EMĨBĨRĨ Y'ABAKWENDA 24

1Enyũma w'ebiro bitanu, omũhererĩ mukulu oko bahererĩ bosĩ, ye Anania, mwaya eKaĩsarĩa haguma n'abandi bakulu, n'embũyĩ oyukahulawa mo Tertũlo. Neryo mobahandikirira Paũlo embere w'omũtabalĩ mukulu ye Felĩkĩ. 2Neryo babere babibirikira Paũlo, Tertũlo mwatsũka erimuhandikirira, ĩnĩakabũga n'omũtabalĩ ati, Uwe Felĩkĩ mubuya! Busana nawe tukabuyahirawa n'obuholo bunene, n'akandi busana n'erilembera lyawe, ebibi byabirikungwa, n'ebibuya byabirikolwa busana n'ekihanda ekĩ. 3Tũkasĩma omwatsi oyũ ehosĩ emigulu yosĩ, kandi tukaleta ewasĩngya. 4Nĩkwa sĩnyanzĩre erĩkũlũhya, ngakulemba-lemba ũtowe hake busana n'obubuya bwawe. 5Kusangwa twabĩrĩrebya omundu oyũ kw'ali mũtĩngĩtya, kandi nĩ mũkatĩsanĩa omo katĩkatĩ k'Abayũda omo kihugo kyosĩ, kandi nĩ mũhanganĩrĩ w'ekihanda ky'Abanazaretĩ. 6Kandi mwalenga erĩtsandya eHekalũ, neryo motwamuhamba . [Twabya twanzĩre erimutswera ng'Emigambo yetu. 7Nĩkwa Lũsĩa omukulu w'eelfu y'abasĩrĩkanĩ mwasa, mwatusagulaye n'amaka manene. 8Neryo Lũsĩa mwahamula ati abahandĩkĩrĩrĩ buwe bahĩke embere syawe.] Nawe wamamũbũlya ndeke wasyatoka eriminya emyatsi eyo tukamuhandikirira. 9N'Abayũda nabo mobamuhandikirira bati emyatsi eyo ni kwenene. 10Neryo omũtabalĩ mukulu mwakoherya Paũlo ati abũge. Neryo Paũlo mwasũbĩrya ati, Nyĩnasĩ wabiribya mũtswerĩ w'ekihanda ekĩ omo myaka mingi, neryo ngatonda ebyage ĩnyĩnatsemĩre. 11Nawe wanganatoka eriminya ngoko hamatalaba biro ĩkũmĩ na bibiri bisa omugulu naya eYerũsalema erĩyaramĩrĩayo. 12Abayũda mobatanyibana ngakama n'omundu kutse erĩtwa eyĩsesĩ omo Hekalũ, kutse omo manyũmba w'erĩhĩndanamo, kutse omo mũyĩ. 13Kandi sibangatoka erĩkũkangya kwenene emyatsi eyo bakanyihandikirira lino. 14Nĩkwa ekiguma ngakubwira nyiti, ngakolera Nyamuhanga w'aboso-kulu wetu omo Nzira y'Omukama, eyo yo bakahula mo kindi kisomo. Kandi ngĩkĩrĩraya ebyosĩ ebiri omo Migambo ya Musa, n'ebyosĩ ebĩsakĩre omo bamĩnyererĩ. 15Kandi nyiwite amaha uku Nyamuhanga, aw'abandu aba nabo bakasĩmago, ngoko hasyabya erĩlũbũka ly'abatunganene n'ababi. 16Neryo ngayitsinga eribya ebiro byosĩ n'obunya-mutima bubuya, embere sya Nyamuhanga, n'embere sy'abandu. 17Na lino enyũma w'eyindi myaka, monahĩka eYerũsalema erireta olũsũnzo busana n'ekihanda kyetu, n'erireta amahere. 18Neryo omugulu nabya ngakola nyitya mobanyeya omo Hekalũ inabiribuga emitsye y'eriera, isihali endeko kutse olukanda. 19Nĩkwa habya abandi Bayũda b'eAsĩa, nabo kumbe bangahĩka embere syawe ibanyihandikirira, bamabya bawite omwatsi ũkw'ingye. 20Kutse abandu aba nabo batũlego nga babana emĩbĩrĩ mibi omugulu nahangana embere w'Erĩbũgĩro. 21Monabũga omwatsi muguma omugulu nahangana omo katĩkatĩ kabo, nyiti, Ngaletawa oko lubanza embere syenyũ mũnabwĩre busana n'erĩlũbũka ly'abaholĩ. 22Nĩkwa Felĩkĩ, ĩnĩanasĩ ndeke omwatsi w'eNzira eyo, mwabwirabo ati, balinde, Omukulu w'abasĩrĩkanĩ elfu ye Lũsĩa, asyabya abiasa, nasyatwa olubanza lwenyũ. 23Neryo mwahana omukulu w'erĩgana ati, ategaye Paũlo, nĩkwa amuhe obwĩranda, kandi syakakĩrĩraye abĩra buwe erĩmũwatĩkya. 24Nĩkwa enyũma w'ebindi biro, Felĩkĩ mwahĩka n'omũkalĩ wuwe Mũyũda. Neryo mwatumira uku Paũlo, kandi mwamuhulikirira akabũga omwatsi w'erĩkĩrĩrya Kristo Yesu. 25Kandi omugulu Paũlo abya akakania omwatsi w'eritunganene n'ow'erĩyĩteya, n'omwatsi w'eritswera erikandisyasa, Felĩkĩ mubaha ati, Lino ukatagenda, neryo nasyabya nabibana omugulu nasyaswakubirikira. 26Kandi mwabya akahĩra amaha uku Paũlo, ati Paũlo asyamuha ekyũtũlĩro. Kyaleka iniamutumirako engendo nyingi, n'erĩkanĩa naye. 27Nĩkwa emyaka ĩbĩrĩ yabere yabilaba, Porkĩo Festo mwaya oko ngoma ya Felĩkĩ ng'omũtabalĩ. Nĩkwa Felĩkĩ mwanza erĩsĩmwa n'Abayũda, kyaleka ĩniasĩga Paũlo y'omo mũlĩkĩ.

will be added

X\