EMĨBĨRĨ Y'ABAKWENDA 23

1Neryo Paũlo mwatungerera bandu b'erĩbũgĩro bo ndeke, neryo mwabũga nabo ati, Ĩnywe balĩkyetu! Nabiribyaho embere sya Nyamuhanga erĩhĩka mũnabwĩre n'obunya-mutima bubuya. 2Neryo omũhererĩ mukulu oko bahererĩ bosĩ, ye Anania, mwahamula ababya bimene hakũhĩ naye ati baswĩraye Paũlo y'oko buno. 3Neryo Paũlo mwabũga naye ati, Nyamuhanga asyakũswĩrya, uwe lũhĩmbo lũhakabĩrye embemba! Uwe wĩkere aho erinyitswera omo Migambo, nĩkwa ukaketa Emigambo uti banyĩswĩraye! 4Nĩkwa abandu ababya bimeneho mobabũga bati, Ũkatsuma omũhererĩ mukulu oko bahererĩ bosĩ ba Nyamuhanga kwehĩ? 5Nĩkwa Paũlo mwabũga ati, Balĩkyetu sĩndwe nyasĩ kw'ali mũhererĩ mukulu oko bahererĩ bosĩ. Kusangwa kĩsakĩre kiti, Sũsyebũga ekibi busana n'omũtabalĩ w'abandu benyũ. 6Nĩkwa Paũlo abere abiminya kw'ekihande kiguma kyabya ky'Abasadũkayo n'ekindi kyabya ky'Abafarĩsayo, mwabũgĩra omw'ĩbũgĩro ati, Balĩkyetu! Ĩngye indi Mũfarĩsayo, omugala w'Abafarĩsayo. Ngaletawa oko lubanza embere sy'erĩbũgĩro busana n'amaha w'erĩlũbũka ly'abaholĩ! 7Neryo abere abĩbũga atya, mohabya erinegena omo katĩkatĩ k'Abafarĩsayo n'Abasadũkayo, n'endeko moyagabana. 8Kusangwa Abasadũkayo bati, Sihali erĩlũbũka, kandi sihali omũlaĩka, kutse sihali ekĩrĩmũ; nĩkwa Abafarĩsayo bakalĩga ebyosĩ. 9Neryo mohabya obogo bunene, n'abandi bakangĩrĩrya b'Emigambo b'ekihanda ky'Abafarĩsayo mobahangana mobakuba obuhaka bo kutsibu bati, Sitwetabana oko mundu oyũ kw'ekibi. Kyanganabya ĩnĩ kĩrĩmũ kutse omũlaĩka akabũga naye kwehĩ? 10Neryo erinegena lĩnene molyatsũka, nĩkwa omukulu w'abasĩrĩkanĩ mubaha ati bakanditulanga Paũlo mo bihande-bihande, neryo mwahana abasĩrĩkanĩ ati bandagalireho basagulebo ye Paũlo n'amaka omo byala byabo, bamulete omo nyũmba y'abasĩrĩkanĩ. 11Oko kiro ekĩkwamĩre ekyo, Omukama mwahangana hakũhĩ na Paũlo ati, Uhande omutima! Wabĩrĩtũla omwatsi wage w'eYerũsalema, litya litolere ĩwatũla omwatsi wage w'eRoma nibya. 12Neryo bwabere bwabikya, Abayũda mobamuyira embĩta. Mobayisema bati sibendirya kutse erĩpũlya bate bĩta Paũlo. 13Abandu abaya embĩta eyĩ babya bangi kwilaba makũmĩ ani. 14Neryo mobaya oko bahererĩ bakulu n'abakulu bati, Twabiriyisema erĩtendĩgerya akalyo tute twĩta Paũlo. 15Neryo ĩnywe haguma n'ab'erĩbũgĩro mubwire omukulu w'abasĩrĩkanĩ elfu muti abaletere Paũlo, ngoko mukasonda eriminya ndeke-ndeke omwatsi wuwe. Nĩkwa ĩtwe tũsĩkĩre erĩmwĩta ate ahĩka na hano. 16Nĩkwa omũhwa wa Paũlo mowa embĩta y'erimulamba, neryo mwasa, mwingira omo nyũmba y'abasĩrĩkanĩ, mwabwira Paũlo. 