EMĨBĨRĨ Y'ABAKWENDA 11

1Neryo abakwenda n'abalĩkyetu ababya eYũdea hosĩ mobowa kw'Ebihanda nibya byabiriangirira ekĩnywa kya Nyamuhanga. 2Kandi omugulu Petero ahetukira eYerũsalema, ababya babwene mobalwa naye, 3bati, Uwe mowaya omo nyũmba y'abandu batabwene, kandi mowalya haguma nabo. 4Nĩkwa Petero mwatsũka erĩkanĩryabo, n'eritondekago mo muguma muguma, ati, 5Nabya oko mũyĩ w'eYopa iningasaba. Monalota omo nzolĩ. Monalangira ekindu ng'olukimba lunene olũkandagalĩbawa omo syosondo, ĩlũkalũa omo kyanya, neryo mokyambĩkako. 6Neryo nabere ngasamalirakyo, n'erilola kukyo, monalangira esyonyama sy'amagulu ani sy'ekihugo, n'esyonyama esy'omolĩ n'esyonzoka, n'esyonyonyũ sy'ekyanya. 7Kandi monowa omulenge akabũga nage ati, Petero, hangana, ũsĩnze, ulye! 8Nĩkwa monabũga nyiti, Lero iyihi Mukama! Kusangwa sindinatalya na kera ekindu kĩtabũyĩrĩre kutse ekĩtũndatũndĩre. 9Neryo omulenge mwalũa elubula mwasũbĩrya engendo y'akabiri ati, Ebyo Nyamuhanga abĩrĩerya, isiwahulabyo mo bĩtabũyĩrĩre. 10Omwatsi oyũ mwahĩka engendo ĩsatu, neryo-neryo ekyo mokyasumbirwa omo kyanya. 11Neryo lebaya, oko saa eyo; abandu basatu mobahĩka embere w'enyũmba eyo twabya twĩkeremo, ibabiritumwa ũkw'ĩngye bakalũa eKaĩsarĩa. 12Neryo Omũlĩmũ mwambwira ati, nyigende nabo butsira eritika-tika. Neryo abalĩkyetu ndatu aba mobagenda haguma nage eKaĩsarĩa, neryo motwmgira omo nyũmba ya Kornelĩo. 13Naye mwatubwira ngoko alangira omũlaĩka inianimene omo nyũmba yiwe, oyo wamubwira ati, Utume omundu y'eYopa ubirikire Sĩmonĩ oyukahulawa mo Petero, ase hano; 14Naye asyakũrũlĩra ebĩnywa ngoko wasyalamĩbwa, uwe n'enyũmba yawe yosĩ. 15Neryo omugulu natsũka erĩbũga, Omũlĩmũ Abũyĩrĩre mwandagalira kubo ngoko atwandagalirako erĩmbere. 16Neryo monibuka ekĩnywa Omukama abũga ati, Yoane abatĩsaya omo magetsi, nĩkwa ĩnywe mwasyabatĩsĩbwa omo Mũlĩmũ Abũyĩrĩre. 17Neryo Nyamuhanga mwahabo olũsũnzo olo atuha twabĩkĩrĩrya Omukama Yesu Kristo, nage nabyandi nyiti nangatoka erĩkakĩrya Nyamuhanga kwehĩ? 18Neryo babere bowa ebyo, mobabya bũkũtũ, mobapipa Nyamuhanga bati, Kwesĩ, Nyamuhanga abiriha oko Bihanda nibya eribindula omutima n'eribana engebe. 19Neryo abĩkĩrĩrye mobapanza-panzwa busana n'erĩendererya eryatsũka ekiro Setefano ĩtawa. Abandi mobaya eFoĩnĩkĩ, n'eKĩpũro, n'eAntĩokĩa, ibakabwira Abayũda basa ekĩnywa kya Kristo. 20Nĩkwa abandi ba kubo, abandu b'eKĩpũro, n'ab'eKũrene, mobahĩka eAntĩokĩa, ĩbakabũga n'Abagĩrĩkĩ nibya, ĩbakatũla Engulu y'Omukama Yesu. 21Kandi Omukama abya haguma nabo, n'abandu bangi mobĩkĩrĩrya mobabindukira Omukama. 22N'engulu yabo moyahĩka oko kanĩsa y'eYerũsalema, neryo mobatuma Barnaba eAntĩokĩa. 23Neryo abere ahĩka n'erilangira olukogo lwa Nyamuhanga, mwatsema, neryo mwahanabo ati, abosĩ bakwame Omukama n'omutima asĩkĩre, n'eritendiregula. 24Barnaba abya mundu mubuya, ĩnĩoswĩre n'Omũlĩmũ Abũyĩrĩre n'erĩkĩrĩrya. Kandi abandu bangi mobakwama Omukama. 25Neryo Barnaba mwaya eTarso erĩyasondya Saũlo. 26Neryo abere amubana eyo mwamuleta eAntĩokĩa. Neryo omo mwaka muguma mobahĩndana n'abandu b'ekanĩsa, mobakangĩrĩrya abandu bangi. Nĩkwa eAntĩokĩa yo abiga batsũkĩra eriahulwa mo Bakristo. 27Neryo oko biro ebyo, abandi bamĩnyererĩ mobaya eAntĩokĩa bakalũa eYerũsalema. 28Neryo omuguma wa kubo erĩna liwe iyo Agabo, mwahangana, mwaminyerera omo bũtokĩ b'Omũlĩmũ ati, Hakandisyabya enzala nene omo kihugo kyosĩ. Nĩkwa enzala eyĩ moyahĩka omw'itabala ly'omũtabalĩ mukulu ye Klaũdĩo. 29Neryo obuli mundu w'oko biga mobayĩsũnza erituma esyofranka ngoko bangatoka busana n'omũbĩrĩ w'erĩwatĩkya abalĩkyetu abĩkere eYũdea. 30Neryo mobakola batya, mobatuma esyofranka oko bakulu b'ekanĩsa omo byala bya Barnaba na Saũlo.

will be added

X\