandi b'eKĩlĩkĩa n'eAsĩa mobatsũka erikuba obuhaka na Setefano. 10Nĩkwa Omũlĩmũ mwaha Setefano y'amenge, kyaleka ĩnĩasĩngabo. 11Neryo mobayakulula abandu ababũga bati, Twabĩrĩowa akabũga ebĩnywa by'eritsuma Musa na Nyamuhanga. 12Batya mobagangagangya abandu, n'abakulu, n'abakangĩrĩrya b'Emigambo. Neryo mobatsimba Setefano mobamukurira embere sy'erĩbũgĩro. 13Neryo mobaleta bandu abakamũsĩngĩsĩraya bati, Omundu oyũ akabũga nabi emigulu yosĩ busana na hano ahabũyĩrĩre, na busana n'Emigambo nibya. 14Kusangwa twabĩrĩowa akabũga ati, Yesu w'eNazaretĩ oyũ, asyaherya hano, n'eribindula emitsye eyo Musa atuha! 15N'abosĩ ababya bĩkere omw'ĩbũgĩro, mobasamalira Setefano, mobalangira obũsũ buwe ibwamasosa obũsũ bw'omũlaĩka.

will be added

X\