EMĨBĨRĨ Y'ABAKWENDA 14

1Neryo eĨkonĩo Paũlo na Barnaba mobingira haguma omo nyũmba y'erĩhĩndanamo y'Abayũda, neryo mobabũga omo mũsĩndo owaleka endeko nene y'Abayũda n'ey'Ebihanda ĩbĩkĩrĩrya. 2Nĩkwa Abayũda abagana erĩkĩrĩrya mobatsotsererya amalengekanĩa w'Ebihanda, erilwa n'abalĩkyetu. 3Nĩkwa abakwenda mobasiba eyo omugulu muli. Mobabũga busana n'Omukama butsira eriubaha. Neryo Omukama mwatũlago busana n'ekĩnywa ky'olukogo luwe, iniakahabo obũtokĩ bw'erikola ebitikotiko n'eby'eriswekera. 4Nĩkwa endeko y'omũyĩ moyagabana, abandi mobayĩhĩra oko Bayũda, n'abandi oko bakwenda. 5Neryo Ebihanda n'Abayũda, haguma n'abatabalĩ mobalenga erikola abakwenda bo nabi, n'erĩĩtabo omo mabwe. 6Neryo abakwenda mobaminyakyo, mobatibita eLĩstra n'eDerbe, emĩyĩ y'eLĩkaonĩa, n'omo kihugo ekĩhererenĩe. 7Neryo mobatũla Engulu Yowene y'eyo. 8Nĩkwa eLĩstra habya mundu muguma ĩnĩabũndamĩre. Omundu oyũ abya kirema omo bisando biwe isialitatoka erigenda na kera, abutawa ikwane atya. 9Omundu oyũ mwahulikirira ebĩnywa bya Paũlo. Neryo Paũlo mwalangira ko mundu oyũ abya awite erĩkĩrĩrya ly'erĩlamĩbwa. 10Neryo Paũlo mwamubwira n'omulenge munene ati, Hangana, wimane omo bisando byawe! Neryo omundu oyo mwabatuka, mwatsũka erigenda. 11Neryo esyondeko syabere syalangira ekyo Paũlo akola, mobasumba emirenge yabo omo mũbũge w'Abanya Lĩkaonĩa bati, Esyonyamuhanga syabere ng'abandu, kandi syabiritwandagalirako. 12Mobahula Barnaba mo Zeũ, na Paũlo mobamwahula mo Herme, kusangwa Paũlo abya mbũyĩ. 13Neryo omũhererĩ wa Zeũ, ehekalũ yiwe yabya embere w'omũyĩ, mwaleta esyonume sy'esyonde n'obũsoyo oko syongyo sy'omũyĩ, iniakasonda haguma n'esyondeko eriherera abakwenda. 14Nĩkwa omugulu abakwenda, Paũlo na Barnaba bowa ekyo, mobatula esyongimba syabo, mobatibita omo syondeko ĩbakabirikira bati, 15Ĩnywe balume, busana nakĩ mukakola mutya kwehĩ? Netu tuli bandu abalingene nenyũ! Tũkabatũlĩra Engulu Yowene imwatoka erireka emyatsi mitya-mitya eyĩ, n'eribindukira Nyamuhanga oyuliho, oyo wabumba olubula, n'ekihugo, n'engetsi, n'ebyosĩ ko birimo. 16Kandi, oko migulu yalaba Nyamuhanga mwaleka Ebihanda byosĩ erigenda omo mibere yabyo. 17Nĩkwa mwatayireka bute balangĩrĩ buwe, iniakakola ebibuya n'eribaha embũla eyĩkalũa elubula, n'eribaha ebirimo ebĩkeraya ebyalya, n'erĩũsũlya emitima yenyũ mw'obutseme. 18Nĩkwa nomo bakwenda babũga emyatsi eyĩ, lyabya lĩkalĩre erĩkakĩrya esyondeko erihererabo amahere. 19Neryo Abayũda mobahĩka bakalũa eAntĩokĩa y'ePĩsĩdĩa, n'eĨkonĩo. Abayũda aba mobabindula emitima y'abandu, mobahũtalya Paũlo y'omo mabwe, mobamukurira ekyaswa ky'omũyĩ, mobaganĩrya bati abirihola. 20Nĩkwa abiga babere bakamũtĩmbako, Paũlo mwahangana mwingira omo mũyĩ. N'engyakya Paũlo na Barnaba mobaya eDerbe. 21Neryo Paũlo na Barnaba mobatũla Engulu Yowene eDerbe, kandi mobayira abiga bangi. Neryo mobasuba eLĩstra, n'eĨkonĩo, n'eAntĩokĩa y'ePĩsĩdĩa. 22Mobasĩkya emitima y'abiga, n'erĩhamĩryabo bati bakwamirire omw'ĩkĩrĩrya. Bati, Litolere itwingira omo bwami bwa Nyamuhanga itukalaba omo malĩge mangi. 23Kandi mobahĩra abakulu busana nabo omo buli kanĩsa, babere babisaba n'eritsira akalyo. Kandi mobahĩrabo omo byala by'Omukama oyo bĩkĩrĩraya. 24Neryo Paũlo na Barnaba mobatwangana ePĩsĩdĩa, mobahĩka ePamfĩlĩa. 25Neryo babere batũla omwatsi w'ekĩnywa kya Nyamuhanga ePerga, neryo mobandagalira eAtalĩa. 26Neryo mobalũa eyo, mobaya eAntĩokĩa omo bwato, aho bahĩrawa oko lukogo lwa Nyamuhanga busana n'omũbĩrĩ ogo babuga. 27Neryo babere bahĩka eAntĩokĩa, mobahĩndanĩa ekanĩsa, mobabwirabo n'erĩkanĩryabo ebyosĩ ebyo Nyamuhanga akola haguma nabo, kandi ngoko Nyamuhanga alĩbũla enzira busana n'erĩkĩrĩrya ly'Ebihanda. 28N'eyo mobĩkalayo mugulu muli haguma n'abiga.

will be added

X\