EMĨBĨRĨ Y'ABAKWENDA 22

1Ĩnywe balĩkyetu, n'abotata, muhulikirire, ngatonda ebyage embere syenyũ! 2Nabo babere bakamuhulikirira akabũga nabo omo Kiebrania, mobabya bũkũtũkũtũ, neryo Paũlo mwaswabũga ati, 3Ĩngye indi Mũyũda, nabutirawa eTarso y'eKĩlĩkĩa, nĩkwa nakulira omo mũyĩ oyũ w'eYerũsalema. Nakangĩrĩrĩbawa na Gamalĩelĩ, kandi nakangĩrĩrĩbawa erikwama Emigambo y'aboso-kulu wetu, ĩnyĩkwĩre omũhwa w'erikolera Nyamuhanga, ngoko ĩnywe bosĩ muli nago mũnabwĩre. 4Monendererya n'erĩĩta abakwama Enziray'Omukama eyo, eriboha abalume n'abakalĩ, n'erĩhĩrabo omo manyũmba w'omũlĩkĩ. 5Omũhererĩ mukulu oko bahererĩ bosĩ, n'erĩbũgĩro lyosĩ ly'abakulu bangarũlago batya nibya. Mobamba esyobarua oko balĩkyetu, kandi monahongoka eriya eDamasĩkĩ erireta abaliyo b'eYerũsalema ĩbanabohĩre, busana n'erisuyirabo. 6Neryo omugulu nabya omo lugendo lwage olo hakũhĩ n'eDamasĩkĩ nga saa sĩta, neryo-neryo ekyakakala kĩkalĩre mokyanyĩkolerya ehosi kĩkalũa elubula. 7Nage monawa oko kitaka, monowa omulenge akabũga nage ati, Saũlo, Saũlo! Busana nakĩ ũkanyendereraya kwehĩ? 8Nage monasũbĩrya nyiti, Uwendi kwehĩ Mukama? Naye mwambwira ati, Ĩngye indi Yesu Omũnazaretĩ, oyo ũkendereraya. 9Abandu ababya haguma nage mobalangira ekyakakala ekyo kwenene, nĩkwa mobataminya omulenge w'oyo wabya akabũga nage. 10Nage monabũlya nyiti, Mukama, nyiyire nyiti kwehĩ? Omukama mwambwira ati, Hangana, uye eDamasĩkĩ, n'eyo wasyabwirwa ebyosĩ ebyo Nyamuhanga abirihamula ebyo wangakola. 11Nabya ndĩmatĩme busana n'erĩkangabasanĩa ly'ekyakakala ekyo, neryo ababya haguma nage mobanyiwata oko byala erinyisondola erĩhĩka eDamasĩkĩ. 12Neryo habya mundu muguma yo Anania, oyo wabya mundu w'ekisomo, kandi abya akakenga Emigambo yetu, kandi iniakahulawa ndeke n'Abayũda bosĩ ababya bĩkere eDamasĩkĩ. 13Iye mwambĩkako, mwimana hakũhĩ nage, mwambwira ati, Saũlo, mũlĩkyetu, ubane erilangira lyawe! Oko saa eyo nyisa-nyisa monasamalira endata ngamulolako. 14Neryo Anania mwabũga ati, Nyamuhanga w'aboso-kulu wetu abiriyisogawe eriminya erisonda liwe, n'erilangira Oyutunganene, n'erĩmowa akabũga n'omulenge wuwe. 15Kusangwa wasyabya mũlangĩrĩ busana naye, eribwira abandu bosĩ ebyo wabirilangira n'ebyo wabĩrĩowa. 16Na lino, ukalinda busana nakĩ kwehĩ? Hangana, ũbatĩsĩbawe, kandi ulakire erĩna liwe, ebibi byawe byerĩbawe. 17Neryo monasuba eYerũsalema, kandi nabere ngasabira omo Hekalũ, monalota esyonzolĩ. 18Kandi monalangira Omukama akabũga nage ati, Wanguhe, ũlũe eYerũsalema yo lũba, kusangwa bandu sĩbendĩrĩga ũkatũla omwatsi busana nage. 19Nage monasũbĩrya nyiti, Mukama, banasĩ ndeke ngoko nabya ngagenda omo manyũmba w'erĩhĩndanamo n'erĩswĩrya abakwĩkĩrĩraya n'erĩhĩrabo omo mũlĩkĩ. 20Kandi omugulu bĩta omũlangĩrĩ wawe ye Setefano, nabya nyimeneho n'erĩrĩga oluholo luwe, nabya ngateya esyongimba sy'abamwĩta. 21Neryo Omukama mwabũga nage ati, Ugende! Kusangwa nasyakutuma ehali oko Bihanda. 22Nĩkwa bandu mobamuhulikirira erĩhĩka oko kĩnywa ekĩ, neryo mobasumba emirenge yabo bati, Omundu ng'oyũ alũe omo kihugo, kusangwa siatolere akabyaho! 23Kandi mobabũya olukanda n'erĩlũsya esyongimba syabo n'erigusanga olũtũtũ omo kyanya. 24Neryo omukulu w'abasĩrĩkanĩ elfu mwahana ati, Paũlo aletawe omo nyũmba y'abasĩrĩkanĩ, kandi mwahana ati aswĩrĩbawe eriminya ekikaleka Abayũda ĩbamũta obogo. 25Nĩkwa babere babimuboha omo bikoba bati bakamũswĩraya, Paũlo mwabwira omukulu w'erĩgana oyo wabya akahanganaho, ati, Linatolere omo Migambo erĩswĩrya omundu Muroma isialiatonda n'eritswerwa olubanza kwehĩ? 26Neryo omukulu w'abasĩrĩkanĩ erĩgana abere owa omwatsi oyo, mwayabwira omukulu w'amaelfu ati, Ukasonda erikolakĩ kwehĩ? Omundu oyũ ni Muroma! 27Neryo omukulu w'amaelfu mwasa mwabũga na Paũlo ati, Umbwire, uli Muroma kwehĩ? Paũlo mwasũbĩrya ati, Inga. 28Neryo omukulu w'eelfu oyo mwabũga ati, Nage nagula eribya Muroma omo bũgũlĩ bunene. Nĩkwa Paũlo mwabũga ati, Ĩngye nabutawa mo Muroma. 29Neryo abandu abasonda erirenga uku Paũlo, mobamũlwĩka lũba, n'omukulu w'eelfu mubaha omugulu aminya Paũlo kw'ali Muroma, kusangwa abya ĩnĩabĩrĩmũhĩra omo mahulula. 30Nĩkwa engyakya, omukulu w'abasĩrĩkanĩ oyo mwasonda eriminya ndeke Abayũda nga bakahandĩkĩrĩraya Paũlo yokĩ. Neryo mwamubohola, kandi mwahamula abahererĩ bakulu n'ab'erĩbũgĩro lyosĩ ati bahĩndane. Neryo mwaleta Paũlo y'embere syabo.

will be added

X\