EMĨBĨRĨ Y'ABAKWENDA 2

1Neryo ekiro ky'ePentekote kyabere kyahĩka, abosĩ mobabya hagumaguma. 2Neryo-neryo omulenge mwalũa elubula eribuhirira ng'erihunga erĩkalĩre, molyũsũlya enyũmba yosĩ y'aho babya bĩkere. 3Neryo mobahulukirwako ebirimi ng'eby'omuliro, ebikagabanawa oko buli mundu, mobyĩkala kubo. 4N'abosĩ mobũsũlĩbwa n'Omũlĩmũ Abũyĩrĩre, neryo mobatsũka erĩbũga omo yindi mĩbũge, ng'Omũlĩmũ kw'ahabo erĩbũga. 5Nĩkwa habya Bayũda abĩkere eYerũsalema, babya bandu b'ekisomo abalũa omo buli kihanda muna-kihugo. 6Neryo omugulu bowa omulenge oyũ, endeko moyahĩndana. Neryo mobahanga-hangya emitima kusangwa obuli mundu mowabo bakabũga omo mũbũge wuwe. 7Neryo mobatsũka erisweka n'erĩsĩsĩra bati, Kw'abosĩ abakabũga si Banya Galĩlaya kwehĩ? 8Kandi netu tũkowabo bakabũga omo mũbũge wetu ogo twabutawamo tuti kwehĩ? 9Ĩtwe tuli b'ePartĩ, n'ab'eMedĩ, n'ab'eElamũ, n'abandu b'eMesopotamia, n'eYũdea, n'eKapodokĩa; n'ePonto, n'eAsĩa, 10n'eFũrũgĩa, n'ePamfĩlĩa, n'eMĩsĩrĩ, n'ebihugo by'eLĩbĩa hakũhĩ n'eKũrene, n'ababunga b'eRoma, Abayũda, n'ab'ebihanda ababiribinduka eribya Bayũda, 11Abakrete n'Abaarabu. Nĩkwa tũkowabo bakabũga omo mĩbũge yetu emĩbĩrĩ y'amaka ya Nyamuhanga! 12Neryo mobabya bakahanga-hangya emitima, bakasweka, bakabũlanĩa bati, Kwe ni kyahi kwehĩ? 13Nĩkwa abandi mobasekererya bati, babĩrĩkũnda omo bĩnyũ bihya-bihya. 14Nĩkwa Petero mwahangana n'abandi bakwenda erĩkũmĩ n'omuguma, neryo mwatsũka erĩbũga n'endeko omo mulenge munene ati, Ĩnywe bandu b'eYũdea, nenyũ ĩnywe bosĩ abĩkere eYerũsalema, mowe ebĩnywa byage, muminye ekĩ. 15Abandu aba sĩbakũndĩre, ngoko mũkaganĩraya, kusangwa ni saa ĩsatu y'engyakya. 16Kusangwa ebĩ byo byabũgawa n'omũmĩnyererĩ Yoelĩ ati, 17Nyamuhanga ati, Ekĩ kyasyabya oko biro by'enyũma-nyũma, Nasyũtũlĩra Omũlĩmũ wage oko bandu bosĩ; Abagala benyũ n'abali benyũ basyaminyerera, N'abalwana benyũ basyalola oko syonzolĩ, N'abasyakulu benyũ basyalota esyonzolĩ. 18Nage nasyũtũlĩra Omũlĩmũ wage oko biro ebyo, Oko bagombe bage b'obulume n'ab'obũkalĩ, Nabo basyaminyerera. 19Nasyakanganĩa eby'eriswekera omo kyanya endata, N'ebĩmĩnyĩsyo muna-kihugo eyĩkwa: Omusasi, n'omuliro, n'erĩtũmba ly'omũkĩ. 20Eryuba lyasyabindulwa mo mwĩrĩmya, N'omukera iniabya ngula ng'omusasi, Embere w'erĩhĩka ly'eKiro kikulu ky'olukengerwa l'Omukama. 21Neryo, obuli mundu oyukalakira oko lĩna ly'Omwami Mukulu asyalamĩbwa. 22Ĩnywe, balume b'eĨsraelĩ! muhulikirire ebĩnywa ebĩ! Yesu w'eNazaretĩ, abya mundu oyo Nyamuhanga asĩma embere syenyũ omo bitiko-tiko, n'eby'eriswekera, n'ebĩmĩnyĩsyo ebyo Nyamuhanga akola omo byala bya Yesu omo katĩkatĩ kenyũ, ngoko mũnasĩ. 23Nyamuhanga abya asĩ, kandi mwategekanĩa ati, Yesu ahĩrawe omo byala byenyũ, kandi ĩnywe momwamwĩta, imukaleka abandu babi ibamukongomerera oko musalaba. 24Nĩkwa Nyamuhanga mwamũlũbũkya, ĩnĩamabĩlũsya amagalĩ w'oluholo, kusangwa oluholo silwangatoka erimuboha omo maka walo. 25Kusangwa Dawĩdĩ mwabũga busana na Yesu ati, Monalangira Omukama embere syage emigulu yosĩ; Kusangwa ali oko byala byage by'amali, ĩsĩnangatũndwa. 