EMĨBĨRĨ Y'ABAKWENDA 21

1Neryo twabere twabĩlũa kubo, motwagenda omo bwato, motwasokera omo nzira itunganene eriya eKosĩ, n'engyakya motwahĩka eRodo, n'erĩlũa eyo motwahĩka ePatara. 2Neryo motwabana obwato obukaya eFoĩnĩkĩ, neryo motwaya mubo, motwagenda. 3Neryo twabere twabĩhĩka ah'obulangiriro bw'ekitsira ky'eKĩpũro, motwasĩgakyo oko luhande lw'amalembe, motwalola eSũrĩa. Kandi eTĩro motwakĩma omo bwato, kusangwa aho habya iho bakalũsĩraya ebindu by'omo bwato. 4Nĩkwa motweyaho abandi biga, motwĩkala nabo eyenga nguma. Nabo mobabwira Paũlo omo bũtokĩ bw'Omũlĩmũ bati siaye eYerũsalema. 5Neryo ebiro byetu haguma nabo byabere byabihwa, motwalũayo, motwaya oko lugendo lwetu. Abosĩ haguma n'abakalĩ babo n'abana mobatũkwamanĩsya ekyaswa ky'omũyĩ. Neryo twabere twabĩkũkama oko na mũsĩke w'engetsi, motwasaba, motwahana obuholo. 6Neryo motwingira omo bwato, nabo mobasuba ewabo. 7Neryo motwayitsingira olugendo lwetu. Erĩlũa eTĩro motwahĩka eTolemaĩ, neryo twabere twabĩkerya abalĩkyetu, motwĩkala nabo kiro kiguma. 8N'engyakya motwalũa eyo, motwahĩka eKaĩsarĩ. N'eyo motwingira omo nyũmba ya Fĩlĩpo, omũkangĩrĩrya w'Engulu Yowene, motwĩkala haguma naye. Fĩlĩpo abya muguma g'oko balinda abo abayisogawa eYerũsalema. 9Kandi Fĩlĩpo oyũ abya awite abali buwe bani abatahĩkĩbwe, ababya bamĩnyererĩ. 10Neryo twabere tũnĩkereyo biro bingi, omũmĩnyererĩ muguma oyukahulawa mo Agabo mwatũhĩkako, akalũa eYũdea. 11Neryo Agabo mwĩmya omukoba wa Paũlo, mwaboha ebisando n'ebyala biwe ĩyowene, ati, Omũlĩmũ Abũyĩrĩre ati, Abayũda b'eYerũsalema basyaboha omwenye omukoba oyũ yo batya, n'erimuhotera omo byala by'Ebihanda. 12Neryo twabere twabĩowa ebĩnya ebĩ, ĩtwe n'abandu baho motwamulemba-lemba tuti siahetukire eYerũsalema. 13Neryo Paũlo mwasũbĩrya ati, Mũkakolakĩ eririra, n'erĩhahũkya omutima wage kwehĩ? Kusangwa nyĩsĩkĩre eribohwa eYerũsalema n'erihola busana n'erĩna ly'Omukama Yesu. 14Netu motwataluka erimubindula, motwayibera bũkũtũ tuti, Erisonda ly'Omukama likolawe. 15Nĩkwa enyũma w'emyatsi eyĩ motwayĩtegekanĩa, motwahongoka omo lugendo lw'eriya eYerũsalema. 16Kandi abandi b'oko biga b'eKaĩsarĩa mobagendanĩa netu, bakatutwala oko nyũmba ya Nasonĩ w'eKĩpũro. Abya mwiga oyo wĩkĩrĩrye biro bingi, itukandigotsera omuwe. 17Twabere twahĩka eYerũsalema, abalĩkyetu mobatũkokya n'obutseme. 18Kandi engyakya Paũlo mwagenda haguma netu ewa Yakobo, n'abakulu bosĩ b'ekanĩsa ibanemo. 19Neryo Paũlo abere abĩbũkyabo, mwatsũka erĩkanĩryabo emyatsi yosĩ mo muguma muguma eyo Nyamuhanga akola omo katĩkatĩ k'Ebihanda omo mũbĩrĩ wuwe. 20Neryo babere bowabyo, mobapipa Nyamuhanga. Mobabwira Paũlo bati, Mũlĩkyetu wamalangira amaelfu mangi w'Abayũda ababĩrĩkĩrĩrya, kandi abosĩ bakwamĩre Emigambo yo kutsibu. 21Nĩkwa babiribwirwa busana nawe ambu ũkakangĩrĩraya Abayũda bosĩ abĩkere omo katĩkatĩ k'Ebihanda, uti, baleke Emigambo ya Musa, uti sĩbabanaye abana babo, kutse erikwama emitsye y'Abayũda. 22Ekyangakolwa ni kyahi kwehĩ? Kusangwa kwenene basyowa ko wabĩrĩhĩka. 