EMĨBĨRĨ Y'ABAKWENDA 5

1Nĩkwa habya omundu erĩna liwe iyo Anania, n'erĩna lya mũkalĩwe lyabya Safira. Iye mwagũlya ekitaka kiguma kyabo, 2nĩkwa mwabika ekitswe ky'obũgũlĩ obo busana naye, n'omũkalĩ wuwe ĩnĩanasĩ omwatsi oyo, neryo mwaha abakwenda ekindi kitswe ky'obũgũlĩ. 3Nĩkwa Petero mwamubwira ati, Busana nakĩ walekĩre Satanĩ iyabya omo mutima wawe eribihira Omũlĩmũ Abũyĩrĩre, n'eribika oko bũgũlĩ bw'ekitaka kwehĩ? 4Omugulu wabya ute wagũlya ekitaka sikyabya kyawe kwehĩ? Kandi omugulu wagũlayakyo sikyabya omo hamũlĩ yawe kwehĩ? Wamaganĩrya erikola omwatsi oyũ omo mutima wawe busana nakĩ kwehĩ? Sulitabiha uku bandu, nĩkwa ulyabiha uku Nyamuhanga! 5Anania abere owa ebĩnywa ebĩ, mwawa ahisi, mwalekula, neryo abosĩ abowakyo mobubaha kutsibu. 6Neryo abalwana mobahangana, mobamusenga, mobamuta. 7Neryo enyũma w'esyosaa ĩsatu, omũkalĩ wuwe mwahĩkamo, ĩsĩasĩ ekyakolekĩre. 8Petero mwamũbũlya ati, Umbwire obũgũlĩ obũlyalũa oko kitaka mũlyagũlaya, bo n'obũ kwehĩ? Naye mwabũga ati, Ega, obũgũlĩ ko na singaho. 9Neryo Petero mwamũbũlya ati, Busana nakĩ uwe n'ĩbawe, mwabirihanana haguma erirenga oko Mũlĩmũ w'Omukama kwehĩ? Lebaya, abandu abakabita ĩbawe bane oko lũkyo, kandi bakandikutwala nawe nibya! 10Neryo-neryo mwawa ahisi oko bisando biwe, mwalekula. Neryo abalwana babere bakingira mobeya iniabirihola, mobamutwala, eyĩhya, mobamuta hakũhĩ n'ĩba wuwe. 11Neryo ekanĩsa yosĩ, n'abosĩ abowa omwatsi oyo mobubaha kutsibu. 12Neryo abakwenda mobakola ebitiko-tiko n'eby'eriswekera bingi omo katĩkatĩ k'abandu. N'abandu bosĩ babya b'omutima muguma ĩbahĩndene omo baraza ya Solomono. 13Nĩkwa sihabya bandi bate b'endeko yabo abalenga erĩyĩhĩra kubo, n'omo abandu mobapipabo. 14Nĩkwa abĩkĩrĩraya oko Mukama babya bangi, esyondeko sy'abalume n'abakalĩ, mobatomekera oko ndeko yabo. 15Kyaleka ibahekera abakonĩ omo syonzira, n'erĩhĩrabo oko syongyingo, n'oko birago, bati omugulu Petero akalabaho, kumbe ekyũtsũtsũ kiwe ikyatogera oko muguma wa kubo. 16N'esyondeko sy'abandu mosyalũa oko mĩyĩ hakũhĩ n'eYerũsalema bakahĩndana, n'erireta abakonĩ n'abakagalawa n'ebĩrĩmũ bĩtĩsĩrĩre. N'abosĩ mobalamĩbwa. 17Nĩkwa omũhererĩ mukulu, mwa-hangana haguma n'abalĩkyabo bosĩ (ekyo ni kihanda ky'Abasadũkayo), mobũsũla n'obũha. 18Neryo mobahamba abakwenda mobahĩrabo omo nyũmba y'omũlĩkĩ w'omũyĩ. 19Nĩkwa omo kiro, omũlaĩka w'Omukama mwakingula esyonyũyĩ sy'enyũmba y'omũlĩkĩ, mwahũlũkĩrya abakwenda b'eyĩhya, mwabwirabo ati, 20Mugende, muhangane omo Hekalũ, mubwire abandu ebĩnywa byosĩ by'eNgebe eyĩ. 21Neryo babere bowa ebĩ, mobingira omo Hekalũ omo ngyakya-ngyakya, mobatsũka erĩkangĩrĩrya. Neryo omũhererĩ mukulu, n'abalĩkyabo mobabirikira erĩbũgĩro lyosĩ lyo haguma, n'abakulu b'ekihanda kya Ĩsraelĩ, neryo mobatumira oko bakwenda omo nyũmba y'omũlĩkĩ bati baletawe. 