EMĨBĨRĨ Y'ABAKWENDA 15

1Neryo abandi bandu mobandagalira eAntĩokĩa bakalũa eYũdea, ĩbakakangĩrĩraya abalĩkyetu bati, Mwamatendĩbanĩbwa ng'emitsye ya Musa, isimwangatoka erĩlamĩbwa. 2Nĩkwa Paũlo na Barnaba mobagabana nabo n'erikuba obuhaka nabo busana n'omwatsi oyũ. Neryo abalĩkyetu mobatwa omwatsi bati, Paũlo na Barnaba n'abandi ba kubo baye eYerũsalema oko bakwenda n'abakulu busana n'omwatsi oyũ. 3Neryo ekanĩsa moyatumabo, kandi mobalaba eFoĩnĩkĩ n'eSamarĩa, ĩbanemũkanĩryabo ndeke erilama ly'Ebihanda. Neryo omwatsi oyũ mwatsemesya abalĩkyetu bosĩ bo kutsibu. 4Neryo babere bahĩka eYerũsalema mobakokĩbwa n'ekanĩsa n'abakwenda n'abakulu, kandi mobakanĩryabo ebyosĩ ebyo Nyamuhanga abirikola haguma nabo. 5Nĩkwa abandi b'ekihanda ky'Abafarĩsayo abakĩkĩrĩraya, mobahangana bati, Litolere ĩbabanĩbwa, kandi litolere ibahanabo bati bakwame Emigambo ya Musa. 6Neryo abakwenda n'abakulu mobahĩndana erĩkanĩa omwatsi oyũ. 7Neryo enyũma w'erĩkanĩa lĩnene, Petero mwahangana, mwabwirabo ati, Balĩkyetu mũnasĩ ngoko Nyamuhanga mwayisoga ngye omo katĩkatĩ kenyũ oko biro by'erĩmbere, ati nyĩkangĩrĩraye ekĩnywa ky'Engulu Yowene oko Bihanda, batoke erĩowa n'erĩkĩrĩrya. 8Neryo Nyamuhanga, oyo wasĩ emitima y'abandu, mwalĩga Ebihanda iniakahabo Omũlĩmũ Abũyĩrĩre ngoko atuhago. 9Kandi Nyamuhanga mwatalebyandi nandi omo katĩkatĩ ketu nabo, ĩnĩakeraya emitima yabo kw'ebibi, kusangwa bĩkĩrĩraya. 10Neryo lino busana nakĩ mukalenga uku Nyamuhanga muti mũkahĩra emiheke oko migongo y'abiga, eyo aboso-kulu kutse ĩtwe batatoka eriheka kwehĩ? 11Nĩkwa ĩtwe tũkĩkĩrĩraya tuti tũkalamĩbawa omo lukogo lw'Omukama Yesu, ngoko nabo bakalamĩbawa. 12Neryo endeko yosĩ moyabya bũkũtũ omugulu bowa Barnaba na Paũlo bakakanĩa busana n'ebitiko-tiko n'eby'eriswekera ebyo Nyamuhanga ahabo erikola omo katĩkatĩ k'Ebihanda. 13Neryo babere babuga erĩbũga, Yakobo mwasũbĩrya ati, Balĩkyetu, munyihulikirire! 14Sĩmeonĩ abĩrĩbakanĩrya ngoko Nyamuhanga atsũka erĩkangya olwanzo luwe busana n'Ebihanda, eriyisoga omo katĩkatĩ kabo abandu busana n'erĩna liwe. 15Kandi ebĩnywa by'abamĩnyererĩ byamalĩga omwatsi oyũ. Amasako akabũga ati, 16Enyũma w'emyatsi eyĩ nasyasubula, Omukama atya, Kandi nasyaswahĩmba enyũmba ya Dawĩdĩ eyatera, Nasyaswahĩmba ahasambukala, Kandi nasyaswahanganĩayo. 17Litya abandi bandu bosĩ basondasondaye Omukama, N'Ebihanda byosĩ ebikahulawa omo lĩna lyage. 18Omukama atya, oyũkamĩnyĩsaya emyatsi eyĩ erĩtsũka kera. 19Neryo Yakabo ati, Ĩngye nangatwago nyiti, Sĩtwendereraye ab'Ebihanda abakabindukira Nyamuhanga. 20Nĩkwa tusakirebo tuti, baleke ebyalya ebĩtsandĩre kusangwa bikaherawa oko syosanamu, kandi baleke erĩsĩngĩra, kandi baleke erirya esyonyama esyabĩrĩnĩgwa, kandi baleke, erirya omusasi. 