EMĨBĨRĨ Y'ABAKWENDA 3

1Nĩkwa Petero na Yoane babya bakaya omo Hekalũ oko saa mwenda, oko saa y'erisaba. 2Neryo oko lũkyo lw'eHekalũ olukahulawa mo Lubuya habya omundu oyo wabutawa inina kirema. Obuli kiro babya bakahekera omundu oyo y'oko lũkyo olo busana n 'erĩsabĩrĩrya ebindu oko bandu ababya bakingira omo Hekalũ. 3Neryo abere alangira Petero na Yoane bakasonda erimgira omo Hekalũ, mwasababo ati bamuhe. 4Neryo Petero na Yoane mobamuhanda kw'ameso, neryo Petero mwamubwira ati, Ũtũlebaye! 5Naye mwayĩtegereryabo, ĩnĩakaganĩraya ati asyabana kubo kw'ekindu. 6Nĩkwa Petero mwamubwira ati, Singwite esy'ebĩtsĩpa n'esyamagetsi, nĩkwa ekyo ngwite ngandikuhakyo. Omo lĩna lya Yesu Kristo w'eNazaretĩ, uyigendere! 7Neryo mwamuwata oko byala biwe by'amali, mwamũhanganĩa. Neryo-neryo ebisando biwe n'ehĩkongũlo hiwe mobyabana amaka. 8Neryo mwatwa ekyika, n'eriimana ndeke, mwatsũka eriyigendera. Kandi mwingira omo Hekalũ haguma nabo, akayigendera, n'erĩtwa ebika, n'eripipa Nyamuhanga. 9N'abandu bosĩ mobamulolako iniakayigendera n'eripipa Nyamuhanga. 10Neryo mobamuminyerera kw'ali yo mundu wabya akĩkala oko Lũkyo Lubuya lw'eHekalũ akasabĩrĩrya ebindu. Neryo mobũsũla n'erisweka n'erigasama busana n'emyatsi eyamũhĩkako. 11Neryo omundu oyo mwamakirira uku Petero na Yoane. N'abandu bosĩ mobasweka kutsibu, mobatibitirabo omo baraza eyikahulawa mo ya Solomono. 12Nĩkwa Petero abere alangira omwatsi oyo, mwabwira bandu abo ati, Ĩnywe balume ba Ĩsraelĩ, mukaswekera omwatsi oyo busana nakĩ, kutse mukatusamalirakĩ kwehĩ? Mũkaganĩraya muti ni busana n'obũtokĩ bwetu kutse obũbũyĩrĩre bwetu tukaleka omundu oyũ iniayigendera kwehĩ? 13Nyamuhanga wa Abrahamũ, na Ĩsaka, na Yakobo, Nyamuhanga w'abotata wetu, abiriha olukengerwa oko Mugombe wuwe Yesu. Nĩkwa ĩnywe momwamuhotera oko batabalĩ, kandi momwamugana embere sya Pilato omugulu asonda erimubohola. 14Nĩkwa ĩnywe momwagana Oyũbũyĩrĩre n'Oyutunganene, momwasaba Pilato abahe omwĩtĩ w'abandu. 15Kandi momwĩta Omwenye engebe, oyo Nyamuhanga alũbũkaya oko baholĩ. Netu tuli balangĩrĩ b'ebyo. 16Nĩkwa busana n'erĩkĩrĩrya omo lĩna lya Yesu, erĩkĩrĩrya uku Yesu lyo lyamaha omundu oyũ y'amaka, oyo mukalangira, ĩmũnamwasĩ nibya. Erĩkĩrĩrya Yesu lyo lyamalamya omundu oyũ embere wenyũ ĩnywe bosĩ. 17Neryo lino, balĩkyetu, nyĩnasĩ ebyo, ĩnywe n'abasondolĩ benyũ mwakola uku Yesu, momwakolabyo omo butaminya. 18Nĩkwa Nyamuhanga mwakanganĩa kera omo buno bw'abamĩnyererĩ bosĩ ati, Kristo wuwe asyagalwa; neryo mwaberereryago atya. 19Neryo ĩnywe mubindule emitima yenyũ mulolaye eyiri Nyamuhanga, ebibi byenyũ bisangulawe, 20neryo emigulu y'erĩyĩsyandira iyatoka erĩhĩka ĩkalũa embere sy'Omukama, kandi atoke eritutumira Yesu, oyuli Kristo oyo ayisoga busana nenyũ. 21Naye atolere erĩkokĩbwa elubula erĩhĩka oko mugulu w'erisuba ly'emyatsi yosĩ eyo Nyamuhanga ahula kera omo buno bw'abamĩnyererĩ buwe ababũyĩrĩre. 22Kusangwa Musa mwabũga ati, Omwami Mukulu Nyamuhanga asyabatumira omũmĩnyererĩ, ngoko anyituma. Asyabya muguma g'oko bandu benyũ. Nenyũ mwasyamowa omo myatsi yosĩ asyababwira. 23Neryo obuli mundu oyũtendĩsyowa omũmĩnyererĩ oyo, asyaherĩbwa erĩlũa omo katĩkatĩ k'abandu. 24Kandi nibya, abamĩnyererĩ haguma n'abosĩ ababũga erĩtsũka uku Samwelĩ n'abamukwama, abosĩ mobahula ebiro ebĩ. 25Kandi esyondagane sya Nyamuhanga omo bamĩnyererĩ nĩ syenyũ, nenyũ mukasangira erilagana eryo Nyamuhanga ayira n'abotata-kulu wenyũ. Ngoko abwira Abrahamũ ati, Nasyatsumula abandu bosĩ b'ekihugo omo bana bawe. 26Neryo Nyamuhanga mwahanganĩa Omugombe wuwe, neryo mwatsũka erimutuma ũkw'ĩnywe eribatsumula n'eribindula obuli mundu, mũlũe omo syonzira syenyũ nyibi.

will be added

X\