EMĨBĨRĨ Y'ABAKWENDA 12

1Neryo oko mugulu oyo omwami Herode mwahamba abandi bandu b'ekanĩsa, erikola bo nabi. 2Neryo mwĩta Yakobo mugala wabo Yoane omo mũyalĩ. 3Neryo abere alangira ko kyamatsemesya Abayũda, mwahamba Petero nibya. Omwatsi oyũ abya omo Biro Bikulu by'Erirya Obundu Bute mo Kĩhamya. 4Neryo abere ahamba Petero, mwamũhĩra omo mũlĩkĩ, ĩnĩakamũhĩra omo byala by'emilondo ĩnĩ y'abasĩrĩkanĩ ati bamũtegaye. Obuli mulondo abya w'abasĩrĩkanĩ bani. Herode aganĩraya erĩhũlũkya Petero embere sy'abandu enyũma w'Ebiro Bikulu by'Erikiruka. 5Neryo mobateya Petero y'omo mũlĩkĩ, nĩkwa abandu b'ekanĩsa mobasaba Nyamuhanga yo kutsibu busana naye. 6Neryo oko kiro ekyo Herode asonda erĩmũhũlũkya, Petero abya agotsere omo katĩkatĩ k'abasĩrĩkanĩ babiri. Nĩkwa abya abohĩre omo mahulula abiri, n'abateya ibanimene embere w'olũkyo bakateya enyũmba y'omũlĩkĩ. 7Neryo lebaya, omũlaĩka w'Omukama mwabutukiraho, n'ekyakakala mokyakolerya omo kyumba ekyo. Neryo omũlaĩka mwabanda uku Petero oko lukanga, mwamũbũkya ati, Hangana lũba! Neryo amahulula mwalũa oko byala biwe. 8Neryo omũlaĩka mwamubwira ati, wambale esyongimba n'esyongendero syawe. Neryo Petero mwakola atya. Neryo omũlaĩka mwamubwira ati, Uyĩrĩngĩre kw'olukimba lwawe, unyikwame! 9Neryo Petero mwamukwama erĩlũa omo nyũmba y'omũlĩkĩ, ĩsĩasĩ ebyo mũlaĩka akola nga ni kwenene, nĩkwa mwaganĩrya ati akakola omw'ilota. 10Neryo mobalaba oko mũteya w'erĩmbere, n'ow'akabiri, neryo mobahĩka oko lũkyo lw'ekyuma olukalola oko mũyĩ. Olũkyo olo molwayikingula ĩlolwenelwene, neryo mobaya eyĩhya mobalaba omo nzira nguma, neryo-neryo omũlaĩka mwasĩganĩa Petero. 11Neryo Petero abere abibuka mwabũga ati, Lino namaminya ndeke ko Mukama abirituma omũlaĩka wuwe. Kandi abĩrĩnyĩtongolya omo byala bya Herode, n'oko myatsi yosĩ Abayũda basonda erinyikola. 12Neryo Petero abere abiminya ekyo, mwaya omo nyũmba ya Marĩa, nyĩnya wa Yoane Marĩko, aho abandu bangi babya ĩbabĩrĩhĩndana n'erisaba. 13Neryo Petero abere ahumanga oko lũyĩ lw'eyĩhya, omwana-muto mugombe erĩna liwe iyo Roda mwasaho oko lũyĩ. 14Neryo abere abiminya omulenge wa Petero, mwatakingula olũyĩ busana n'obutseme, nĩkwa mwatibita omo nyũmba mwatũlago ati, Petero animene eyĩhya oko lũyĩ. 15Nabo mobamubwira bati, Uli mũsĩre! Nĩkwa Roda mwayitsinga ati ni kwenene. Nabo bati, nĩ mũlaĩka wuwe! 16Nĩkwa Petero mwayitsinga erihumanga oko lũyĩ. Neryo mobakingulaho, mobamulolako, mobasweka. 17Nĩkwa Petero mwakoheryabo ati babye bũkũtũ, neryo mwakanĩryabo ngoko Mukama amusondola erĩmũlũsya omo nyũmba y'omũlĩkĩ. Ati, Mubwire Yakobo n'abalĩkyetu emyatsi eyĩ. Neryo mwalũaho mwaya, ehandi. 18Neryo bwabere bwakya, mohabya eriganga-ganga omo katĩkatĩ k'abasĩrĩkanĩ Petero ng'ayĩre hahi. 19Kandi Herode mwamusonda-sonda, nĩkwa mwatamubana. Neryo mwabũlya abateya bo ndeke, neryo mwategeka ati abateya bĩtawe. Neryo Herode mwandagalira eKaĩsarĩa akalũa eYũdea, neryo mwasibayo ndambĩ. 20Nĩkwa Herode mwahitana oko bandu b'eTĩro n'eSĩdona. Nabo mobagenda haguma uku Herode ibamabisakana na Balasto oyũkategaya ekikali ky'omwami. Nĩkwa mobasaba Herode y'obuholo kusangwa ekihugo kyabo kyabya kikabana akalyo kabo omo kihugo ky'omwami. 21Neryo oko kiro kyayisogawa, Herode mwambala olukimba lw'obwami, mwĩkala oko kĩtũmbĩ kiwe ky'obwami, neryo mwatsũka erĩkanĩrya bandu. 22Neryo abandu mobũta obogo bati, Ni mulenge wa Nyamuhanga, si mulenge w'omundu! 23Neryo-neryo omũlaĩka w'Omukama mwaswĩrya Herode, kusangwa mwataha Nyamuhanga y'olukengerwa. Neryo mwalibwa n'emihuka, mwahola. 24Nĩkwa ekĩnywa ky'Omukama mokyakula n'erikanyirira. 25Neryo Barnaba na Saũlo mobalũa eYerũsalema, ibamabibuga omũbĩrĩ wabo. Mobaletanĩa Yoane Marĩko haguma nabo.

will be added

X\