EMĨBĨRĨ Y'ABAKWENDA 4

1Neryo omugulu Petero na Yoane babya bakĩnabũga n'abandu, abahererĩ, n'omukulu w'abateya b'eHekalũ, n'Abasadũkayo mobahĩka kubo. 2Mobahitana kusangwa abakwenda babiri abo babya bakakangĩrĩrya bandu, ĩbakatũlago bati, Yesu abĩrĩlũbũkĩbwa oko baholĩ, erĩkangya batya ngoko abaholĩ basyalũbũkĩbwa omo ngebe. 3Neryo mobahambabo mobahĩrabo omo mũlĩkĩ erĩhĩka engyakya, kusangwa bwabya ibukasonda erĩĩra, 4Nĩkwa abangi abowa erĩkangĩrĩrya eryo mobĩkĩrĩrya; n'eriganza ly'abalume molyahĩka nga elfu ĩtanu (5000). 5Neryo engyakya abatabalĩ b'Abayũda, n'abakulu, n'abakangĩrĩrya b'Emigambo mobahĩndana eYerũsalema. 6Mobahĩndana haguma n'omũhererĩ mukulu oko bahererĩ bosĩ ye Ana, na Kayafa, na Yoane na Alesandũra, n'ab'ekihanda kyosĩ ky'omũhererĩ mukulu oko bahererĩ bosĩ. 7Neryo mobahunganĩa abakwenda embere syabo, mobabũlyabo bati, Mwamakola ekĩ omo bũtokĩ bwandi, n'omo lĩna lyandi kwehĩ? 8Neryo Petero, ĩnĩoswĩre m'Omũlĩmũ Abũyĩrĩre mwabwirabo ati, Ĩnywe batabalĩ n'abakulu b'abandu, 9twamabya tukatsongerawa busana n'ebibuya ebyakolawa oko mũkonĩ oyo, kutse nga mwalamĩbwa ati, 10ĩnywe bosĩ muminye, n'abandu bosĩ ba Ĩsraelĩ baminye, tuti omundu oyũ imene hano emuliro wenyũ iniabirilama ndeke busana n'erĩna lya Yesu Kristo w'eNazaretĩ, oyo mwabamba oko musalaba, nĩkwa Nyamuhanga mwamũlũbũkya oko baholĩ. 11Yesu yoyo Amasako akahula ati, Erĩbwe ĩnywe bahĩmbĩ mwagana, Lyabĩrĩhĩrwa mo lĩbwe erĩkatũngananaya enyũmba. 12Neryo erilama siriri omo gundi mundu, kusangwa Nyamuhanga sialitahula erindi rĩna omo kihugo kyosĩ omo katĩkatĩ k'abandu, eryangatũlamya. 13Neryo abakulu abo mobasweka omugulu balangira obutubaha bwa Petero na Yoane, kandi mobaminya ko bali bandu batakangĩrĩrĩbawa, isi banyima-nyima. Neryo mobibuka ko bali bandu abasiba haguma na Yesu. 14Neryo kandi mobabula eky'erĩbũga, kusangwa ibakalangira omundu oyo walamĩbawa inianimene haguma na Petero na Yoane. 15Nĩkwa babere babwirabo bati balũe omw'ĩbũgĩro mobatsũka erĩkanĩa omo katĩkatĩ kabo, 16bati, Twasyakolakĩ n'abandu aba kwehĩ? Kusangwa abosĩ abĩkere eYerũsalema babiriminya kw'abandu aba babirikola ekitiko-tiko kĩkalĩre. Netu sitwangatoka erigana ekyo. 17Nĩkwa tũbahĩsayebo sĩbabũge kandi n'omundu n'omuguma omo lĩna lya Yesu, omwatsi oyũ siatsungane omo katĩkatĩ k'abandu. 18Neryo babere babirikirabo, mobahanabo bati sĩbabũge kutse erĩkangĩrĩrya n'ahake omo lĩna lya Yesu. 19Nĩkwa Petero na Yoane mobasũbĩryabo bati, Ĩnywe mubye batswerĩ nga linatunganene omo meso wa Nyamuhanga erĩbowa, kutse erĩowa Nyamuhanga. 