EMĨBĨRĨ Y'ABAKWENDA 27

1Neryo babere babisoha bati tuye eĨtalĩa omo bwato, mobahĩra Paũlo n'abandi bandu b'omũlĩkĩ uku Yũlĩo, omukulu w'omulondo w'abasĩrĩkanĩ b'Abaroma owakahulawa mo Mulondo wa Aũgũsto. 2Kandi motwingira omo bwato bw'eAdaramĩtĩ, obwasonda eriya oko bihugo ebiri oko mũsĩke w'eAsĩa. Neryo motwahongoka omo ngetsi. Kandi Arĩstarĩko, Omunya Makedonĩa w'eTesalonĩka, abya haguma netu. 3Engyakya motwahĩka eSĩdona. Yũlĩo mwakola Paũlo yo ndeke, mwamuha ehamũlĩ eriyabana abĩra buwe n'erĩwatĩkĩbwa. 4Neryo motwalũa eSĩdona motwaya hakũhĩ n'eKĩpũro kusangwa erihunga lyabya lĩkalĩre. 5Neryo twabere twabisoka engetsi eyĩhererenĩe n'eKĩlĩkĩa n'ePamfũlĩa, motwahĩka eMĩra omũyĩ w'eLĩkĩa. 6Neryo eyo eMĩra omukulu w'erĩgana, mweya obwato bw'eAlesandũrĩa obukaya eĨtalĩa, neryo mwatũhĩra mubo. 7Neryo motwagenda mubo mo bolo-bolo ebiro bingi, motwahĩka eKĩnĩdo n'obũlĩge, kusangwa erihunga molĩtalĩga tukagenda, motwalaba eyĩkwa kw'eKrete, hakũhĩ n'eSalmone. 8Neryo motwatwanganaho n'obũlĩge, motwahĩka ahakahulawa mo Ahabonderere Ndeke, ahabya hakũhĩ n'omũyĩ w'eLasea. 9Neryo omugulu muli abere abilaba, olugendo molwakala busana n'obwĩko, kusangwa Ekiro kikulu Ky'eritsira Kalyo ikyamabilaba. Neryo Paũlo mwahanabo 10ati, Ĩnywe balume! Namalebya olugendo lukandikala busana n'eritsanda, n'erihera ly'ebindu omo bwato, n'obwato, n'obwĩko bw'esyongebe syetu nibya. 11Nĩkwa omukulu w'abasĩrĩkanĩ erĩgana mwalĩga ebĩnywa by'omũsondolĩ w'obwato, n'omwenye obwato, kwilaba ebĩnywa Paũlo abũga. 12Kandi ah'erĩhĩra obwato sihabya howene busana n'erĩkalaho omo mikera y'eritsuku, neryo abandu bangi mobasoha bati balweho, bagende, bahĩke eFoĩnĩkĩ. EFoĩnĩkĩ ni kiharo ky'eKrete kibondere ndeke busana n'amato. N'aho hakalola omo katĩkatĩ k'esyondambi ĩbĩrĩ sy'ebwanga bw'endata, bati bĩkaleho omo mikera y'eritsuku. 13Neryo omugulu erihunga ly'elutambi lw'eyĩkwa lyabuhirira bolo-bolo, mobaganĩrya bati bamabana ekyo babya banzĩre, mobasumba engomo y'obwato, mobalaba hakũhĩ n'eKrete, ibakalandalanda oko na mũsĩke. 14Nĩkwa oko kandi katambĩ ekihunga kinene ky'akanyabungu ekikahulawa mo Ery'elutambi lw'endata, mokyabuhirira kĩkalũa oko mũsĩke. 15Nĩkwa mokyayĩswĩrya oko bwato, n'obwato mobwataluka erĩlolya omo kihunga ekyo, motwalekabo tutya, n'erihunga molyatuheka. 16Neryo motwalaba hakũhĩ n'akatsira kake akakahulawa mo Kaũda aho erihunga likabondera hake, neryo motwaboha akato kake k'oko bwato, ĩhakalĩre nibya. 17Neryo babere babisumbako oko bwato, neryo mobaboha obwato omo bikoba. Neryo mobubaha bati bakandihatira omo misege hakũhĩ n'omũsĩke w'eLĩbĩa, mobakĩmya esyongimba esĩkakũna obwato. Neryo ekihunga mokyaheka obwato. 18Neryo enyũma w'ekiro kiguma ekihunga mokyatugusanga kutsibu, neryo mobatsũka erigusa ebindu ebyabya omo bwato by'omo ngetsi. 19Nĩkwa enyũma w'ebiro bisatu mobagusa esyongimba sy'obwato sy'omo ngetsi omo byala byabo. 20Kandi motutalangira eryuba kutse esyongũnũnũ omo biro bingi, n'ekihunga kinene ĩkĩkĩnatũkũna-kũna, motwabula amaha w'erĩlamĩbwa. 21Neryo babere babitsira akalyo ko biro bingi, Paũlo mwahangana omo katĩkatĩ kabo ati, Ĩnywe balume! Kumbe mwalikwama erihana lyage, kandi kumbe sĩmwetalũa eKrete, nga simwetabana eriagalwa erĩ, n'eritala ly'ebindu. 