EMĨBĨRĨ Y'ABAKWENDA 10

1Neryo Ekaĩsarĩa yabya omundu oyukahulawa mo Kornelĩo. Abya mukulu w'ekisambala ky'abasĩrĩkanĩ erĩgana, abakahulawa mo mulondo w'eĨtalĩa. 2Abya mundu w'eKisomo, oyo wabya akaramya Nyamuhanga, iye n'enyũmba yiwe yosĩ. Kandi mwabya akaha ebindu by'oko bera b'Abayũda, kandi abya akasaba Nyamuhanga emigulu yosĩ. 3Neryo hakũhĩ n'esaa mwenda y'eritungi, mwalangira ndeke omo bũlĩme omũlaĩka wa Nyamuhanga akamũhĩkako, n'erimubirikira ati, Kornelĩo! 4Neryo mwasamalira omũlaĩka oyo n'eriubaha lĩnene, ati, Mukama, ũtĩkĩ kwehĩ? Neryo omũlaĩka mwamubwira ati, Nyamuhanga abĩrĩrĩga erisaba lyawe, n'olũsũnzo lwawe, kandi abirikwibuka. 5Na lino utume abandu b'eYopa, ubirikire eyo y'omundu erĩna liwe yo Sĩmonĩ, kandi akahulawa mo Petero. 6Ĩkere haguma n'omũbambĩ w'ebihu, oyukahulawa mo Sĩmonĩ. Enyũmba yiwe iri hakũhĩ n'engetsi. 7Neryo omũlaĩka oyo wabũga naye abere abigenda, Kornelĩo mwabirikira abagombe buwe babiri n'omũsĩrĩkanĩ muguma w'ekisomo, oyo wabya akamukolera. 8Neryo mwatumabo eYopa iniamabibwirabo ndeke emyatsi yosĩ eyo. 9Neryo engyakya abakwenda aba ibane omo nzira ibakasonda erĩhĩka eYopa, Petero mwaya omo kyumba ky'endata akayasaba, hakũhĩ n'esaa sĩta. 10Neryo Petero mwakwa enzala mwasonda erirya. Nĩkwa omugulu babya bakahũka kalyo, Petero mwayato, mwalota. 11Neryo mwalebya olubula ilukingukere, neryo ekindu ng'olukimba lunene olũkandagalĩbawa omo syosondo ĩnĩ syalo erĩhĩka oko kitaka. 12Iluli mw'esyonyama esy'amagulu ani, n'esyonzoka, n'esyonyonyũ sy'ekyanya. 13Neryo omulenge mwamũhĩkako ati, Petero, hangana, ũsĩnze, ulye. 14Nĩkwa Petero mwabũga ati, Lero iyihi, Mukama! Sindinatalya na kera ekindu kĩtabũyĩrĩre kutse ekĩtũnda-tũndĩre. 15Neryo omulenge mwamubwira engendo y'akabiri ati, Ebyo Nyamuhanga abĩrĩerya, isiwaswahulabyo mo bĩtabũyĩrĩre. 16Omwatsi oyo mwahĩka engendo ĩsatu; neryo-neryo ekindu ekyo mokyasumbirwa omo kyanya. 17Neryo Petero mwahanga-hangya omo bũlengekanĩa buwe erilota eryo alangira nga nĩkĩ. Neryo, lebaya, abalume abo Kornelĩo atuma, babere babĩbũlya busana n'enyũmba ya Sĩmonĩ, mobimana oko lũkyo. 18Mobabirikira ĩbakabũlaya Sĩmonĩ Petero ng'anĩkereho. 19Neryo omugulu Petero akĩnaganĩraya omwatsi w'erilota eryo, Omũlĩmũ mwamubwira ati. Lebaya! abandu basatu bakakusonda-sonda. 20Nĩkwa hangana, wandagale eyĩkwa, ugende nabo; sutikatike, kusangwa ĩngye natumabo. 21Neryo Petero mwandagalira oko bandu abo, mwabũga nabo ati, Lebaya, ĩngye indi oyo mukasonda-sonda. Mũlĩasirakĩ kwehĩ? 22Nabo mobabũga bati, Kornelĩo, omukulu w'erĩgana, ni mundu utunganene oyũkaramaya Nyamuhanga, kandi akakengawa n'abandu bosĩ b'Abayũda. Ahanawa n'omũlaĩka wa Nyamuhanga akutumireko eriya ewuwe, owe ebĩnywa byawe. 23Neryo Petero mwakokyabo omo nyũmba mwahabo ah'erigotsera. Engyakya Petero mwahangana mwagenda nabo, n'abandi balĩkyetu b'eYopa mobagenda haguma naye. 24Neryo engyakya Petero mwahĩka eKaĩsarĩa. Nĩkwa Kornelĩo abya akalindabo, iniabiribirikira ab'ekĩtũnga kiwe n'abĩra buwe. 25Neryo omugulu Petero abya akingira omo nyũmba, Kornelĩo mwahĩndana naye, mwatũlama oko bisando biwe, n'erĩmũramya. 