EMĨBĨRĨ Y'ABAKWENDA 20

1Neryo olukanda olo lwabere lwabihwa, Paũlo mwabirikira abiga, neryo mwahanabo, nĩkwa abere abilagana nabo, mwahongoka akaya eMakedonĩa. 2Neryo abere abilaba omo bihugo ebyo, mwasĩkyabo emitima omo bĩnywa bingi, neryo mwahĩka omo kihugo ky'Abagĩrĩkĩ. 3Neryo Paũlo mwabya eyo yo mikera ĩsatu. Nĩkwa omugulu asonda eriya eSũrĩa omo bwato, mwaminya kw'Abayũda bakamuyira embĩta, neryo mwayĩsũnza erisubula akalaba eMakedonĩa. 4Nĩkwa Sopaterĩ, mugala wa Pĩrũ, w'eBeroya, mwagenda naye, haguma na Arĩstarĩko, na Sekũndo w'eTesalonĩka, na Gayo w'eDerbe, na Tĩmoteo, na Tĩkĩko, na Trofĩmo w'eAsĩa. 5Aba mobatsũka erĩmbere, bakatulindirira eTroa. 6Neryo motwalũa eFĩlĩpĩ omo bwato enyũma w'ebiro ebyo by'Obundu Bute mo Kĩhamya. N'enyũma w'ebiro bitanu motwahĩka kubo eTroa, n'eyo motwĩkala ebiro birinda. 7Neryo oko kiro ky'eyenga motwahĩndana oko mesa y'Omukama. Neryo Paũlo mwakangĩrĩrya bandu, neryo mwabũga bingi erĩhĩka omo katĩkanene, kusangwa abya anzĩre erĩlũaho engyakya. 8Kandi habya esyotala nyingi omo kyumba endata aho twabya tũhindene. 9Neryo habya omũlwana erĩna liwe iyo Eũtĩko oyo wabya ĩkere omo lĩdĩrĩsa mwakwa otũgotserĩ. Neryo Paũlo abere ayitsinga okw'ĩbũga, Eũtĩko mwatsinga omo tũgotsĩ neryo mwatogera ahisi akalũa omo kyumba ky'akasatu ky'endata. Mobamutelula iniabirihola. 10Nĩkwa Paũlo mwakĩmĩra ahisi mwamũnamĩrako, kandi mwamubagalira ati, simusweke kusangwa akineho. 11Neryo abere abiswahetukira endata, n'erirya oko mesa y'Omukama, Paũlo mwakanĩa nabo ndambĩ nene erĩhĩka okw'ikya, neryo mwagenda. 12Neryo mobatwala omũlwana oyo y'eka inianeho, mobakĩranĩbwa ndeke. 13Nĩkwa ĩtwe motwatangirira embere eriya omo bwato, neryo motwasokera eAsosĩ, itukasonda erĩlabainĩa Paũloy'eyo. Kusangwa abya iniabirihana atya, kusangwa asonda eriyayo omo bisando. 14Neryo Paũlo mwahĩndana netu eAsosĩ, n'eyo motwamũkokya omo bwato tukaya eMĩtĩlene. 15N'erĩlũa eMĩtĩlene omo bwato motwahĩka engyakya eyisirya w'eKĩo. Neryo engyakya motwasokera eSamosĩ. N'enyũma w'ekiro kiguma motwahĩka eMĩleto. 16Nĩkwa Paũlo mwayĩsũnza eritwanganira eEfeso omo bwato, kusangwa ĩsĩanzĩre erĩĩkala eAsĩa, iniakanguha eriya eYerũsalema erĩhĩkayo oko kiro ky'ePentekote, lyamatokekana. 17Neryo Paũlo mwabirikira abakulu b'ekanĩsa y'eEfeso ati bamwegaye. 18Neryo babere babĩmũhĩkako, mwabwirabo ati, Nenyũ mũnasĩ ngoko nabya nenyũ emigulu yosĩ erĩtsũka ekiro nahĩka eAsĩa. 