EMĨBĨRĨ Y'ABAKWENDA 26

1Neryo Agrĩpa mwabwira Paũlo ati, Unawite ehamũlĩ y'eritonda ebyawe. Neryo Paũlo mwasumba ebyala biwe, mwatsũka eritonda ebiwe ati, 2Uwe mwami Agrĩpa! Ngwite embanga, kusangwa mũnabwĩre ngatonda ebyage embere syawe, busana n'emyatsi yosĩ eyo Bayũda bakanyĩhandĩkĩrĩraya. 3Kandi kusangwa nawe ũnasĩ ndeke emitsye yosĩ n'obuhaka bw'Abayũda. Neryo ngakusaba nyiti, Unyihulikirire, butsira erĩyĩhanĩa. 4Kandi Abayũda bosĩ banasĩ emigendere yage erĩtsũka omo bwana bwage. Banasĩ ngoko nabirisiba emyaka yosĩ omo kihanda kyage, kandi eYerũsalema nibya. 5Kusangwa banyasĩ oko biro bingi, kumbe banzĩre erĩbũga, ngoko nabya Mũfarĩsayo omo mitsye ĩkalĩre y'ekisomo kyetu ng'Omũfarĩsayo. 6Na lino nyimene oko lubanza busana n'amaha w'endagane eyo Nyamuhanga alaga abotata-kulu wetu. 7Erilaga eryo ebihanda byetu erĩkũmĩ n'ebibiri, bakayiketera, omugulu bakakolera Nyamuhanga yo kutsibu omo kiro n'omo musibo. Uwe Mwami! Busana n'amaha aya, ngahandĩkĩrĩrĩbawa n'Abayũda. 8Busana nakĩ mũkaganĩraya muti lĩkalĩre Nyamuhanga erĩlũbũkya abaholĩ kwehĩ? 9Nage naganĩraya nyiti, ritolere inakola emyatsi mingi eyikalwa n'erĩna lya Yesu w'eNazaretĩ. 10Monakola nyitya eYerũsalema. Monabana ehamũlĩ oko bahererĩ bakulu eriboha bandu ba Nyamuhanga omo mũlĩkĩ, kandi omugulu bĩtawa monalĩga. 11Engendo nyingi monasuyirabo omo manyũmba w'erĩhĩndanamo gosĩ, kandi monalenga erĩkũnabo eritsuma ekisomo kyabo. Kandi monahitana kubo ko kutsibu, monakwamirirabo erĩhĩka oko mĩyĩ y'ehali. 12Omugulu nabya ngakola nyitya, monaya eDamasĩkĩ inyinawite ehamũlĩ n'eritumwa ly'abahererĩ bakulu. 13Neryo omw'itungi, uwe mwami, monalangira omo nzira ekyakakala kĩkalũa elubula, ekĩkakangabasanaya kwilaba, eryuba, ekĩkakoleraya n'erĩnyĩtĩmbako, n'abandu abo nabya nabo oko lugendo. 14Neryo ĩtwe bosĩ twabere twabiwa oko kitaka, monowa omulenge akabũga nage, omo mũbũge w'Abaebrania ati, Saũlo, Saũlo, busana nakĩ ũkanyendereraya kwehĩ? Lĩkalĩre uk'uwe erilasa oko migera eyĩkakũna ende. 15Nage monabũga nyiti, Mukama, uwendi kwehĩ? Neryo Omukama mwabũga ati, Indi Yesu oyo ũkendereraya. 16Nĩkwa, hangana oko bisando byawe. Nabirikubutukira busana n'omwatsi w'erĩkũhĩra mo mũkolĩ n'omũtũlĩ w'emyatsi eyo wabirilolako, n'emyatsi eyo nasyakũbũtũkĩrya. 17Nasyakũlamya oko bandu b'Abayũda, n'abandu b'Ebihanda, abo ngakutumako. 18Ũkandĩsyalĩbũla ameso wabo, ibatoka eribinduka erĩlũa omo mwĩrĩmya n'eribindukira ekyakakala, n'eribinduka erĩlũa oko butabale bw'eSatanĩ n'eribindukira Nyamuhanga. Neryo busana n'erĩnyĩkĩrĩrya babane eribuyirwa ly'ebibi, kandi babane omwanya omo katĩkatĩ k'abandu abo Nyamuhanga abiriyisoga, n'abo abirihigula. 19Neryo, Mwami Agrĩpa, mondagana erĩowa erilota eryo ly'esyonzolĩ sy'elubula. 20Nĩkwa monatsũka erĩkangĩrĩrya bandu b'eDamasĩkĩ, n'abandu b'eYerũsalema, n'omo kihugo kyosĩ ky'eYũdea, n'oko Bihanda, nyiti babindule emitima yabo balũe kw'ebibi, babindukire Nyamuhanga, kandi bakole emĩbĩrĩ eyo eyĩkakangaya eribinduka lyabo. 21Busana n'omwatsi oyũ Abayũda mobanyihamba omo Hekalũ, mobalenga erĩnyĩta. 22Neryo kusangwa Nyamuhanga mwanyĩwatĩkya, nyimene erĩhĩka mũnabwĩre erĩtũlago oko bagunda n'oko bakulu. Ebyo ngabũga go n'omwatsi ogo abamĩnyererĩ na Musa babũga bati akandisyabererera. 23Bati, Kristo asyagalwa, kandi busana n'erĩlũbũka liwe oko baholĩ, asyabya ow'erĩmbere w'erĩtũla omwatsi w'ekyakakala ky'erilama oko bandu b'Abayũda, n'oko bandu b'Ebihanda. 24Neryo Paũlo abere akatonda ebiwe by'atya, Festo mwabũga n'omulenge munene ati, Paũlo, uli kw'ĩsĩre! Amenge wawe manene abirikuhindula mo mũsĩre! 25Neryo Paũlo mwamũsũbĩrya ati, Uwe Festo Mubuya, sindi kw'ĩsĩre! Ebĩnywa ngabũga, ni by'ekwenene, si by'erĩsĩre. 26Kusangwa omwami anasĩ emyatsi eyĩ, kandi ngabũga naye butsira eriubaha, kusangwa nabiriminya ndeke kw'anasĩ oko myatsi yosĩ eyĩ, kusangwa ebĩ mobitetakolwa omo bũbĩso-bĩso. 27Uwe Mwami Agrĩpa wamĩkĩrĩrya abamĩnyererĩ kwehĩ? Nyĩnasĩ ko wĩkĩrĩryebo. 28Neryo Agrĩpa mwabũga na Paũlo ati, Oko katambĩ kake kano uti wasyanyibindula eribya Mukristo! 29Neryo Paũlo mwabũga ati, Kumbe omo ndambĩ nge kutse omo ndambĩ nyiri, ngasaba Nyamuhanga nyiti kumbe uwe, n'abandi bosĩ abakanyihulikirira mũnabwĩre, kumbe babye ngoko nyiri, nĩkwa butsira amahulula aya. 30Neryo omwami, n'omũtabalĩ mukulu, na Berenĩke, n'ababya bĩkere haguma nabo, mobahangana. 31Neryo babere babigenda elutambi, mobatsũka erĩkanĩa haguma bati, Omundu oyũ sialitakola ekyangamwĩtĩsya, kutse eribohwa omo mũlĩkĩ. 32Neryo Agrĩpa mwabũga na Festo ati, Omundu oyũ angabohwerwe, kumbe ataliabũga ati angatswerwa na Kaĩsarĩ.

will be added

X\