EMĨBĨRĨ Y'ABAKWENDA 28

1Neryo twabere twabibala ndeke erĩhĩka oko kitaka, motwaminya kw'ekitsira ekyo kikahulawa mo Melĩta. 2N'esyondũlanĩ syako mobatuyira ndeke kutsibu. Neryo embũla moyatsũka eriwa, nĩkwa busana n'embeho mobatwakĩrya omuliro, mobatũkokya ĩtwe bosĩ. 3Nĩkwa Paũlo mwasenya obũlo bw'esyongwĩ, mwahĩrasyo oko muliro, neryo enzoka moyalũa mũsyo busana n'ekĩhũhanĩ ky'omuliro, neryo moyayĩrĩngalĩngĩra oko byala bya Paũlo. 4Neryo esyondũlanĩ syako syabere syalangira enzoka ĩnĩnalerembĩre oko byala bya Paũlo, mobabwirana bati, Kwenene omundu oyũ nĩ mwĩtĩ. Kandi nomo anabiribala engetsi, erĩbanza sĩryetalĩga akabyaho. 5Nĩkwa Paũlo mwakungutira enzoka eyo omo muliro, ĩsĩalĩtakwakĩ. 6Nĩkwa abandu mobaganĩrya bati akandĩbĩmba, kutse eriwa ahisi n'erihola. Nĩkwa mobalindirira ndambĩ nyiri, mobalangira ĩsĩalĩtakwakĩ, mobabindula amalengekanĩa wabo, bati Paũlo ni nyamuhanga! 7Nĩkwa hakũhĩ n'aho habya ebitaka bya Pũblĩo omukulu w'ekitsira ekyo. Naye mwatũkokya ndeke biro bisatu. 8Neryo ĩse wa Pũblĩo abya alwere erĩhũhana n'erihita omusasi. Neryo Paũlo mwayamũkerya omo nyũmba, nĩkwa abere abisaba mwamũhĩra kw'ebyala, mwamũlamya. 9Neryo omwatsi oyũ abere abibya atya, abandi bakonĩ bosĩ b'ekitsira ekyo mobasa uku Paũlo, mobalamĩbwa. 10Mobatũsĩkya nibya, omo myatsi mingi y'eritukenga. Kandi omugulu twabya tũkalũayo omo bwato, mobatuha ebyosĩ ebyo twabya nabyo bwaga. 11Neryo enyũma w'emikera ĩsatu, motwahongoka omo bwato bwa Alesandũrĩa obwabya bũsĩbĩreho oko mikera y'eritsuku. Obwato obũ bwabya ibukahulawa mo Esyonyamuhanga sy'Oluhasa. 12Neryo motwahĩka oko mũyĩ w'e Sĩrakũse, nĩkwa motwĩkalaho ebiro bisatu. 13N'erĩlũa eSĩrakũse, motwalaba omo bwato motwahĩka eRegĩo. Kandi enyũma w'ekiro kiguma, erihunga molyabuhirira, lĩkalũa elutambi lw'eyĩkwa, n'oko kiro ky'ebibiri motwahĩka ePũteolĩ. 14Motweyayo abandi balĩkyetu, abatũbũlaya bati twĩkale nabo eyenga nguma. Ko twahĩka tutya eRoma. 15Kandi abalĩkyetu b'eRoma, babere babĩowa omwatsi wetu, mobasa oko Katale k'eApĩa n'oko Manyũmba Asatu w'Abalalĩrĩrĩ, erĩhĩndana netu. Neryo Paũlo abere alangirabo, mwaha Nyamuhanga y'ewasĩngya, n'omutima wuwe mwasĩka. 16Nĩkwa twabere twahĩka eRoma, Paũlo mwahabwa ehamũlĩ y'erĩĩkala aho wuwe iniawite omũsĩrĩkanĩ oyũkamũtegaya . 