22Nĩkwa omugulu abalembya bahĩkaho, mobateya bakwenda b'omo nyũmba y'omũlĩkĩ. Neryo mobasuba okw'ĩbũgĩro bati, 23Motũkegaya enyũmba y'omũlĩkĩ ĩnĩnakĩngĩre ndeke, n'abateya ibanimene oko syongyo, nĩkwa motukabya twakingulamo, motutetabana mo mundu! 24Neryo omugulu omũteya w'eHekalũ, n'abahererĩ bakulu bowa ebĩnywa ebĩ, mobalemwa omwatsi oyũ ng'asyabya ati. 25Neryo omundu muguma mwahĩka mwabwirabo ati, Lebaya! abandu abo mwahĩra omo mũlĩkĩ banimene omo Hekalũ banemũkangĩrĩrya bandu! 26Neryo omũteya oyo haguma n'abalembya mobayenda abakwenda butsira mwaga; kusangwa babya bakubaha abandu, bati bakasyaguswa kw'amabwe. 27Neryo mobaleta abakwenda moba-hanganĩabo omw'ĩbũgĩro. Neryo omũhererĩ mukulu oko bahererĩ bosĩ mwabũlyabo 28ati, Motwabahana kutsibu tuti sĩmũkangĩrĩraye omo lĩna erĩ. Lebaya! mwabĩrĩũsũlya eYerũsalema mw'erĩkangĩrĩrya lyenyũ, kandi mukasonda erĩtũhĩra k'omusango w'omusasi w'omundu oyo. 29Nĩkwa Petero n'abakwenda mobasũbĩrya bati, Litolere itwakenga Nyamuhanga kwilaba bandu. 30Nyamuhanga w'abotata wetu mwalũbũkya Yesu, oyo mwĩta n'erimubamba oko musalaba. 31Nĩkwa Nyamuhanga mwamũhamya oko byala biwe by'amali mo Mukulu n'Omũlamya, ahe Israelĩ eribindula emitima yabo n'eribuyirwa ly'ebibi. 32Netu tuli balangĩrĩ b'emyatsi eyĩ, ĩtwe haguma n'Omũlĩmũ Abũyĩrĩre, ogo Nyamuhanga abiriha abakamukenga. 33Nĩkwa omugulu bowa ebĩ, mobahitana ibakasonda erĩĩtabo. 34Nĩkwa Omũfarĩsayo muguma oyukahulawa mo Gamalĩelĩ, omũkangĩrĩrya w'Emigambo, iniakakengawa n'abandu bosĩ, mwaha, ngana omw'ĩbũgĩro, mwahamula ati abakwenda bahĩrawe eyĩhya yo hake. 35Neryo mwabwira erĩbũgĩro ati, Ĩnywe balume ba Ĩsraelĩ, muyitondeke nga mwanzĩre erikolakĩ n'abandu aba. 36Kusangwa oko gundi mugulu ye Teũda mwahuluka iniakayahula mo mundu mukulu. Neryo abandu nga magana ani mobamukwama. Teũda oyo mwĩtwa, n'abosĩ abamukwama mobapanza-panzwa, n'omwatsi wuwe mwahwa. 37N'enyũma w'aho Yũda w'eGalĩlaya mwahangana omo biro by'etsapa. Naye mwayira abandu bangi erimukwama. Naye nibya mwĩtwa, n'abosĩ abamukwama moba-panza-panzwa. 38Neryo omo mwatsi oyũ, ngababwira nyiti, simukwame abandu aba, mulekebo. Kusangwa kumbe amalengekanĩa aya n'omũbĩrĩ oyũ, amabya w'abandu, iniakandisyabulirana. 39Nĩkwa omwatsi oyũ amabya ini wa Nyamuhanga, simwendisyatoka erĩsĩngana. Kite kitya mũkandĩyĩmĩnyĩkalya ko mukalwa na Nyamuhanga. 40Neryo erĩbũgĩro molyalĩga erihana lya Gamalĩelĩ. Mobabirikira abakwenda, mobaswĩryabo omo nyambĩ, neryo mobahanabo bati sĩbabũge kandi omo lĩna lya Yesu, neryo mobalwĩkabo. 41Neryo abakwenda mobalũa omw'ĩbũgĩro ibanemutsema bati Nyamuhanga akaganzabo ng'abatolere erihemulwa busana n'erĩna lya Yesu. 42Neryo ebiro byosĩ, omo Hekalũ n'omo manyũmba w'abandu, mobatũmbya erĩkangĩrĩrya n'erĩtũla Engulu Yowene ya Yesu kw'ali Kristo.

will be added

X\