21Kusangwa Emigambo ya Musa yabirisomwa biro bingi erĩtsũka kera omo manyũmba w'erĩhĩndanamo oko buli Sabato, n'ebĩnywa biwe bĩkatũlawa omo buli mũyĩ. 22Neryo abakwenda n'abakulu, haguma n'ekanĩsa yosĩ mobanza eriyisoga abandu omo katĩkatĩ kabo eritumabo eAntĩokĩa haguma na Paũlo na Barnaba. Mobayisoga Yũda oyukahulawa mo Barĩsaba, na Sila, abasondolĩ omo katĩkatĩ k'abalĩkyetu. 23Neryo mobatuma ebarua eyĩ nabo, bati, Ĩtwe bakwenda, n'abalĩkyetu abakulu, tukabasakira ĩnywe balĩkyetu b'Ebihanda abali eAntĩokĩa, n'eSũrĩa, n'eKĩlĩkĩa, obuholo ũkw'ĩnywe. 24Twamowa ambu abandi b'oko wetu babiribahahũkya omo bĩnywa byabo, n'eriganga-gangya emitima yenyũ. Ĩtwe sitwetabwirabo tutya. 25Neryo twamabĩhĩndana haguma n'omutima muguma, motwanza eriyisoga bandu n'eritumabo ũkw'ĩnywe. Tukatumabo haguma n'abanze betu Barnaba na Paũlo, 26ababiriyisiga busana n'erĩna ly'Omukama wetu Yesu Kristo. 27Kandi twabirituma Yũda na Sila, nabo ĩbobene basyabatũlĩra emyatsi eyĩ omo bĩnywa byabo. 28Kusangwa Omũlĩmũ Abũyĩrĩre, netu, twamalĩga tuti sĩtwangabahĩra kw'emiheke eyĩlabĩre emyatsi eyitolere eyĩ: 29tuti, muleke ebyalya ebĩtsandĩre kusangwa bikaherawa oko syosanamu; kandi muleke erirya omusasi; erirya enyama eyabĩrĩnĩgwa; kandi muleke erĩsĩngĩra. Mwamayĩteya oko myatsi eyĩ, mwasyakola ndeke. Mubye n'obuholo. 30Neryo abatumawa mobandagalira eAntĩokĩa. Neryo mobahĩndanĩa endeko y'ekanĩsa, mobahabo ebarua eyo. 31Neryo abandu babere babisoma ebarua eyo, mobatsema busana n'ebĩnywa by'erĩsĩkyabo. 32Neryo Yũda na Sila, ababya bamĩnyererĩ nibya, mobahamĩrya abalĩkyetu, n'erĩsĩkyabo omo bĩnywa bingi. 33Neryo babere babisibayo ebindi biro, abalĩkyetu mobakwamanĩsyabo n'obuholo, neryo mobasuba oko batumabo. 34[Nĩkwa Sila mwanza erĩsĩgala eAntĩokĩa.] 35Nĩkwa Paũlo na Barnaba mobasĩgala eAntĩokĩa. Neryo haguma n'abandi bangi mobakangĩrĩrya, n'erĩtũla ekĩnywa ky'Omukama. 36Neryo enyũma w'ebindi biro, Paũlo mwabwira Barnaba ati, Tusubule tuyabane abalĩkyetu abali omo mĩyĩ eyo twakangĩrĩraya ekĩnywa ky'Omukama, tũlebaye ngoko babere. 37Neryo Barnaba mwanza erigenda haguma na Yoane Marĩko. 38Nĩkwa Paũlo mwagana, ati sibagende n'oyo watswa kubo ePamfĩlĩa, oyutagenda haguma nabo oko mũbĩrĩ. 39Neryo mobakũbĩsananĩa obuhaka omo katĩkatĩ kabo, kyaleka ibagabana. Neryo Barnaba mwagenda haguma na Marĩko mobasokera eKĩpũro omo bwato. 40Nĩkwa Paũlo mwayisoga Sila, neryo mobahongoka, abalĩkyetu ĩbamabĩhĩrabo oko lukogo lw'Omukama. 41Neryo Paũlo mwalaba eSũrĩa n'eKĩlĩkĩa, ĩnĩakahamĩraya esyokanĩsa.

will be added

X\