EMĨBĨRĨ Y'ABAKWENDA 18

1Enyũma w'emyatsi eyĩ Paũlo mwalũa eAtene, mwaya eKorĩnto. 2Neryo mweyayo Omũyũda muguma, erĩna liwe iyo Akwĩla, omundu w'ePonto, oyo walũa eĨtalĩa oko mugulu oyo haguma na mũkalĩwe, Pĩrĩsĩla. Kusangwa Omũtabalĩ mukulu ye Klaũdĩo abya iniabirihana ati Abayũda bosĩ balũe eRoma. Neryo Paũlo mwayabanabo, 3mwĩkala nabo, n'erikola omũbĩrĩ haguma nabo, kusangwa abosĩ babya balũkĩ b'amahema. 4Nĩkwa Paũlo abya akakanĩrya omo nyũmba y'erĩhĩndanamo omo buli Sabato, iniakalenga eribindula Abayũda n'Abagĩrĩkĩ. 5Omugulu Sila na Tĩmoteo bahĩka eMakedonĩa, Paũlo mwasiba omugulu gosĩ akatũla Engulu Yowene, ĩnĩakatũlĩrago Abayũda ati, Yesu ni Kristo. 6Nĩkwa omugulu balwa naye n'eritsuma, Paũlo mwakungutirabo esyongimba siwe ati, Omusasi wenyũ abye oko mitwe yenyũ! Sindi ko lubanza lwenyũ. Erĩtsũka lino ngaya oko Bihanda. 7Neryo mwalũa kubo, mwaya omo nyũmba y'omundu muguma oyukahulawa mo Tĩto Yũsto, oyũkaramaya Nyamuhanga, n'enyũmba yiwe yabya ĩyĩhererenĩe n'enyũmba y'erĩhĩndanamo. 8Neryo Krĩspo, omukulu w'enyũmba y'erĩhĩndanamo, mwĩkĩrĩrya Omukama, haguma n'ab'enyũmba yiwe bosĩ. Kandi Abanya Korĩnto bangi babere bowa Paũlo, mobĩkĩrĩrya, mobabatĩsĩbwa. 9Kandi Omukama mwabũga na Paũlo omo kiro omw'ilota ati, Sigubahe, nĩkwa ũbũge, subye bũkũtũ. 10Kusangwa indi haguma nawe. Sihali mundu oyo wasyakubambira, n'erikukola nabi, kandi ngwite bandu bangi omo mũyĩ oyũ. 11Neryo Paũlo mwĩkalayo mwaka muguma n'emikera ndatu, inĩakakangĩrĩraya abandu ekĩnywa kya Nyamuhanga. 12Nĩkwa omugulu Galĩo abya mũtabalĩ w'Abaroma omo kihugo ky'Abagĩrĩkĩ, Abayũda mobaya embĩta y'eribambira Paũlo n'erimutwala omo nyũmba y'olubanza. 13Abayũda abo mobabũga bati, Omundu oyũ akabindula bandu erĩramya Nyamuhanga omo mũsĩndo owate oko Migambo. 14Nĩkwa Paũlo abere akasonda eritonda, neryo Galĩo mwabwira Abayũda ati, Ĩnywe Bayũda kumbe omwatsi oyũ alwe w'erikola nabi kutse ekibi kĩkalĩre, lyangatolere inabowa. 15Nĩkwa kumbe ni mwatsi busana n'ebĩnywa n'amena omo migambo yenyũ, mũtwebyo inywebene. Sĩnangalĩga eribya mũtswerĩ w'emyatsi eyĩ! 16Neryo Galĩo mwahigabo omo nyũmba y'olubanza. 17Neryo abosĩ mobatsimba Sosĩtenĩ, omukulu w'enyũmba y'erĩhĩndanamo, mobatsũka erĩmũswĩrĩrya emuliro w'ekĩtũmbĩ ky'olubanza. Kandi Galĩo mwatatsomana emyatsi eyĩ, n'ahake. 18Neryo Paũlo mwĩkala eKorĩnto yo biro bingi. Neryo mwalagana n'abalĩkyetu, mwasokera eSũrĩa omo bwato, haguma na Pĩrĩsĩla na Akwĩla. Neryo eKenkũrĩa Paũlo mwasĩswa, kusangwa abya akaberererya erĩlahĩrya liwe. 19Neryo mobahĩka eEfeso, nĩkwa mwasĩgayo Pĩrĩsĩla na Akwĩla. Kandi mwingira omo nyũmba y'erĩhĩndanamo, n'erĩkanĩa n'Abayũda. 20Kandi Abayũda mobamũbũlya bati ĩkale nabo ebindi biro, nĩkwa mwatalĩga. 21Nĩkwa mwalagana nabo ati, Nasyaswasa kandi ũkw'ĩnywe, Nyamuhanga amanza. Neryo mwalũa eEfeso omo bwato. 22Neryo Paũlo abere ahĩka eKaĩsarĩa, mwaya eYerũsalema erĩkerya ekanĩsa, neryo mwandagalira eAntĩokĩa. 23Neryo abere abĩkalayo katambĩ, mwalũayo. Kandi mwalaba omo bihugo by'eGalatĩa n'eFũrĩgĩa, ĩnĩakahamĩraya abiga bosĩ. 24Neryo Omũyũda muguma erĩna liwe iyo Apolo oyo wabutawa eAlũsandũrĩa, mwahĩka eEfeso. Apolo abya mundu oyo wasĩ erĩbũga ndeke-ndeke, kandi abya asĩ kutsibu emyatsi y'Amasako. 25Abya ĩnĩabĩrĩkangĩrĩrĩbwa omo nzira y'Omukama, kandi ĩnĩakwĩre omũhwa w'erĩbũga n'erĩkangĩrĩrya ndeke emyatsi ya Yesu. Nĩkwa abya asĩ olũbatĩso lwa Yoane lusa. 26Neryo mwatsũka erĩbũga butsira eriubaha omo nyũmba y'erĩhĩndanamo. Nĩkwa Pĩrĩsĩla na Akwĩla babere bamowa, mobagenda haguma naye, mobamũkũmbũlĩra enzira ya Nyamuhanga yo ndeke-ndeke. 27Neryo Apolo mwasonda erisokera omo kihugo ky'Abagĩrĩkĩ. Nĩkwa abalĩkyetu b'eEfeso mobasakira abiga b'eyo bati bamũkokaye. Neryo abere ahĩkayo, mwawatĩkya kutsibu abĩkĩrĩraya olukogo lwa Nyamuhanga. 28Kusangwa Apolo mwasinga Abayũda bo kutsibu embere sy'abandu, ĩnĩakakangayabo omo Masako Yesu kw'ali Kristo.

will be added

X\