2 TĨMOTEO 3

1Nĩkwa uminye ekĩ! Oko biro by'enyũma-nyũma hasyabya emigulu ĩkalĩre. 2Kusangwa abandu basyabya abakayanza, n'erianza ebindu, abakayipipa, abakayiheka, abatsũmĩ, abatĩowa ababũtĩ babo, abate n'ewasĩngya, abatesoma. 3Basyabya b'omutima akalĩre, isibeganyira, abakalega abandi, ab'omwaga, abatsibu, abatanzĩre ekibuya, 4basyabya batebya, abatetsomana, ab'omutwe abĩmbĩre, abanzĩre erĩyĩtsemesya, ĩsĩbanzĩre Nyamuhanga; 5bakwamĩre omuhanda w'ekisomo, nĩkwa bakagana obũtokĩ bwakyo. Usage abandu ng'aba. 6Kusangwa abandi ba kubo bakingira omo manyũmba n'eriteba abakalĩ bakĩrũ, abali kw'ebibi binene, abakahekawa n'esyongumbu mĩsĩndo-mĩsĩndo. 7Abakalĩ aba bakiga ebiro byosĩ, nĩkwa sibalitoka erĩhĩka okw'iminya omwatsi w'ekwenene. 8Neryo ngoko Yane na Yambũre balwa na Musa, litya abandu aba bakalwa n'omwatsi w'ekwenene. Abandu aba sĩbeganĩraya, kandi babiritsanda omo myatsi y'ekisomo. 9Nĩkwa sĩbendĩsyahĩka hali, kusangwa obũkĩrũ bwabo bwasyaminyikala oko bandu bosĩ, ngoko bwahika uku Yane na Yambũre. 10Nĩkwa uwe wabirikwama ndeke erĩkangĩrĩrya lyage, n'emikolere yage, n'erĩyĩsũnza lyage; kandi wabirikwama erĩkĩrĩrya lyage, n'eriyibombeka lyage, n'olwanzo lwage, n'erĩyĩyĩnĩa lyage. 11Ũnasĩ erĩendererĩbwa lyage n'amalĩge wage. Kandi ũnasĩ emyatsi yosĩ eyanyĩhĩkako eAntĩokĩa, n'eIkonĩo, n'eLĩstra, n'erĩendererya lĩnene eryo nagalawamo! Nĩkwa Omukama mwanyĩlamya omo byosĩ. 12Kandi abosĩ abanzĩre erikwama engebe y'erikenga Nyamuhanga n'erimatikana na Kristo Yesu, basyendererĩbwa. 13Nĩkwa bandu babi, n'abatebya, basyakanyirira eribya babi, ibakateba abandi n'erĩtebĩbwa ĩbobene. 14Nĩkwa uwe ukwamirire omo myatsi eyo wakangĩrĩrĩbawa, n'eyo wĩkĩrĩrye ndeke. Kusangwa ũnasĩ abakangĩrĩrya bawe nga babya bahi. 15Kandi ũnasĩ erĩtsũka omo bwana bwawe wabiriminya Amasako Abũyĩrĩre, awakatoka erikuha amenge w'erikutwala okw'ilamĩbwa busana n'erĩkĩrĩrya Kristo Yesu. 16Kusangwa Amasako gosĩ Nyamuhanga yo wategekanayago. Kandi ali n'endũndĩ busana n'erĩkangĩrĩrya omwatsi w'ekwenene, kandi busana n'erikunga erihaba, kandi busana n'erihabula, n'erĩkangĩrĩrya abandu erikwama ekitunganene. 17Neryo omundu wa Nyamuhanga ahĩkane, n'erĩtokesĩbwa erikola obuli mũbĩrĩ owene.

will be added

X\