EMĨBĨRĨ Y'ABAKWENDA 25

1Neryo Festo mwahĩka omo kihugo ekyo, neryo enyũma w'ebiro bisatu mwalũa eKaĩsarĩa mwaya eYerũsalema. 2Nĩkwa abahererĩ bakulu n'abasondolĩ b'Abayũda mobahandikirira Paũlo. Kandi mobahatikana Festo, 3bati awatĩkayebo erireta Paũlo y'eYerũsalema, ibamabimulamba erĩmwĩtĩra omo nzira. 4Neryo Festo mwasũbĩryabo ati, Paũlo akateyĩbawa eKaĩsarĩa, nage ngayayo lũba. 5Kandi ati, Abandu bakulu omo katĩkatĩ kenyũ bayeyo haguma nage eKaĩsarĩa, neryo ibahandikirira omundu oyo, amabya ali kw'ebibi. 6Neryo Festo abere abisibaho omo katĩkatĩ kabo ebiro munani kutse ĩkũmĩ, mwandagalira eKaĩsarĩa. Neryo engyakya w'aho mwĩkala oko kĩtũmbĩ kiwe omo nyũmba y'olubanza, mwahamula ati Paũlo aletawe. 7Neryo Paũlo abere ahĩka, Abayũda abalũa eYerũsalema mobamũtĩmbako, ĩbakamũhandĩkĩrĩraya emyatsi mingi eyo batetoka erĩsĩsya. 8Nĩkwa Paũlo mwatonda ebiwe ati, Sĩndĩtahalya oko Migambo y'Abayũda, kutse oko Hekalũ, kutse uku Kaĩsarĩ. 9Nĩkwa Festo, iniakasonda erĩtsemesya Bayũda bo ndeke, mwabũga na Paũlo ati, Wamalĩga eriya eYerũsalema n'eritswerwa embere syage eyo busana n'ebyo bakakuhandikirira ebĩ kwehĩ? 10Neryo Paũlo mwabũga ati, Nyimene embere w'enyũmba y'olubanza ya Kaĩsarĩ, aho nyitolere eritswerwa. Sinditakola Abayũda bo nabi, ngoko ũnasĩ ndeke. 11Namabya indi mukola-nabi, kutse namabya nabirikola ekyangaleka inahola, sindigana erihola. Nĩkwa hate kindu ky'ekwenene omo ebyo bakanyihandikirirako, sihali mundu wanganyihotera kubo. Ngabũlaya eriya embere sya Kaĩsarĩ. 12Neryo Festo abere abĩkanĩa haguma n'abandu b'erĩbũgĩro liwe, mwasũbĩrya ati, Ũkabũlaya eriya embere sya Kaĩsarĩ, ewa Kaĩsarĩ yo wanasyaya. 13Neryo enyũma w'ebindi biro, Omwami Agrĩpa na Berenĩke mobahĩka eKaĩsarĩa erĩbũkya Festo. 14Neryo babere bakasibayo biro bingi, Festo mwakanĩrya Omwami Agrĩpa omwatsi wa Paũlo ati, Felĩkĩ mwasĩga omundu muguma w'omũlĩkĩ. 15Neryo omugulu nabya eYerũsalema, abahererĩ bakulu n'abakulu b'Abayũda mobamũhandĩkĩrĩrya, bati nyimutswere akwe. 16Nĩkwa monasũbĩryabo nyiti si mitsye y'Abaroma erihotera omundu ate ahĩka emuliro w'abahandĩkĩrĩrĩ buwe obũsũ n'obũsũ, n'eribana omwanya w'erĩbũga ebiwe busana n'omwatsi ogo bakamuhandikirirako. 17Neryo babere bahĩndana hano, mondalindirira, nĩkwa engyakya monĩkala oko kĩtũmbĩ kyage omo nyũmba y'olubanza, neryo monahamula, nyiti omundu oyo aletawe. 18Neryo omugulu abahandĩkĩrĩrĩ bahangana, mobatamuhandikirira oko bibi ebyo naganĩraya. 19Nĩkwa mobanegena na Paũlo omo myatsi y'ekisomo kyabo, n'omo myatsi y'omundu muguma, ye Yesu oyo wahola. Nĩkwa Paũlo ati aneho. 20Nĩkwa monabula aho nangasonda emyatsi eyĩ, nĩkwa monabũlya Paũlo ng'anzĩre eriya eYerũsalema n'eriyasamba busana n'emyatsi eyĩ. 21Nĩkwa Paũlo abere abũlya ati atswerawe na Kaĩsarĩ omo myatsi eyĩ, monahana nyiti ateyĩbawe erĩhĩka aho nasyamutumira ewa Kaĩsarĩ. 22Neryo Agrĩpa mwabwira Festo ati, Nage nibya nyanzĩre erĩowa omundu oyũ. Festo mwasũbĩrya ati, Omo ngyakya wasyamowa. 23Neryo engyakya, Agrĩpa mwahĩka haguma na Berenĩke, omw'ikengwa ĩnene, neryo mwingira omo nyũmba eyo bakasoheramo esyombanza, iniali haguma n'abakulu b'abasĩrĩkanĩ b'eelfu, n'abakulu b'omũyĩ. Neryo Festo mwahamula ati Paũlo aletawe. 24Neryo Festo mwabũga ati, Uwe mwami Agrĩpa, n'ĩnywe bandu bosĩ abali hano haguma netu, mũnasamalĩre omundu oyũ, nĩkwa abandu bosĩ b'Abayũda b'eYerũsalema n'ab'eno, babirimutsongera n'olukanda lunene bati siabyeho kandi. 25Nĩkwa mondamubana ko mwatsi akola owangamwĩtĩsya; nĩkwa kusangwa amabũlya ati atswerawe na Kaĩsarĩ, monatwalo erimutuma eRoma. 26Nĩkwa singwite ekyo nangasakira omukama wage busana na Paũlo. Kikaleka inamuleta embere sy'ĩnywe bosĩ, n'embere syawe, uwe mwami Agrĩpa, neryo twabya twamabĩmũbũlya, inabana omwatsi ogo nangasaka. 27Kusangwa oko bũlengekanĩa bwage nyiti sĩryowene erituma omundu w'omũlĩkĩ, n'eritindahula emyatsi eyo bakamũhandĩkĩrĩraya.

will be added

X\