EMĨBĨRĨ Y'ABAKWENDA 16

1Neryo Paũlo mwalaba eDerbe n'eLĩstra. Nĩkwa eyo habya omwiga muguma erĩna liwe iyo Tĩmoteo. Nyĩnya wuwe abya Mũyũda oyo wĩkĩrĩrye, nĩkwa ĩse wuwe abya Mũgĩrĩkĩ. 2Tĩmoteo abya asĩmĩrwe ndeke n'abalĩkyetu bosĩ b'eDerbe n'eLĩstra. 3Paũlo abya anzĩre Tĩmoteo iniagenda haguma naye, neryo mwamũbanĩa busana n'Abayũda ababya omo bihugo by'eyo, kusangwa abosĩ babya basĩ kw'ĩse wuwe nĩ Mũgĩrĩkĩ. 4Neryo omugulu babya bakalaba omo mĩyĩ eyo, mobabwira abiga b'eyo b'emyatsi eyo bakwenda n'abakulu b'eYerũsalema basoha, bati bakwameyo. 5Litya esyokanĩsa mosyabana amaka omw'ĩkĩrĩrya, n'eriganza lyabo molyakanya obuli kiro. 6Nĩkwa mobalaba omo bihugo by'eFũrũgĩa n'eGalatĩa. Kandi Omũlĩmũ Abũyĩrĩre mwakagabo erĩtũla omwatsi eAsĩa. 7Neryo mugulu bahĩka eMĩsĩa, mobalenga eriya eBĩtĩnĩa, nĩkwa Omũlĩmũ wa Yesu mwatalĩgĩrabo. 8Neryo mobatwangana eMĩsĩa, mobahĩka eTroa. 9Nĩkwa Paũlo mwalota esyonzolĩ sy'omo kiro. Omundu w'eMakedonĩa iniahangene akamuhatikana ati, Usokere eMakedonĩa ũtũwatĩkaye! 10Neryo Paũlo abere abilola oko nzolĩ esyo, neryo-neryo motwasonda eriya eMakedonĩa, itwamabiminya ko Nyamuhanga abiritubirikira erĩtũla Engulu Yowene oko bandu bayo. 11Kandi motwalũa eTroa omo bwato, motwagenda omo nzira itunganene erĩhĩka eSamotĩrake, n'engyakya motwahĩka eNeapolĩ. 12N'erĩlũa eyo motwahĩka eFĩlĩpĩ, omo mũyĩ munene w'ekihugo ky'eMakedonĩa. Ni kihugo ky'Abaroma. Nĩkwa motwasiba omo mũyĩ oyo mw'ebindi biro. 13N'oko kiro ky'eSabato motwalũa omo mũyĩ motwaya oko mũsĩke w'olũsĩ, ĩtũkaganiraya nga hane ah'erisabira. Neryo motwĩkala ahisi, n'erĩtsũka erĩbũga n'abakalĩ ababya bahĩndeneho. 14Neryo omũkalĩ muguma oyo wabya akahulikirira, abya Lũdĩa w'omũyĩ w'eTuatira. Naye abya mũtũndĩ w'esyongimba sy'engula. Abya mũkalĩ oyũkaramaya Nyamuhaga, neryo Omukama mwamwĩbũkya omo mutima wuwe erĩowa emyatsi eyo Paũlo abũga. 15Neryo Lũdĩa n'abandu b'enyũmba yiwe mobabatĩsĩbwa. Neryo mwatubirikira ati, Mwamaganirya muti nabĩrĩkĩrĩrya Omukama, mwase omo nyũmba yage mwĩkale. Mwatuhatikana, neryo motwingira. 16Neryo ekiro kiguma twabere tukaya ah'erisabira, omwana-muto mugombe muguma oyo wabya kw'ekĩrĩmũ kibi ky'erilagula, mwahĩndana netu. Omwana muto oyo abya akaletera abakama buwe b'endũndĩ nene busana n'erilagula. 17Neryo omwana-muto oyo mwatukwama tuna Paũlo iniakabirikira ati, Abandu aba ni bagombe ba Nyamuhanga W'endata Kutsibu! Bakabatulira enzira y'erilama! 18Naye mwakola atya ebiro bingi. Nĩkwa Paũlo mwasĩrĩkalira kutsibu, neryo mwakeba mwabũga n'ekĩrĩmũ ekyo ati, Ngakuhana omo lĩna lya Yesu Kristo ũmũlũeko! Neryo mokyamũlũako oko saa eyo nyisa-nyisa. 19Nĩkwa omugulu abakama buwe balangira kw'amaha w'endũndĩ yabo abirihwaho, mobatsimba Paũlo na Sila mobakurirabo embere sy'abatabalĩ omo katale. 