EMĨBĨRĨ Y'ABAKWENDA 1

1Omo kitabu kyage ky'erĩmbere monakusakira emyatsi yosĩ eyo Yesu akola n'erĩkangĩrĩrya, erĩtsũka ekiro ahasa omũbĩrĩ, 2n'erĩhĩka oko kiro atwalawa endata elubula. Nĩkwa embere w'eritwalwa liwe endata, mwahana abakwenda abo aylsoga eribya buwe, omo bũtoki bw'Omũlĩmũ Abũyĩrĩre. 3Omo biro makũmĩ ani enyũma w'obuligo buwe, Yesu mwayĩkangya kubo esyongendo nyingi kw'aneho, omo bĩmĩnyĩsyo bingi by'ekwenene . Kandi mwabutukira kubo, iniakabwirabo emyatsi y'obwami bwa Nyamuhanga. 4Neryo abakwenda babere babĩhĩndana, Yesu mwahanabo ati, Sĩmũlũe eYerũsalema, nĩkwa mulinde oyo Tata wage alaga, yo n'oyo nabagambulira. 5Kusangwa Yoane mwabatĩsya omo magetsi, nĩkwa ĩnywe mwasyabatĩsĩbwa omo Mũlĩmũ Abũyĩrĩre hate hakya biro bingi. 6Neryo abakwenda babere bahĩndana haguma, mobabũlya Yesu bati, Mukama, ũkandĩsũbya obwami uku Ĩsraelĩ mangahano kwehĩ? 7Yesu mwabwirabo ati, Tata abiritegeka emigulu n'ebirimo omo hamũlĩ yiwe ĩyowene. Kandi si mwatsi wenyũ eriminyabyo. 8Nĩkwa mwasyabana obũtokĩ omugulu Omũlĩmũ Abũyĩrĩre asyabahĩkako. Kandi mwasyabya batũlĩ b'omwatsi wage eYerũsalema n'omo Yũdea yosĩ, n'eSamarĩa, n'erĩhĩka oko ndũlĩndũlĩ sy'ekihugo. 9Neryo abere abĩbũga emyatsi eyĩ, Yesu mwasumbirwa endata ibanatungerere, n'ekĩtũ mokyamwĩmya erĩlũa oko meso wabo. 10Nĩkwa babere banemulalamira omo kyanya akagenda, neryo lebaya, abandu babiri ab'esyongimba nyeru-nyeru, mobahangana hakũhĩ nabo, 11bati, Ĩnywe balume b'eGalĩlaya, busana nakĩ mukahangana aho mukasamalira omo kyanya kwehĩ? Yesu oyukabitwalwa elubula akalũa ũkw'ĩnywe, asyaswasa atya ngoko mukabimusamalira akaya elubula. 12Neryo mobasuba eYerũsalema bakalũa oko kitwa ekikahulawa mo Zeĩtũnĩ, ekiri hakũhĩ n'eYerũsalema ng'ekilometre kiguma. 13Neryo babere bahĩka eYerũsalema, mobahetukira endata omo kyumba ky'enyũmba aho babya bĩkere. Nabo babya Petero, na Yoane, na Yakobo, na Anderea, Fĩlĩpo na Toma, Bartolomayo, na Matayo, Yakobo mugala wa Alfayo, na Sĩmonĩ Zelote, na Yũda mugala wa Yakobo. 14Abosĩ abo mobahĩndana okw'isaba emigulu yosĩ, haguma n'abakalĩ, na Marĩa nyĩnya wa Yesu, n'abagala babo Yesu. 15Oko mugulu oyo, Petero mwahangana omw'ĩhĩndana ly'abalĩkyetu, abandu ng'erĩgana liguma n'amakũmĩ abiri. Neryo mwabũga ati, 16Balĩkyetu, Amasako abya atolere eribererera ago Mũlĩmũ Abũyĩrĩre aminyerera omo buno bwa Dawĩdĩ busana na Yũda, oyo wabya mũsondolĩ w'abatsimba Yesu. 17Yũda oyũ aganzawa haguma netu, kandi mwasangira netu omo mũbĩrĩ oyo. 18(Nĩkwa Yũda oyo, mwagula ekitaka omo bũgũlĩ bw'ebibi biwe; n'aho mwatoga n'omutwe wuwe mwatsũka ahisi, kandi mwatulika omo katĩkatĩ n'ebila biwe mobyasandukala. 19Kandi abandu bosĩ ababya bĩkere eYerũsalema mobaminya omwatsi oyo; kyaleka ekitaka ekyo ikyahulwa omo mũbũge wabo mo Hakeldama, kiti, Ekitaka ky'omusasi.) 20Kusangwa kĩsakĩre omo kitabu ky'eSyonyimbo kiti, Enyũmba yiwe ibye kĩhũma, Sĩyĩsyesyĩkala mo mundu; kandi, N'omwanya w'omũbĩrĩ wuwe, ogundi mundu ĩmayego. 21- 22Neryo hatolere omundu muguma oyo wabya netu, busana n'erĩtũla omwatsi w'erĩlũbũka ly'Omukama Yesu. Atolere iniabya mundu oyo wabirisiba haguma netu emigulu yosĩ eyo Mukama Yesu alendera haguma netu, erĩtsũka okw'ĩbatĩsya lya Yoane n'erĩhĩka oko kiro Yesu atwalawa endata akalũa ũkw'ĩtwe. 23Neryo mobahĩra embere syabo abandu babiri, ye Yosefũ oyukahulawa mo Barĩsaba, oyo wahulawa mo Yũsto, na Matĩa. 24Neryo mobasaba bati, Uwe, Mukama, ũnasĩ emitima y'abandu bosĩ. Neryo Mukama, ũkanganaye oko babiri aba, oyo wamayisoga, 25erĩĩmya omwanya w'omũbĩrĩ n'ow'obukwenda ogo Yũda asĩga akakitira ehandi eriya aho wuwe. 26Neryo mobakola obukanga busana nabo, n'ekura moyatogera uku Matĩa; neryo Matĩa mwaganzirwa oko bakwenda erĩkũmĩ n'omuguma.

will be added

X\