26Neryo omutima wage mwatsema, n'ebĩnywa byage bĩkayĩsyandira, Kandi omubiri wage asyabana amaha, 27Kusangwa sĩwendĩsyasĩga ekĩrĩmũ kyage omo Kũlĩmũ, Kutse siwendisyaleka Omũbũyĩrĩre wawe erilola okw'ihonda. 28Wabĩrĩnyĩmĩnyĩsya esyonzira sy'engebe, Kandi embere syawe wasyanyũsũlya n'obutseme. 29Balĩkyetu, nangababwira ndekendeke busana na tata-kulu Dawĩdĩ. Iye mwahola kandi mwatabwa, n'amahero wuwe akine haguma netu hano mũnabwĩre. 30Abya mũmĩnyererĩ, kandi abya asĩ ko Nyamuhanga amulaga endagane. Nyamuhanga mwamũlahĩrya ati akasyahĩra omundu muguma g'oko bana buwe mo mwami. 31Dawĩdĩ mwalangira ekyo Nyamuhanga akandisyakola, neryo mwahula erĩlũbũka lya Kristo ati, Sĩendĩsyasĩga ekĩrĩmũ kiwe ky'omo Kũlĩmũ, Kutse omubiri wuwe siendisyalola okw'ihonda. 32Nyamuhanga abĩrĩlũbũkya Yesu oyo oko baholĩ, netu ĩtwe bosĩ tuli balangĩrĩ b'omwatsi oyo. 33Yesu abĩrĩhamĩbwa oko byala by'amali bya Nyamuhanga, kandi abiribana uku Tata erilaga ly'Omũlĩmũ Abũyĩrĩre, n'ebyo mukalangira lino n'erĩowa nĩ lũsũnzo luwe abĩrĩtũtũlĩra. 34Kusangwa Dawĩdĩ mwatahetukira elubula, nĩkwa mwabũga ati, Omwami Mukulu mwabwira Omukama wage ati, Wĩkale oko byala byage by'amali, 35Erĩhĩka aho nasyahĩrĩra esyonzĩgũ syawe, Mo kĩtũmbĩ ky'ebisando byawe. 36Neryo abandu bosĩ ba Ĩsraelĩ baminye ndeke ngoko Nyamuhanga abiriyira Yesu oyo mwabamba oko musalaba, mo Mukama na Kristo. 37Neryo omugulu abandu bowa ebĩ, mobabya n'obũlĩge bunene, mobabwira Petero n'abandi bakwenda bati, Balĩkyetu, tuyire tuti kwehĩ? 38Petero mwabwirabo ati, Mubindule emitima yenyũ, muleke ebibi, kandi obuli mundu abatĩsĩbawe omo lĩna lya Yesu Kristo busana n'eribuyirwa ly'ebibi byenyũ, neryo mwasyabana olũsũnzo lwa Nyamuhanga yo Mũlĩmũ Abũyĩrĩre. 39Kusangwa endagane ya Nyamuhanga ni busana nenyũ n'abana benyũ na busana n'abosĩ abali ehali, abosĩ abo Mukama Nyamuhanga wetu asyabirikira. 40Neryo Petero mwatũlago omo bindi bĩnywa bingi, kandi mwahatikanabo ati, Mũyĩlamaye oko lulengo lubi olũ! 41Neryo abo, abĩkĩrĩraya ekĩnywa kiwe mobabatĩsĩbwa. Neryo oko kiro ekyo, abandu nga elfu ĩsatu (3000), mobatomekerwa oko ndeko yabo. 42Neryo mobasiba bakiga erĩkangĩrĩrya ly'abakwenda n'eribya buguma nabo. Kandi babya bakahĩka oko mesa y'Omukama n'okw'isaba. 43Neryo abakwenda mobakola eby'eriswekera n'ebitiko-tiko bingi, nĩkwa obuli mundu mwabya n'obuba. 44Neryo abĩkĩrĩraya bosĩ mobabya haguma, mobasangira ebindu byosĩ byo haguma. 45Kandi mobagũlya esyombibi syabo n'ebindu byabo, ibakasangira ebindu byosĩ ebyo n'abandi bosĩ, ng'obwaga b'obuli mundu. 46Kandi obuli kiro mobasiba bakahĩndana omo Hekalũ n'omutima muguma. Neryo mobahĩka oko mesa y'Omukama omo buli nyũmba, ibakalira ebyalya byabo haguma-guma, n'obutseme n'omutima w'erĩyĩkehya. 47Babya bakapipa Nyamuhanga n'erĩsĩmwa n'abandu bosi Kandi Omukama mwatomekera eko ndeko yabo obuli kiro abalamĩbawa.

will be added

X\