20Neryo mobaletabo embere w'abatswerĩ bakulu bati, Abandu aba nĩ Bayũda kandi bakatsandaya omũyĩ wetu. 21Kandi bakakangĩrĩraya emitsye eyite omo migambo yetu. Ĩtwe tuli Baroma, sitwetoka erĩrĩga kutse erikwama emitsye eyĩ. 22N'endeko moya-hangana haguma erilwa nabo. Neryo abatswerĩ bakulu mobalũsya esyongimba sya Paũlo na Sila, kandi mobahana bati baswĩrĩbawe omo myũtso. 23Neryo babere babĩhũnzabo kutsibu, mobagusabo omo mũlĩkĩ, n'eritegeka omũteya erĩteyabo ndeke. 24Neryo omũteya abere abĩowa erihana erĩ, mwagusabo omo kyumba ky'omwisi w'enyũmba y'omũlĩkĩ, kandi, mwabohera ebisando byabo omo katĩkatĩ k'emiti ĩbĩrĩ. 25Nĩkwa omo katĩ kanene, Paũlo na Sila babya bakasaba n'eriimba esyonyimbo sy'eripipa Nyamuhanga, n'abandu b'omũlĩkĩ mobahulikirirabo. 26Neryo-neryo mohabya omũsĩkĩ munene, kyaleka ebibanza by'enyũmba y'omũlĩkĩ ibyatenga-tengana. Neryo-neryo esyonyũyĩ syosĩ mosyakingukala, n'amahulula w'obuli mundu mwakũndũkala. 27Kandi omũteya mwabuka omo tũgotserĩ, neryo abere alangira esyonyũyĩ sy'enyũmba y'omũlĩkĩ isyabirikingulwa mwaganĩrya ati ab'omũlĩkĩ babiritibita, neryo mwakula omũyalĩ wuwe ati akayĩta. 28Nĩkwa Paũlo mwamubirikira ati, Suyikole nabi kusangwa ĩtwe bosĩ tune hano! 29Neryo omũteya mwatumira oko syotala, mwingira omo nyũmba y'omũlĩkĩ akatitimana n'eriubaha, . mwatũlama embere wa Paũlo na Sila. 30Neryo mwaletabo eyĩhya, mwabũlya ati, Bakama, litolere ĩnakolakĩ inatoka erĩlamĩbwa kwehĩ? 31Nabo mobabũga bati, Wĩkĩrĩraye Omukama Yesu, wasyalamĩbwa uwe n'enyũmba yawe. 32Kandi mobamũkangĩrĩrya ekĩnywa ky'Omukama, haguma n'abosĩ ababya omo nyũmba yiwe. 33Neryo oko saa eyo y'ekiro, omũteya oyo mwĩmya Paũlo na Sila, mwerya ebironda byabo, neryo-neryo mwabatĩsĩbwa, iye n'ekĩtũnga kiwe kyosĩ. 34Neryo mwatwalabo omo nyũmba yiwe, mwahabo akalyo k'erirya. Neryo iye n'abandu b'enyũmba yiwe mobatsema kutsibu, ĩbamabĩkĩrĩrya Nyamuhanga. 35Neryo engyakya, abatswerĩ bakulu mobatuma abapolĩsĩ babo bati, Mũlwĩke abandu abo. 36Neryo mũteya mwabwira Paũlo ebĩnywa ebĩ ati, Abatswerĩ bakulu bamatuma bati mũlwĩkawe. Neryo lino muhuluke mugende buholo. 37Nĩkwa Paũlo mwabwirabo ati, Babĩrĩtũswĩrĩrya embere sy'abandu, isitulitwatonda. Kandi ĩtwe tuli Baroma! Kandi babiritugusa omo mũlĩkĩ. Na lino bakasonda erituhiga bũbĩso-bĩso kwehĩ? Lero iyihi! Nĩkwa base ĩbobene-bene batũlũsayemo. 38Neryo abapolĩsĩ mobayatũlĩra abatswerĩ bakulu b'ebinywa ebĩ. Nabo mobubaha omugulu bowa ko Paũlo na Sila ni Baroma. 39Neryo mobasa mobalemba-lemba Paũlo na Sila eribuyirabo, neryo babere balũsyabo omo mũlĩkĩ, mobasababo bati balũe oko mũyĩ. 40Neryo Paũlo na Sila mobalũa omo nyũmba y'omũlĩkĩ, mobingira omo nyũmba ya Lũdĩa. Neryo babere balangira abalĩkyetu, mobasĩkyabo, mobagenda.

will be added

X\