EMĨBĨRĨ Y'ABAKWENDA 13

1Nĩkwa eAntĩokĩa yabya abamĩnyererĩ n'abakangĩrĩrya omo kanĩsa eyabyayo. Ye Barnaba, na Sĩmeonĩ oyukahulawa mo Mwĩragũlũ, na Lũkĩo w'eKũrene, na Manaenĩ oyo walemberawa haguma n'omwami Herode, na Saũlo. 2Neryo omugulu babya bakakolera Omukama n'eritsira akalyo, Omũlĩmũ Abũyĩrĩre mwabũga ati, Munyisombolere Barnaba na Saũlo busana n'omũbĩrĩ ogo nabirikirirabo. 3Neryo babere batsira akalyo n'erisaba, mobahĩra kubo kw'ebyala, mobatumabo. 4Neryo Omũlĩmũ Abũyĩrĩre abere abĩtuma Barnaba na Saũlo, mobandagalira eSeleũkĩa, n'erĩlũa eyo mobaya omo bwato oko kitsira ky'eKĩpũro. 5Neryo babere bahĩka eSalamĩ, mobatũla ekĩnywa kya Nyamuhanga omo manyũmba w'erĩhĩndanamo w'Abayũda. Kandi Yoane Marĩko abya mũwatĩkya wabo oko mũbĩrĩ. 6Neryo babere babirendera omo kitsira ekyo ky'eKĩpũro kyosĩ erĩhĩka ePafo, mobahĩndana n'omũkũmũ muguma, omũmĩnyererĩ w'amabehĩ w'Abayũda, erĩna liwe BaraYesu. 7Omũkũmũ oyo abya haguma n'omũtabalĩ Sergĩo Paũlo, omundu w'amenge. Nĩkwa Sergĩo Paũlo oyo mwabirikira Barnaba na Saũlo iniakasonda erĩowa ekĩnywa kya Nyamuhanga. 8Nĩkwa omũkũmũ Elema (erĩna liwe omo Kĩgĩrĩkĩ lyabya litya) mwalwa nabo, iniakasonda eribindula omũtabalĩ oyo syĩkĩrĩraye. 9Nĩkwa Saũlo, oyo wahulawa mo Paũlo, ĩnĩoswĩre n'Omũlĩmũ Abũyĩrĩre, mwatungerera Elema, 10n'erimubwira ati, Uwe, goswĩre mw'eriteba lyosĩ n'obũlĩbalĩbanĩa, uwe mugala w'eSatanĩ, uwe nzĩgũ y'ebitunganene byosĩ! Sĩwendĩsyũmbya erĩhengemya esyonzira situnganene sy'Omukama kwehĩ? 11Na lino lebaya! ebyala by'Omukama bikalwa nawe, ukandibya ndĩmatĩme isiwendisyalangira ekyakakala oko katambĩ. Neryo-neryo ekihohe n'omwĩrĩmya mobyamubyako, neryo Elema mwalendera akamatamata oyo wangamuwatako oko byala erimusondola. 12Neryo omũtabalĩ oyo mwĩkĩrĩrya, abere alangira ebyakolawa. Kandi mwasweka busana n'erĩkangĩrĩrya ly'Omukama. 13Nĩkwa Paũlo n'abalĩkyabo mobalũa ePafo omo bwato mobahĩka ePerga omo kihugo ky'ePamfĩlĩa, nĩkwa Yoane Marĩko mwasĩgabo mwasuba eYerũsalema. 14Kandi mobalũa ePerga mobaya eAntĩokĩa y'ePĩsĩdĩa. Neryo oko kiro ky'eSabato mobaya omo nyũmba y'erĩhĩndanamo, mobĩkala. 15Neryo enyũma w'erisoma omo Migambo ya Musa, n'amasako w'abamĩnyererĩ, abakulu b'enyũmba y'erĩhĩndanamo mobatuma uku Paũlo na Barnaba bati, Balĩk yetu, mwamabya muwite ekĩnywa ky'erihana bandu, mũbũgekyo. 