26Nĩkwa Petero mwamũhanganĩa ati, Hangana, ĩngye nage indi mundu. 27Neryo Petero abere akakanĩa naye, mwingira omo nyũmba, mweya bandu bangi ĩbamabĩhĩndana. 28Neryo mwabwirabo ati, Ĩnywe mũnasĩ ngoko Mũyũda siatolere omo Migambo erisiba kutse eriyabana omundu w'ekindi kihanda. Nĩkwa Nyamuhanga abĩrĩnyĩkangya ati sinangahula omundu mo mubi kutse oyũtsandĩre. 29Kyo kyalekĩre inasa, isinditagana omugulu mwanyibirikira. Neryo ngababũlaya nga mwamanyitumirako busana nakĩ? 30Neryo Kornelĩo mwabũga ati, Byamatakya biro bini, oko ndambĩ ng'eno, nabya ngasabira omo nyũmba yage oko saa mwenda y'eritungi, Neryo lebaya, omundu w'esyongimba sĩhenĩrye mwimana embere syage, 31ati, Kornelĩo! Nyamuhanga abĩrĩowa erisaba lyawe, kandi abiryibuka olũsũnzo lwawe. 32Utume omundu y'eYopa, ubirikire Sĩmonĩ oyukahulawa mo Petero, ase ewawe. Ĩkere omo nyũmba ya Sĩmonĩ omũbambĩ w'ebihu, naye ĩkere hakũhĩ n'engetsi. 33Neryo-neryo monakutumirako, nawe wamayira ndeke ũkahĩka. Na lino ĩtwe bosĩ tune hano emuliro wa Nyamuhanga erĩowa ebyosĩ ebyo Mukama abirikuhana. 34Neryo Petero mwatsũka erĩbũga ati, Namaminya ndeke lino ngoko Nyamuhanga siawite ebitaga. 35Nĩkwa omo buli kihanda omundu oyukubaha Nyamuhanga, n'erikola ebitunganene akalĩgawa naye. 36Nyamuhanga mwatuma ekĩnywa oko bandu ba Ĩsraelĩ, erĩtũla Engulu Yowene y'obuholo busana na Yesu Kristo, naye ni Mukama w'abandu bosĩ. 37Ĩnywe mũnasĩ omwatsi owahĩka eYũdea hosĩ, erĩtsũka eGalĩlaya, enyũma w'erĩbatĩsya eryo Yoane akangĩrĩraya. 38Kandi mũnasĩ Yesu w'eNazaretĩ, ngoko Nyamuhanga amũtũlĩra Omũlĩmũ Abũyĩrĩre n'obũtokĩ. Yesu mwalendera ehosĩ akakola ebibuya, n'erĩlamya abosĩ abanũbĩbawa n'eSatanĩ, kusangwa Nyamuhanga abya haguma naye. 39Netu tuli balangĩrĩ b'emyatsi yosĩ Yesu akola omo kihugo ky'Abayũda n'eYerũsalema. Kandi mobamwĩta nibya erimukongomerera oko musalaba. 40Nĩkwa Nyamuhanga mwamũlũbũkya enyũma w'ebiro bisatu, kandi mwaleka inialolwako. 41Nĩkwa abandu bosĩ mobatamulolako, nĩna twe twabya balangĩrĩ abo Nyamuhanga ayisoga erĩmbere. Ĩtwe motwalya n'erĩpũlya haguma naye abĩlũbũka oko baholĩ. 42Neryo Yesu mwatuhana ati tũkangĩrĩraye Engulu Yowene oko bandu, n'erĩtũlago kw'ali Oyo Nyamuhanga ahĩra mo Mũtswerĩ w'abaliho, n'Omũtswerĩ w'abaholĩre. 43Abamĩnyererĩ bosĩ mobatũla omwatsi wuwe bati, Omo bũtokĩ bw'erĩna liwe obuli mundu oyũkamwĩkĩrĩraya abiribana eribuyira ly'ebibi. 44Neryo Petero abere akĩnabũga ebĩnywa ebĩ, Omũlĩmũ Abũyĩrĩre mwawa oko bosĩ abowa ebĩnywa ebĩ. 45Neryo abĩkĩrĩrye bosĩ b'Abayũda abasa haguma na Petero mobasweka, kusangwa Nyamuhanga mũtũlĩra ab'Ebihanda nibya olũsũnzo lw'Omũlĩmũ Abũyĩrĩre. 46Kusangwa bowabo bakabũga omo yindi mĩbũge, ĩbakahamaya Nyamuhanga. Neryo Petero mwabũga ati, 47Abandu aba babiriangirira Omũlĩmũ Abũyĩrĩre nga twe. Ko nindi angakagabo erĩbatĩsĩbwa omo magetsi kwehĩ? 48Neryo Petero mwahana ati babatĩsĩbawe omo lĩna lya Yesu Kristo. Neryo mobabũlya Petero bati ĩkale nabo ebindi biro.

will be added

X\