23Neryo ukole omwatsi ogo tukakubwira. Tuwite hano ho bandu bani ababĩrĩlahĩrya. 24Wĩmaye abandu aba ukole emitsye y'eriera haguma nabo, kandi ulihirebo emitsye eyo, ibatoka erĩsĩsa emitwe yabo. Neryo abosĩ basyaminya ko bakakulega busa omo myatsi eyo bakabwirawa busana nawe, nĩkwa k'unemukwama ndeke Emigambo ya Musa. 25Nĩkwa busana n'Ebihanda ebyabĩrĩkĩrĩrya, motwasoha n'erisaka ebarua tuti, Baleke ebyalya ebĩtsandĩre kusangwa bikaherawa oko syosanamu, kandi baleke omusasi, kandi baleke erirya esĩswĩ esyabĩrĩnĩgwa, kandi baleke erĩsĩngĩra. 26Neryo Paũlo mwĩmya bandu abo, n'engyakya mwakola emitsye y'eriera haguma nabo. Neryo Paũlo mwingira omo Hekalũ, iniakahula ebiro ebyo ebikabuga emitsye y'eriera, erĩhĩka aho obuhere bw'obuli mundu bwasyahererwa. 27Neryo omugulu ebiro birinda byasonda erihwa, Abayũda b'eAsĩa mobalola uku Paũlo omo Hekalũ. Neryo mobakola-kolya endeko, mobahamba Paũlo. 28Mobabirikira bati, Ĩnywe balume ba Ĩsraelĩ! Mwase, mũtũwatĩkaye! Omundu yoyũ oyũkakangĩrĩraya abandu bosĩ ehosĩ, eripona bandu ba Ĩsraelĩ, n'eripona Emigambo ya Musa, n'eripona eHekalũ eyĩ. Kandi abirireta Abagĩrĩkĩ omo Hekalũ, n'erĩtsandya ahabũyĩrĩre hano. 29Kusangwa erĩmbere mobalangira Trofĩmo Omunya Efeso iniane haguma na Paũlo omo mũyĩ, neryo mobalengekanĩa ambu Paũlo mwamutwala omo Hekalũ. 30Neryo omũyĩ gosĩ mwabya m'olukanda, n'abandu mobatibitira haguma. Neryo mobatsimba Paũlo, mobamukurira eyĩhya w'eHekalũ. Neryo-neryo esyonyũyĩ sy'eHekalũ mobakingasyo. 31Neryo babere basonda erĩĩta Paũlo, engulu eyĩ moyahĩka oko mukulu w'abasĩrĩkanĩ b'Abaroma, ambu eYerũsalema yabiribya m'olukanda. 32Neryo omukulu w'abasĩrĩkanĩ mwĩmya abasĩrĩkanĩ n'abakulu babo, mobatibita eyiri endeko. Neryo endeko yabere yabilangira omukulu oyo haguma n'abasĩrĩkanĩ, mobaleka erĩswĩrya Paũlo. 33Neryo omukulu w'abasĩrĩkanĩ, mwahamba Paũlo, mwahana ati abohawe omo mahulula abiri. Neryo mwabũlya ati, Oyũ ni mundu wahi, kandi ayĩrĩre ati kwehĩ? 34Nĩkwa abandi b'endeko mobabũga mwatsi muguma, n'abandi ogundi mwatsi. Neryo mwataluka eriminya eky'ekwenene, busana n'olukanda, neryo mwategeka Paũlo ati aletawe omo manyũmba w'abasĩrĩkanĩ. 35Neryo Paũlo abere abĩhĩka oko bisambiro, mwabya akahekwa n'abasĩrĩkanĩ busana n'erikala ly'endeko. 36Kusangwa endeko y'abandu yabya ikakwamabo enyũma bati, Ĩtawe! 37Neryo abasĩrĩkanĩ babere bakasonda erireta Paũlo y'omo manyũmba w'abasĩrĩkanĩ, Paũlo mwabũlya omukulu ati, Wanganalĩga inakubwira omwatsi kwehĩ? Neryo omukulu mwabũga ati, Ũnasĩ eKĩgĩrĩkĩ kwehĩ? 38Neryo suli Omunya Mĩsĩrĩ oyo watwa omwaga oko bindi biro n'erisondola abĩtĩ elfu ĩnĩ (4000), omo mbwarara kwehĩ? 39Nĩkwa Paũlo mwabũga ati, Ĩngye indi Mũyũda w'eTarso, omũyĩ w'eKĩlĩkĩa, indi ndũlanĩ y'omũyĩ mukulu, neryo ngakusaba nyiti, Umba ehamũlĩ y'erĩbũga n'abandu. 40Neryo omukulu mwamuha ehamũlĩ eyo. Neryo Paũlo mwimana oko bisambiro, mwakoherya abandu omo byala biwe. Neryo habere habibya esĩsyerere, Paũlo mwabũga nabo omo Kiebrania ati,

will be added

X\