22Nĩkwa lino ngabagonga-gonga nyiti muhande emitima! Sihali mundu oyo wasyakwa, bo n'obwato busa bo bunemwendisyahera. 23Kusangwa omo kiro kino, ye Nyamuhanga, nage indi wuwe, kandi ngamukolera, mwatuma omũlaĩka wuwe erihangana hakũhĩ nage. 24Naye mwambwira ati, Paũlo, sigubahe! Litolere iwahangana embere sya Kaĩsarĩ. Kandi lebaya, Nyamuhanga abirikuha abandu bosĩ abakagenda haguma nawe omo bwato. 25Neryo ĩnywe balume, muhande emitima yenyũ! Kusangwa nyĩkĩrĩrye Nyamuhanga, ko binemwendisyabya bitya ngoko indiabwirawa. 26Nĩkwa twasyaguswa oko kitsira kiguma. 27Nĩkwa omugulu ekiro ky'erĩkũmĩ n'ebini kyabere kyabĩhĩka, twabere tunemuhekwa litya-litya omo ngetsi ye Ardĩa, omo katĩ-kanene, abasokya b'obwato mobaganĩrya nga bamabĩhĩka hakũhĩ n'ekitaka. 28Neryo mobakĩmya olulengero l'omo magetsi, mobabana ekitaka kiri metere makũmĩ ani omwisi. Enyũma w'aho hake mobaswalenga magetsi, mobabana emetere makũmĩ asatu. 29Nĩkwa mobubaha eriguswa oko mabwe, neryo mobagusa esyongomo ĩnĩ sy'ekyuma sy'enyũma w'obwato, neryo mobasaba bati bukye. 30Nĩkwa abasokya mobalenga eritibita erĩlũa omo bwato. Neryo mobakĩmĩrya akato kake k'omo ngetsi, nga bakasonda erĩhĩra esyongomo embere w'obwato. 31Nĩkwa Paũlo mwabwira abasĩrĩkanĩ n'omukulu w'erĩgana ly'abasĩrĩkanĩ ati, Abasokya aba bamatĩndasĩgala omo bwato, ĩnywe simwenditoka erĩlamĩbwa. 32Neryo abasĩrĩkanĩ mobatwa ebikoba by'akato kake ako nako mokalũaho. 33Neryo bwabere bwasonda erikya, Paũlo mwalembabo ati balye akalyo, ati, Mũnabwĩre ni kiro ky'erĩkũmĩ n'ebini ĩmũkategaya n'eritsira akalyo, isimwetalyakĩ. 34Neryo ngabalemba-lemba mulye akalyo, kusangwa kakandibaganula. Sihali n'oluywiri n'oluguma l'oko mitwe yenyũ olukandihera. 35Neryo abere abĩbũga atya, Paũlo mwĩmya obundu, mwaha Nyamuhanga ewasĩngya emuliro w'abandu bosĩ, neryo mwatsũtsangabo, mwatsũka erirya. 36Neryo abosĩ mobasĩkya omutima, mobalya akalyo. 37Ĩtwe bosĩ ko twabya omo bwato, twabya bandu magana abiri n'amakũmĩ alinda n'endatu (276). 38Neryo babere babĩũgũta, mobangũhya obwato, bakagusa engano y'omo ngetsi. 39Neryo bwabere bwakya, mobataminya ekihugo ekyo, nĩkwa mobalangira obwerere bw'ekiharo ky'omusege, neryo mobasonda eritwala obwato b'oko musege oyo, kyamatokekana. 40Neryo mobagusa esyongomo esyo, mobasĩgasyo omo ngetsi. Kandi mobakũndũla ebikoba ebikaboha omuti owakabindula obwato. Kandi mobasumba olukimba olw'emuliro w'obwato, neryo erihunga molyalolyabo oko musege. 41Nĩkwa erĩhĩka omo masanga-sangano w'amagetsi, mobalolya obwato b'oko kitaka. Kandi omutwe w'obwato mwahatira, mwataswatoka erigenda, nĩkwa obwato mobwatsũka erisatangika enyũma busana n'amaka w'ebisunda by'engetsi. 42Neryo abasĩrĩkanĩ mobayisunasuna erĩĩta bandu b'omũlĩkĩ, sihabye oyukatsiha n'eritswa. 43Nĩkwa omukulu w'abasĩrĩkanĩ erĩgana, iniakasonda erĩlamya Paũlo, mwakakĩryabo erĩĩtabo, neryo mwahanabo ati abasĩ eritsiha batsũke eriyigusa omo magetsi, bahĩke oko kitaka. 44Kandi ati abandi bakwamebo oko bisayi, n'abandi oko bihande-bihande by'obwato. Neryo abosĩ mobabala, mobahĩka oko kitaka ko ndeke.

will be added

X\