19Nabya ngakolera Omukama n'erĩyĩkehya, omo mĩsonĩa, n'amalĩge ebyanyĩhĩkako busana n'esyombĩta sy'Abayũda. 20Kandi mũnasĩ mondagana erĩbatũlĩra omwatsi owabya n'endũndĩ, ĩnĩngabakangĩrĩraya embere sy'abandu, kandi omo yindi nyũmba n'omo yindi nyũmba. 21Monabwira Abayũda n'Abagĩrĩkĩ bo ndeke nyiti babindule emitima yabo baleke ebibi byabo, babindukire Nyamuhanga n'erĩkĩrĩrya Omukama wetu Yesu Kristo. 22Na lino, lebaya ngaya eYerũsalema, ingakenga Omũlĩmũ Abũyĩrĩre, ĩsĩnyasĩ ebyasyambĩkako eyo. 23Nyasĩ kiguma, nyiti, Omũlĩmũ Abũyĩrĩre akambwira ndeke ati omũlĩkĩ n'amalĩge bikanyirindirira omo buli mũyĩ. 24Nĩkwa ngaganza engebe yage nga si kindu, inatoka eribuga obukwenda bwage, n'omũbĩrĩ ogo Mukama Yesu amba erikola, eryo nĩ tũla Engulu Yowene y'olukogo lwa Nyamuhanga. 25Neryo lino, lebaya, nabirilaba omo katĩkatĩ kenyũ, ngatũla omwatsi w'obwami bwa Nyamuhanga. Nyĩnasĩ ĩnywe bosĩ simwendisyaswanyilolako kandi. 26Neryo ngabatũlĩrago mũnabwĩre nyiti, sindi ko lubanza lw'omundu n'omuguma. 27Kusangwa mondasaga erĩbatũlĩra erĩyĩsũnza lyosĩ lya Nyamuhanga. 28Mũyĩtegaye ĩnywebene, kandi mũtegaye ekĩhyo kyosĩ, ekyo Mũlĩmũ Abũyĩrĩre abiribayira eribya balangĩrĩ. Mubye balĩsya b'ekanĩsa ya Nyamuhanga eyo agula omo musasi wuwe ĩyowene-wene. 29Kusangwa nyĩnasĩ namabigenda, amakungu awakalĩre asyingira omo katĩkatĩ kenyũ, ĩsĩendĩsyabalya ekĩhyo. 30Kandi abandu basyahangana omo katĩkatĩ kenyũ, ĩbakabũga emyarsi y'amabehĩ, erikura abiga erikwamabo. 31Neryo mũtegaye, mwibuke ngoko nabakangĩrĩraya, obuli mundu omo myaka ĩsatu omw'itungi n'omo kiro, omo mĩsonĩa. 32Neryo lino ngabahĩra omo byala bya Nyamuhanga, n'omo kĩnywa ky'olukogo luwe. Iye atoke erĩbahĩmba, n'eribaha omũyĩsa ogo akabikira abandu buwe bosĩ, abo abirihigula. 33Sinditarumwa busana n'esyofranka, kutse esyamagetsi, kutse esyongimba sy'omundu. 34Ĩnywebene mũnasĩ ebyala byage ebĩ byabirikolera eby'obwaga bwage, n'obwaga bw'abandu ababya haguma nage. 35Nabĩrĩbakangya omo myatsi yosĩ eyĩ, omw'ikola lĩkalĩre ly'omũsĩndo oyũ, litolere ĩmwawatĩkya abandu bolo, kandi mwibuke ebĩnywa ebyo Mukama Yesu abũga ĩyowene-wene ati, Erĩhĩtya likaleta obutseme kwilaba erihabwa. 36Neryo Paũlo abere abĩbũga emyatsi eyĩ, mwakũkama ahisi, mwasaba nabo abosĩ, 37Neryo abosĩ mobalira n'omulenge, mobamubagalira, mobamulyatsirira. 38Kandi mobabya n'obũlĩge kutsibu busana n'ekĩnywa ekyo abwirabo ati, sibendisyaswamulolako kandi. Neryo mobamũkwamanĩsya erĩmũkolya oko bwato.

will be added

X\