17Nĩkwa Paũlo mwabirikira omukulu w'erĩgana, mwamubwira ati, Utwale omũlwana oyũ oko mukulu w'eelfu, kusangwa awite eky'erimubwira. 18Neryo omukulu oyo mwamutwala oko mukulu w'eelfu mwabũga ati, Paũlo, omundu w'omũlĩkĩ, mwakanyibirikira ati, nyirete, omũlwana oyũ y'uk'uwe kusangwa awite eky'erikubwira. 19Neryo omukulu w'eelfu mwamuwata oko byala n'erimutwala omo ngonde, mwamũbũlya omo bũbĩso-bĩso, ati, Ni mwatsi wahi ukasonda erinyibwira kwehĩ? 20Neryo mwabũga ati, Abayũda babirihanana bati bakakũbũlaya ũsyendagalaya ye Paũlo omo ngyakya okw'ĩbũgĩro ng'ukasonda erĩbũlya eyindi myatsi yiwe. 21Nĩkwa sũlĩgĩrebo, kusangwa abalume bangi kwilaba makũmĩ ani bakamulambira omo nzira. Nabo babĩrĩlahĩrya bati sibendirya kutse erĩpũlya bate bĩta Paũlo. Na lino babĩrĩyĩtegekanĩa eririnda endagane yawe. 22Neryo omukulu w'eelfu mwaleka omũlwana erigenda abimubwira ati, Subwire mundu n'omuguma ko wabirinyibwira emyatsi eyĩ. 23Neryo omukulu w'eelfu oyo Mwabirikira abakulu babiri b'amagana, mwabwirabo ati, Mũtegekanaye abasĩrĩkanĩ magana abiri, n'abandu b'esyosabayĩrĩ makũmĩ alinda, n'abandu b'amatũmo magana abiri, babye ĩbabĩrĩyĩtegekanĩa oko saa ĩsatu sy'ekiro. 24Kandi mubane esyosabayĩrĩ busana na Paũlo erimutwala ndeke oko mũtabalĩ Felĩkĩ. 25Neryo mwasaka ebarua, ati, 26Ĩngye Klaũdĩo Lũsĩa, ngakutumira obuholo, uwe Mũtabalĩ mukulu mubuya, Felĩkĩ. 27Abayũda mobahamba omundu oyũ ibakasonda erĩmwĩta. Nage monowa kw'ali Muroma, neryo monahĩkaho n'abasĩrĩkanĩ erĩmũlamya. 28Kandi monasonda eriminya ekyaleka ĩbamũhandĩkĩrĩrya, monamuleta okw'ĩbũgĩro lyabo. 29Neryo monabana ĩbakamũhandĩkĩrĩraya busana n'emyatsi y'Emigambo yabo, isibawite ekyangamwĩtĩsya, kutse isibawite ekyangamũbohesya. 30Kandi namabibwirwa kw'Abayũda babiriya embĩta busana n'omundu oyũ, namakutumiraye lũba. Nĩkwa namabwira abakamũhandĩkĩrĩraya nyiti, bamuhandikirire embere syawe. 31Neryo abasĩrĩkanĩ mobakola ngoko babwirawa. Mobatwala Paũlo y'omo kiro oko Antĩpatĩrĩ. 32Neryo engyakya abasĩrĩkanĩ mobasuba omo manyũmba wabo, ĩbakasĩga bandu b'esyosabayĩrĩ eritwala Paũlo eKaĩsarĩa. 33Neryo babere babĩhĩka eKaĩsarĩa, mobaha omũtabalĩ mukulu y'ebarua, kandi mobahĩra Paũlo embere siwe. 34Omũtabalĩ mukulu oyo mwasoma ebarua, neryo mwabũlya Paũlo nga ni w'ekihugo kyahi, neryo mwaminya kw'ali w'ekihugo ky'eKĩlĩkĩa. 35Neryo mwabũga ati, Nasyakuhulikirira abahandĩkĩrĩrĩ bawe bahĩka. Neryo mwahana ati Paũlo ateyĩbawe omo kikali kya Herode.

will be added

X\