2 TĨMOTEO 2

1Neryo nawe mwana wage, ukale omo lukogo oluli busana netu erimatikana na Kristo Yesu. 2Wĩmaye ebĩnywa ebyo wowa ngabũga embere sy'abalangĩrĩ banene, ũkangĩrĩrayebyo oko bandi bandu abateregula, abakatoka erĩkangĩrĩrya abandi bandu. 3Usangire nage omo malĩge, ng'omũsĩrĩkanĩ mubuya wa Kristo Yesu. 4Omũsĩrĩkanĩ oyukakola omũbĩrĩ, anzĩre erĩtsemesya omukulu wuwe, neryo sĩalĩyĩgobaya omo myatsi y'abandi bandu. 5Oyukatsanga omo matangwa sĩalĩsĩnga atekwama ebihano by'amatangwa. 6Omũlĩmĩ oyukalima kutsibu atolere erĩtsũka erirya oko bikera. 7Ũganĩraye ebyo ngabũga, kusangwa Omukama asyakuha eriminya emyatsi yosĩ. 8Wibuke Yesu Kristo, oyo walũbũkĩbawa oko baholĩ, kandi og'omo kĩtũnga kya Dawĩdĩ, ng'Engulu Yowene eyo ngatũla ĩkabũga. 9Neryo ngagalawa kusangwa ngatũla Engulu Yowene, kandi ngabohawa omo mahulula ng'omundu mubi. Nĩkwa ekĩnywa kya Nyamuhanga sikĩbohĩre. 10Kandi busana n'omwatsi oyũ, ngayĩyĩnaya omo byosĩ busana n'abandu abayisogawa na Nyamuhanga, nabo batoke eribana erilama lya Kristo Yesu, haguma n'olukengerwa lw'erikota. 11Ebĩnywa ebĩ ni by'ekwenene, biti, Twamabya twabirihola haguma naye, Twasyabyaho haguma naye nibya; 12Twamayĩyĩnĩa, twasyatabala nibya haguma naye; Twamamugana, naye asyatugana; 13Twamalegula, iye akabya butsira eriregula, Kusangwa sialitoka eriyigana. 14Kandi wĩbũkaye abandu bawe emyatsi eyĩ, kandi uhanebo kutsibu embere sya Nyamuhanga, sibanegene busana n'ebĩnywa. Erilwa eryo siririkola ndeke, nