2 TĨMOTEO 4

1Ngakuhana embere sya Nyamuhanga n'embere sya Kristo Yesu, oyo wasyatswera abandu bosĩ, abaliho, n'ababirihola. Kandi ngabahana busana n'erĩhĩka lya Kristo n'Obwami buwe, nyiti. 2Ũtũle Engulu Yowene yiwe, kandi uhatikane erĩtũlayo omo migulu yosĩ, oko mugulu mubi, kutse oko mugulu owene. Umĩnyĩsaye abandu bo ndeke, ukungebo, ũsĩkaye emitima yabo, n'erĩkangĩrĩryabo n'eriyibombeka ndeke. 3Kusangwa omugulu asyasa isibendĩsyowa erĩkangĩrĩrya ly'ekwenene, nĩkwa basyakwama esyongumbu syabo, n'eriyibanira abakangĩrĩrya abakabũga ebĩnywa by'ekĩsehya. 4Kandi basyabũnũkala okw'owa omwatsi w'ekwenene, n'erihulikirira emitsye y'ebihaniriro. 5Nĩkwa uwe ũyĩtegaye omo myatsi yosĩ; ũyĩyĩnaye omw'iagalwa, kandi ukole omũbĩrĩ w'erĩtũla Engulu Yowene, ũberereraye ubugirire emĩbĩrĩ Nyamuhanga akuha. 6Nĩkwa ĩngye, lino nyĩkĩsĩya ĩnakwa busana n'Engulu Yowene, n'endambĩ yage y'erigenda yabĩrĩhĩka. 7Nabiriyitsinga ndeke omo matangwa, nabiribuga olugendo, nabĩrĩteya erĩkĩrĩrya lyo ndeke. 8Kandi nabiribikirwa embĩta y'eritunganene eyo Mukama, Omũtswerĩ oyutunganene, asyamba oko Kiro ekyo. Kandi si busana nage ĩngyowene, nĩkwa asyahayo oko bosĩ abanzĩre eributuka liwe. 9Ulenge kutsibu erĩnyĩhĩkako lũba. 10Dema abirinyitswako, n'eriya eTesalonĩka, kusangwa abirianza emyatsi y'ekihugo kino. Kandi Kreske abiriya eGalatĩa, na Tĩto abiriya eDalmatĩa. 11Lũka ĩyowene ali haguma nage. Wende Marĩko umulete haguma nawe, kusangwa anganyĩwatĩkya ndeke omo mũbĩrĩ. 12Nĩkwa nabirituma Tĩkĩko y'eEfeso. 13Ekiro wasyasa iwaleta erĩkotĩ ryage eryo nasĩga haguma na Karpo eTroa; kandi ulete ebitabu, nĩkwa kwilaba ulete ebitabu ebyasakawa oko ngobĩ. 14Nĩkwa Alesandũro, omũhesĩ w'emiringa, mwanyikola nabi kutsibu, Omukama asyamuliha busana n'emĩbĩrĩ yiwe. 15Ũyĩtegaye busana naye, kusangwa abya akalwa kutsibu n'erĩkangĩrĩrya lyetu. 16Omugulu nayihanganira, sihabya mundu oyukanyimira, abosĩ mobanyitswako. Nyamuhanga kumbe siangaganzirabo omwatsi oyũ! 17Nĩkwa Omukama mwanyimira, kandi mwamba amaka, kyaleka inatoka erĩtũlaganĩa Engulu Yowene, ebindi Bihanda byosĩ bitoke erĩowayo. Kandi monalamĩbwa oko buno bw'endale. 18Neryo Omukama asyanyĩlamya kw'ekibi kyosĩ, n'erinyitwala buholo omo Bwami buwe bw'elubula. Neryo olukengerwa lubye ukw'iye busana na kera na kera. Amina. 19Ũnyĩkereraye Pĩrĩsĩla na Akwĩla, n'abandu b'enyũmba ya Onesĩforo. 20Erasto mwasĩgala eKorĩnto, kandi monasĩga Trofĩmo y'eMĩleto inialwere. 21Ulenge kutsibu erĩmbĩkako embere w'omugulu w'eritsuku. Eũbũlo, akakũkeraya, na Pũde, na Lino, na Klaũdĩa, n'abandi balĩkyetu bosĩ bakakũkeraya. 22Omukama abye n'omutima wawe. Olukogo lwa Nyamuhanga lubye n'ĩnywe bosĩ.

will be added

X\