17Neryo enyũma w'ebiro bisatu, Paũlo mwabirikira abakulu b'Abayũda erĩhĩndana. Neryo babere babĩhĩndana, mwabũga nabo ati, Balĩkyetu! Nomo nanabya isinditakola omwatsi oko bandu betu, kutse oko mitsye y'aboso-kulu wetu, mobanyibohera eYerũsalema, n'erinyiha oko Baroma. 18Neryo Abaroma mobanyĩbũlĩrĩrya, kandi mobasonda erinyibohola, kusangwa mobatabana omwatsi owangaleka ĩbanyĩta. 19Nĩkwa Abayũda babere babigana, monasangwa eriya uku Kaĩsarĩ, isinyiwite eky'erihandikirira ekihanda kyetu nibya. 20Kyo kirialeka ĩnabũlya eribalolako n'erĩkanĩa nenyũ. Kusangwa ngaheka obuhulula obũ busana na Kristo, oyuli maha wa Ĩsraelĩ. 21Nabo mobamubwira bati, Sitwetabana esyobarua sĩkalũa eYũdea busana nawe. Kandi sihali mundu mũlĩkyetu oyũkahĩka eno n'erĩtũlago kutse erĩbũga omwatsi mubi busana nawe. 22Nĩkwa twanzĩre erĩowa amalengekanĩa wawe, kusangwa tũnasĩ abandu bakahula ekisomo ekĩ kyo nabi ehosĩ. 23Neryo babere babilagana na Paũlo busana n'ekiro kiguma, abandu bangi mobamweya omo nyũmba yiwe aho abya ĩkere. Naye mwakanĩryabo erĩtsũka omo ngyakya-ngyakya erĩhĩka, omw'ĩgolo-golo, inĩakatũla omwatsi w'obwami bwa Nyamuhanga. Nĩkwa Paũlo mwalenga erĩsĩngabo busana n'omwatsi wa Yesu omo Migambo ya Musa n'amasako w'abamĩnyererĩ. 24Abandi Bayũda mobasĩngwa omo bĩnywa biwe, nĩkwa abandi mobatĩkĩrĩrya. 25Neryo mobagenda ibamabiponana, kandi Paũlo ĩnĩamabĩbũga ekĩnywa kiguma ati, Omũlĩmũ Abũyĩrĩre mwabũga kwenene n'aboso-kulu wenyũ omo bĩnywa by'omũmĩnyererĩ Ĩsaya, 26ati, Ugende, ũbũge n'abandu aba uti, Mwasyahulikirira, n'erihulikirira, nĩkwa simwendisyaminya, Kandi mwasyalangira n'erĩyĩtegererya, nĩkwa sĩmwendĩsyaganĩrya. 27Kusangwa omutima w'abandu aba abiribya omo bũtowa, Babirihoma amatwĩ wabo okw'owa, Kandi babĩrĩrĩba ameso wabo, Bakasyalangira n'ameso wabo, N'erĩowa omo matwĩ wabo, N'eriminya omo mitima yabo, n'erinyibindukira, Nyamuhanga atya, Nage ĩnalamyabo. 28Neryo Paũlo mwabũga ati, Ĩnywe muminye ngoko erilama erĩ rya Nyamuhanga lyabiritumwa oko Bihanda. Nabo basyahulikirira nibya! [ 29Neryo Paũlo abere bĩbũga ebĩnywa ebĩ, Abayũda mobagenda, ibakakuba obuhaka bunene, omo katĩkatĩ kabo ĩbobene-bene. 30Nĩkwa Paũlo mwĩkala emyaka ĩbĩrĩ, omo nyũmba eyo abya akayirihira ĩyowene-wene, ĩnĩakakokaya abosĩ abamũhĩkako. 31Neryo mwatũla engulu y'obwami bwa Nyamuhanga, n'erĩkangĩrĩrya omwatsi w'Omukama Yesu Kristo butsira eriubaha, isihali oyũkamũkakĩraya.

will be added

X\