EMĨBĨRĨ Y'ABAKWENDA 17

1Neryo Paũlo na Sila mobalaba eAmfĩpolĩ n'eApolonĩa, mobahĩka eTesalonĩka ahabya enyũmba y'erĩhĩndanamo y'Abayũda. 2Paũlo mwingira omo nyũmba y'erĩhindanamo ngoko atula akakola. Neryo mwakanĩryabo emilondo y'Amasako oko Sabato ĩsatu. 3Mwabya akakũmbũlĩrabo n'erĩkangyabo ndeke ngoko lyabya litolere Kristo iniagalwa, n'erĩlũbũka oko baholĩ. Paũlo ati, Yesu oyo ngabowĩsaya, yona Kristo. 4Neryo abandi ba kubo mobasĩngwa, mobayitomekera uku Paũlo na Sila, haguma n'endeko nene y'Abagĩrĩkĩ ababya bakubaha Nyamuhanga, n'abangi b'oko bakalĩ abasĩkĩbwe. 5Nĩkwa Abayũda mobabya n'eritsuro mobahĩndanĩa bandu babi b'ekatale, neryo mobayira endeko y'erĩbũgya olukanda omo mũyĩ. Kandi mobayabambira enyũmba ya Yasona ibakasonda erireta Paũlo na Sila oko bandu b'omwaga. 6Neryo babere babulabo, mobakura Yasona, n'abandi balĩkyetu embere sy'abakulu b'omũyĩ bati, Abandu aba babiribindula ekihugo kyosĩ! Na lino babĩrĩhĩka na hano nibya. 7Kandi Yasona abĩrĩkokyabo. Abosĩ bakapona amahano wa Kaĩsarĩ, bati hali ogundi mwami ye Yesu. 8Neryo mobahahũkya endeko n'abakulu b'omũyĩ omo bĩnywa ebĩ. 9Neryo babere babĩmya omuwato uku Yasona n'abandi mobalwĩkabo. 10Neryo abalĩkyetu mobatuma Paũlo na Sila omo kiro eBeroya. Neryo babere babĩhĩkayo mobaya omo nyũmba y'erĩhĩndanamo y'Abayũda 11Nĩkwa abandu b'eBeroya babya bandu babuya kwilaba bandu b'eTesalonĩka. Mobangirira ekĩnywa kya Nyamuhanga n'omũhwa, ĩbakasondaya omo Masako obuli kiro erĩrebya emyatsi eyĩ nga ni kwenene. 12Neryo abangi ba kubo mobĩkĩrĩrya, abakalĩ b'Abagĩrĩkĩ abasĩkĩbwe n'abalume b'Abagĩrĩkĩ. 13Nĩkwa Abayũda b'eTesalonĩka babere bowa ko Paũlo mwatũlaganĩa ebĩnywa bya Nyamuhanga eBeroya, mobayayo, mobatsotsererya n'erĩkolakolya esyondeko. 14Neryo abalĩkyetu mobatuma Paũlo yo lũba eriya oko ngetsi, nĩkwa Sila na Tĩmoteo mobasĩgala eBeroya. 15Nĩkwa bandu abatwala Paũlo, mobamũkolya eAtene. Neryo mobasuba eBeroya; Paũlo abere abilayira ati Sila na Tĩmoteo bamũhĩkeko lũbalũba. 16Neryo omugulu Paũlo abya akalinda Sila na Tĩmoteo, ekĩrĩmũ kiwe mokyabya n'obũlĩge, kusangwa alangira omũyĩ w'eAtene ĩnĩoswĩre mw'esyosanamu. 17Neryo mwabya akakanĩrya omo nyũmba y'erĩhĩndanamo haguma n'Abayũda n'abandu b'Ebihanda ababya bakubaha Nyamuhanga, kandi mwaya ekatale obuli kiro akakanĩranĩa n'abandu ababyaho. 