20Kusangwa sitwangatoka erireka erĩbũga ebyo twabirilolako n'ebyo twabĩrĩowa. 21Neryo erĩbũgĩro molyasyũbahĩrĩryabo, neryo mobaboholabo mobabula eky'erisuyirirabo busana n'abandu, kusangwa abosĩ babya bakapipa Nyamuhanga busana n'ekyakolawa. 22Kandi omundu oyo walamĩbawa omo kitiko-tiko ekyo abya w'emyaka eyĩlabĩre amakũmĩ ani. 23Neryo babere baboholabo, Petero na Yoane mobasuba oko ndeko yabo, mobabwirabo emyatsi yosĩ eyo abahererĩ bakulu n'abakulu babwirabo. 24Neryo omugulu bowa ebyo, abosĩ mobasaba Nyamuhanga omo mutima muguma bati, Uwe Mwami Mukulu, ni iwe wahangika olubula n'ekihugo, n'engetsi, n'ebyosĩ ko birimo! 25Oyo wabũga omo Mũlĩmũ Abũyĩrĩre omo buno bwa tata wetu omugombe wuwe Dawĩdĩ, ati, 26Busana nakĩ, ebihanda bikahitana kwehĩ? Busana nakĩ abandu bakaya embĩta ya busa kwehĩ? Abami b'ekihugo bakayisamambula, N'abatabalĩ bakaya embĩta yo haguma, Bakalwa n'Omwami Mukulu, kandi bakalwa na Kristo wuwe. 27Kusangwa kwenene Herode na Pontĩo Pilato, haguma n'Ebihanda n'abandu ba Ĩsraelĩ, mobahindana haguma omo mũyĩ, erilwa n'Omugombe wawe oyũbũyĩrĩre ye Yesu, oyo wayira mo Kristo. 28Mobahĩndana haguma bakole ebyosĩ wayĩsũnza omo bũtokĩ bwawe n'erisonda lyawe uti bikolawe. 29Na lino, Mukama, ũlebaye erĩũbahĩrĩrya lyabo, kandi uleke abagombe bawe babũge ekĩnywa kyawe n'eritendiubaha lyosĩ. 30Usumbe ebyala byawe, ũlamaye, n'ebitiko-tiko n'eby'eriswekera bikolawe omo lĩna ly'Omugombe wawe oyũbũyĩrĩre, ye Yesu. 31Neryo babere babisaba, aho babya bahĩndene mohasũka-sũkanĩbwa, n'abosĩ mobũsũla n'Omũlĩmũ Abũyĩrĩre, mobabũga ekĩnywa kya Nyamuhanga omo butubaha. 32N'endeko y'abandu abĩkĩrĩraya moyabya n'omutima n'obũlengekanĩa buguma. Sihali oyo wabũga ati ebindu biwe ni biwe ĩyowene. Nĩkwa mobasangira ebyosĩ. 33Kandi abakwenda mobatũla omwatsi w'erĩlũbũka ly'Omukama Yesu omo bũtokĩ bunene, n'olukogo lunene lwabya kubo abosĩ. 34Kandi sihabya omundu w'obwaga omo katĩkatĩ kabo. Neryo ababya bawite ebitaka kutse amanyũmba, mobagũlyabyo, mobaleta obũgũlĩ bwabyo, 35mobahĩra obũgũlĩ obo, oko bisando by'abakwenda, neryo mobyagabirwa oko buli mundu ng'obwaga buwe ko bwabya. 36Neryo Yosefũ, Omũlawĩ ĩnĩabũtĩrwe eKĩpũro, abakwenda mobamwahula mo Barnaba (erĩna eryo liti, Mugala w'erihanda omutima), 37abya n'ekitaka, neryo mwagũlyakyo, mwaleta obũgũlĩ bwakyo mwahĩrabo embere sy'abakwenda.

will be added

X\