16Neryo Paũlo mwahangana, mwakoheryabo omo byala ati, Ĩnywe balume ba Ĩsraelĩ, ĩnywe mukakenga Nyamuhanga, muhulikirire! 17Nyamuhanga w'abandu ba Ĩsraelĩ, mwayisoga abotata-kulu wetu, mwayirabo mo bandu bakulu omugulu babya babunga omo kihugo ky'eMĩsĩrĩ, omo maka wuwe manene. 18Neryo omo myaka makũmĩ ani mwalemberabo omo mbwarara. 19Neryo Nyamuhanga abere abĩherya ebihanda birinda omo kihugo ky'eKanana, neryo mwaha Ĩsraelĩ ebitaka byabo omo myaka magana ani n'amakũmĩ atanu. 20Kandi enyũma w'emyatsi eyĩ, mwahabo abatswerĩ erĩhĩka oko mũmĩnyererĩ Samwelĩ. 21Neryo mobabũlya batĩ bahabawe omwami, neryo Nyamuhanga mwahabo Saũlo omugala wa Kĩsĩ, omundu w'ekihanda kya Benyamĩna eribya mwami wabo emyaka makũmĩ ani. 22Neryo abere abĩmũlũsyaho, Nyamuhanga mwayira Dawĩdĩ mo mwami wabo. Kandi Nyamuhanga mwabũga busana na Dawĩdĩ ati, Nabiribana Dawĩdĩ mugala wa Yese mo mundu oyo nyanzĩre, oyo wasyakola erisonda lyage lyosĩ. 23Neryo ni Yesu w'oko lubuto lwa Dawĩdĩ, oyo Nyamuhanga aha oko Baĩsraelĩ eribya Mũlamya, ngoko alagabo. 24Embere w'erĩhĩka lya Yesu, Yoane mwatũla omwatsi oko bandu ba Ĩsraelĩ bosĩ, ati babindule emitima yabo erireka ebibi, babatĩsĩbawe. 25Neryo Yoane abere asonda eribuga omũbĩrĩ wuwe, mwabũlya bandu ati, Mũkaganĩraya muti ĩngyendi kwehĩ? Ĩngye sindi oyo mũlĩndĩrĩre. Nĩkwa mũlebaye! Oyukasa enyũma kwĩngye, sinyitolere erĩkũndũla esyongendero sy'ebisando biwe. 26Balĩkyetu, abana b'ekĩtũnga kya Abrahamũ, nenyũ abandi mukakenga Nyamuhanga, engulu eyĩ y'erĩlamya yabiritumwa ũkw'ĩtwe. 27Kusangwa bandu abĩkere eYerũsalema, n'abatabalĩ babo, mobataminya Yesu, kutse ebĩnywa by'abamĩnyererĩ ebikasomawa obuli kiro ky'eSabato. Nĩkwa mobaberererya Amasako ibakatswera Yesu yo lubi. 28Kandi nomo banabula ekyangamwĩtĩsya, mobabũlya Pilato bati, Itawe. 29Neryo babere babĩberererya ebyosĩ ebyasakawa busana naye, mobamubambula oko musalaba, mobamũhĩra omw'isinda. 30Nĩkwa Nyamuhanga mwamũlũbũkya oko baholĩ. 31Neryo oko biro bingi mwabutukira abandu abasa naye eYerũsalema bakalũa eGalĩlaya. Nabo nĩ balangĩrĩ buwe lino oko bandu. 32- 33Netu tũkabatũlĩra Engulu Yowene eyo Nyamuhanga alaga abotata-kulu wetu. Lino Nyamuhanga abĩrĩberererya erilaga erĩ ũkw'ĩtwe bana babo, ĩnĩakalũbũkaya Yesu omo ngebe. Ngoko kĩsakĩre omo Lwimbo lw'akabiri kiti, Uli Mugala wage, Namakubuta mũnabwĩre. 34Kandi Nyamuhanga mwahula erĩmũlũbũkya oko baholĩ, eritindasuba okw'ihonda ati, Nasyabaha omũyĩsa abũyĩrĩre n'ow'ekwenene Ogo nalaga Dawĩdĩ. 