18Kandi abandi b'amenge ba Epĩkũrĩo na Bastoĩko mobakanĩa na Paũlo. Abandi ba kubo bati Omũbũyĩ w'ebingi oyũ, akasonda erĩbũgakĩ kwehĩ? Abandi bati, Ni mundu w'erĩtũla emyatsi y'esyonyamuhanga sy'ehandi, kusangwa Paũlo abya akatũla omwatsi wa Yesu n'erĩlũbũka oko baholĩ. 19Neryo mobatwala Paũlo oko Areopago bati, Twanzĩre eriminya erĩkangĩrĩrya lihya-lihya eryo ũkakangĩrĩraya nga ni ryahi. 20Emyatsi eyo tũkowa ũkabũga ni y'ehandi eyo tũtasĩ, neryo twanzĩre eriminya omũsĩndo wayo, 21Kusangwa Abanya Atene n'ab'ehandi ababya bakabungiraho, mobasiba omugulu gosĩ bakabũga kutse bakowa emyatsi mihya-mihya misa-misa. 22Neryo Paũlo mwahangana omo katĩkatĩ k'eAreopago, mwabũga ati, Ĩnywe balume b'eAtene! Ngalebaya ko muli bandu b'ekisomo kutsibu omo myatsi yosĩ. 23Kusangwa nabere ngalaba omo mũyĩ wenyũ, inyinemũlebya ebindu ebyo mũkaramaya, moneya ekiherero ekĩsakĩrweko kiti, Uku Nyamuhanga oyũtasĩbwe. Neryo oyo mũkaramaya ĩsĩmũmwasĩ, yo n'oyo ngabatũlaganaya. 24Nyamuhanga oyo wahangika ekihugo, n'ebindu byosĩ birimo, iye ni Mukama w'olubula n'ekihugo, sĩalĩkala omo syohekalũ esĩkahĩmbawa omo byala by'abandu. 25Kandi syalikolerawa n'ebyala by'abandu, ng'ali n'obwaga bw'ekindu, kusangwa akaha engebe n'omuka n'ebindu byosĩ oko bandu bosĩ. 26Kandi omo mundu muguma mwahangika ebihanda byosĩ by'abandu erĩĩkala omo kihugo ehosĩ. Kandi mwasoha emigulu yabo, n'emitano y'obwĩkalo bwabo. 27Akola atya ati, kumbe bangasonda-sonda Nyamuhanga, ati mbino bangamumata-mata n'erimubana, nĩkwa Nyamuhanga syali hali ũkw'ĩtwe oko buli mundu. 28Kusangwa bakabũga bati: 'Eriwatana naye tuliho, kandi tukalendera, ituneho.' Ng'abandi basakĩ benyũ b'esyonyimbo balĩbĩrĩbũga bati, 'Netu tuli bana buwe nibya.' 29Neryo twamabya tuli bana ba Nyamuhanga, siritolere tũkaganĩrya tuti Nyamuhanga ali ng'esyosanamu sy'esyamagetsi, kutse sy'ekĩtsĩpa, kutse sy'erĩbwe esikabumbawa omo menge n'obũlengekanĩa bw'abandu. 30Nyamuhanga abĩrĩkĩrũkya ameso oko migulu eyo bandu bataminya, nĩkwa lino akahana bandu bosĩ, ehosĩ, bangabindula emitima yabo erireka ebibi. 31Kusangwa Nyamuhanga abĩrĩhĩra ekiro ekyo asyatswera ekihugo omo litunganene omo Mundu oyo abiriyisoga, ĩnĩakamĩnyĩsayakyo oko bandu bosĩ ĩnĩakalũbũkaya Omundu oyo y'oko baholĩ! 32Neryo babere bowa omwatsi w'erĩlũbũka oko baholĩ, abandi mobanegula, nĩkwa abandi bati, Twasyaswakowa omo mwatsi oyũ. 33Nĩkwa Paũlo mwalũa omo katĩkatĩ kabo. 34Nĩkwa abandi bandu mobayitomeka uku Paũlo mobĩkĩrĩrya. Dĩonĩsĩo Omũareopago abya muguma wa kubo, n'omũkalĩ erĩna liwe iyo Damarĩa, n'abandi haguma nabo.

will be added

X\