EMĨBĨRĨ Y'ABAKWENDA 19

1Neryo omugulu Apolo abya eKorĩnto, Paũlo mwalaba omo kihugo ky'endata, mwahĩka eEfeso. Neryo mweyayo abandi biga. 2Neryo mwabũlyabo ati, Ekiro mwĩkĩrĩraya, momwangirira Omũlĩmũ Abũyĩrĩre kwehĩ? Nabo mobamubwira bati, Iyihi, sĩtwetowa ko hali Omũlĩmũ Abũyĩrĩre. 3Neryo Paũlo mwabũlya ati, Mwabatĩsĩbawa omo lwahi kwehĩ? Nabo mobabũga bati, Omo lũbatĩso lwa Yoane. 4Neryo Paũlo mwabũga ati Olũbatĩso lwa Yoane lwabya busana n'abandu ababindula emitima yabo erireka ebibi byabo. Yoane iniakabwira abandu ati bĩkĩrĩraye oyo wasyasa enyũma wuwe, iye ni Yesu. 5Nĩkwa babere babĩowa ekĩ, mobabatĩsĩbwa omo lĩna ly'Omukama Yesu. 6Neryo Paũlo abere ahĩra kubo kw'ebyala biwe, Omũlĩmũ Abũyĩrĩre mwahĩka kubo, mobatsũka erĩbũga omo mĩbũge, n'eriminyerera. 7Neryo babya nga bandu ĩkũmĩ n'ababiri. 8Kandi Paũlo mwaya omo nyũmba y'erĩhindanamo, mwabũga n'abandu n'eritendiubaha omo mikera ĩsatu, ĩnĩakakanĩraya n'eribindula abandu omo mwatsi w'obwami bwa Nyamuhanga. 9Nĩkwa abandi mobakala mobagana erĩowa, ĩbakabũga nabi embere w'endeko busana n'Enzira y'Omukama. Neryo Paũlo mwalũa kubo, mwatwala abiga, ĩnĩakakanaya obuli kiro omo kalasi ka Tĩrano. 10Neryo mwakola atya omo myaka ĩbĩrĩ, kyaleka bandu bosĩ ababya bĩkere eAsĩa, Abayũda n'Abagĩrĩkĩ, ĩbowa ekĩnywa ky'Omukama. 11Nyamuhanga mwakola ebitiko-tiko bĩkalĩre omo byala bya Paũlo. 12Kandi ebitambara n'esyongimba ebyalũa oko mubiri wa Paũlo mobyatwalwa oko bakonĩ, n'esyondwala mosyalũa kubo, n'ebĩrĩmũ bibi mobyalũamo. 13Nĩkwa abandi bakũmũ b'Abayũda, abalendera ehandi n'ehandi, mobalenga eriahula erĩna ly'Omukama Yesu ukw'abo babya kw'ebĩrĩmũ bibi, bati, Ngakusema omo lina lya Yesu oyo Paũlo akatũlaganaya. 14Neryo abakola batya babya bagala balinda ba Sikewa omũhererĩ mukulu w'Abayũda. 15Neryo ekĩrĩmũ kibi ekyo mokyasũbĩryabo kiti, Nyinasĩ Yesu, kandi nyĩnasĩ Paũlo, nĩkwa ĩnywe muli bahi kwehĩ? 16Neryo omundu oyo wabya kw'ekĩrĩmũ kibi mwagulukirabo, mwakĩndabo ababiri bosĩ, mwalabyabo akagala, neryo mobatibita bakalũa omo nyũmba eyo ibali ndũmbũ ĩbakwĩre bironda. 17Kandi Abayũda bosĩ n'Abagĩrĩkĩ abĩkere eEfeso mobaminya omwatsi oyũ. Abosĩ mobakwa obuba, n'erĩna ly'Omukama Yesu molyahamĩbwa. 18Kandi abangi ba kubo abĩkĩrĩraya mobasa n'erĩkangya n'erĩhũlũkya emĩbĩrĩ yabo. 19N'abangi b'oko bakũmũ mobaleta ebitabu byabo, mobahĩsĩryabyo omo meso w'abandu bosĩ, neryo mobaganza obũgũlĩ bw'ebitabu ebyo mobabana esyofranka elfu makũmĩ atanu (50,000). 20Litya ekĩnywa ky'Omukama mokyakanyirira kutsibu n'erĩsĩngana. 21Neryo enyũma w'emyatsi eyĩ, Paũlo mwayĩsũnza omo mutima wuwe eriyalaba eMakedonĩa, n'omo kihugo ky'Abagĩrĩkĩ, n'eriya eYerũsalema, ati, Namabĩhĩka eyo, kandi litolere ĩnayalebya eRoma. 