35Kandi akabũga omo lundi Lwimbo ati, Sĩwendĩsyalĩga Omũbũyĩrĩre wawe akalola okw'ihonda. 36Kusangwa Dawĩdĩ mwakola erisonda lya Nyamuhanga oko mugulu wuwe, neryo mwahola, neryo mwatabwa hakũhĩ n'aboso-kulu wuwe, neryo mwahonda. 37Nĩkwa oyo Nyamuhanga alũbũkaya oko baholĩ mwatahonda. 38- 39Neryo balĩkyetu, muminye ndeke ngoko busana na Yesu, omwatsi w'eribuyirwa ly'ebibi akatũlawa ũkw'ĩnywe. Kandi muminye ngoko buli mundu oyũkĩkĩrĩraya Yesu akaboholawa kw'ebibi byosĩ ebyo Migambo ya Musa itetoka eribabohola. 40Neryo mũtegaye omwatsi ogo abamĩnyererĩ bahula akasyabahĩkako, bati, 41Mũlebaye ĩnywe basũnatĩ! Musweke, muhole! Kusangwa omũbĩrĩ ngakola oko biro byenyũ Nĩ mũbĩrĩ mũtendĩsyĩkĩrĩrya na kera, Nomo mundu angabakanĩryago! 42Neryo Paũlo na Barnaba babere bakalũa omo nyũmba y'erĩhĩndanamo, abandu mobahatikanabo bati babwirawe kandi emyatsi eyĩ oko yindi Sabato. 43Neryo abandu babere babĩlũa okw'ĩhĩndana omo nyũmba y'erĩhĩndanamo Abayũda bangi n'abandu b'Ebihanda ababinduka eribya Bayũda, mobakwama Paũlo na Barnaba. Neryo abakwenda mobakanĩa nabo n'erihatikanabo erikwamirira olukogo lwa Nyamuhanga. 44N'oko Sabato y'akabiri hakũhĩ n'abandu bosĩ b'omũyĩ mobahĩndana erĩowa ekĩnywa kya Nyamuhanga. 45Nĩkwa omugulu Abayũda balangira esyondeko, mobũsũla n'obũha, mobatsũka erĩyĩhanangya bakagana ebĩnywa Paũlo abũga, kandi mobamutsuma. 46Nĩkwa Paũlo na Barnaba mobabũga n'eritendiubaha bati, Lyabya litolere ekĩnywa kya Nyamuhanga ĩkyatsũka erĩbũgwa ũkw'ĩnywe. Nĩkwa kusangwa mukaganakyo, kandi mũkaganĩraya muti simutolere engebe y'erikota, lebaya, tukandibaleka, itwaya oko Bihanda. 47Kusangwa Omukama abirituhana ati, Nabĩrĩkũhĩra eribya kyakakala ky'Ebihanda, imwaleta omulamo oko kihugo kyosĩ. 48Ebihanda byabere byowa ebĩ, mobatsema n'eripipa ekĩnywa ky'Omukama, n'abosĩ abayisogawa busana n'engebe y'erikota, mobĩkĩrĩrya. 49Kandi ekĩnywa ky'Omukama mokyapanzikanira omo kihugo kyosĩ ekyo. 50Nĩkwa Abayũda mobalwĩsĩsanĩa abakalĩ b'ekisomo abakakengawa, n'abalume bakulu b'omũyĩ. Neryo mobatsũka erĩendererya Paũlo na Barnaba, mobahigabo, erĩlũsyabo omo kihugo kyabo. 51Nĩkwa abakwenda mobakungutira kubo kw'olũtũtũ lw'ebisando byabo, neryo mobaya eĨkonĩo. 52Kandi abiga b'eAntĩokĩa mobũsũla n'obutseme n'Omũlĩmũ Abũyĩrĩre omugulũ gosĩ.

will be added

X\