22Neryo mwatuma abawatĩkya buwe babiri, Tĩmoteo, na Erasto, eMakedonĩa, nĩkwa iye mwasĩgala eAsĩa ebindi biro. 23Neryo oko mugulu oyo, omwaga munene mwahuluka eEfeso busana n'eNzira y'Omukama. 24Kusangwa omũhesĩ muguma w'ebĩtsĩpa, erĩna liwe iyo Demetrĩo, oyo wabya akahesa emisaka y'ekĩtsĩpa ya Artemĩ y'erisabiramo. Obũhesĩ obũ bwabya bukaletera abanyima-nyima b'endũndĩ nene. 25Neryo Demetrĩo mwabirikira abanyima-nyima aba bo haguma, n'abanyima-nyima b'eyindi mĩbĩrĩ ati, Balume, mũnasĩ omũyĩsa wetu owakabanika omo mũbĩrĩ oyũ. 26Kandi mukalangira n'erĩowa ebyo Paũlo oyũ akakola, butsira hano eEfeso hasa, nĩkwa hakũhĩ n'ehosĩ eAsĩa. Kandi abiribindula bandu bangi n'erĩlolyabo ehandi, ati, esyonyamuhanga esĩkakokotĩbawa n'abandu si nyamuhanga n'ahake. 27Neryo omũbĩrĩ wetu oyũ ali omo bwĩko eriahulwa mo mũbĩrĩ mubi, kandi ehekalũ ya nyamuhanga mukulu w'obũkalĩ yo Artemĩ iyaganzwa nga buyira, na Artemĩ oyũ akaramĩbawa n'eAsĩa hosĩ, na muna-kihugo, ĩnĩalũsĩbwa oko bukulu buwe. 28Neryo omugulu endeko yowa omwatsi oyũ, mobahitana kutsibu, neryo mobabũgĩra iguma-guma bati, Artemĩ w'Abanya Efeso ni mukulu! 29N'omũyĩ gosĩ mũsũla mw'olukanda, neryo mobatibita haguma omw'ebitsange, bakakura Gayo na Arĩstarĩko, abandu b'eMakedonĩa ababya bakalendera na Paũlo. 30Kandi Paũlo mwasonda eriingira omo ndeko, nĩkwa abiga mobatalĩga akayayo. 31Kandi abandi b'eAsĩa, abĩra ba Paũlo, mobamutumirako bakamugo nga-gonga bati siaye omw'ebitsange. 32Neryo abandi mobabirikira omwatsi muguma, n'abandi ogundi mwatsi, kusangwa endeko yabya litya-litya, n'abangi ĩsĩbasĩ ekyo bakahĩndanĩra. 33Kandi abandi b'endeko mobaganĩrya bati ni Alesandũro, kusangwa Abayũda mobamũhanganĩa embere sy'abandu. Alesandũro mwakoherya omo byala ati akabũga n'endeko. 34Nĩkwa omugulu baminya kw'ali Mũyũda, abosĩ mobabũgĩra iguma-guma omo saa ĩbĩrĩ bati, Artemĩ w'Abanya Efeso ni mukulu! 35Neryo omũhandĩkĩ w'omũyĩ mwabonderya endeko eribya bũkũtũ ati, Abalume b'eEfeso! Ko ni mundu wahi oyũtasĩ ngoko mũyĩ w'eEfeso nĩ mũteya w'ehekalũ ya Artemĩ mukulu, kandi ni mũteya w'olusumba olwatoga lũkalũa elubula, kwehĩ? 36Neryo kusangwa sihali mundu oyo wangagana emyatsi eyĩ, ĩnywe mutolere imwabondera, isimwakola omwatsi go lũba-lũba. 37Ĩnywe mwabirireta bandu aba bo hano ĩsĩbetahũnga esyohekalũ, kutse sĩ batsũmĩ ba nyamuhanga wetu w'obũkalĩ. 38Neryo Demetrĩo n'abanyima-nyima abakakola haguma naye, bamabya bawite olubanza n'omundu, (hali enyũmba y'esyombanza, n'ab'ehamũlĩ baneyo, neryo bahandikirirane omo syombanza syabo. 39Nĩkwa mwamanza ogundi mwatsi, asyasoherwa omw'ĩbũgĩro eritolere. 40Kusangwa tuli omo bwĩko bw'erihandikirirwa ly'eriyisamambula omo mwatsi wa mũnabwĩre, kusangwa sihali ekikaleka olukanda olũ ilwabyaho, kandi situwite eky'erĩbũga busana n'omwaga oyũ. 41Neryo omũhandĩkĩ oyũ abere abĩbũga atya mwakũlũkya erĩhĩndana eryo.

will be added

X\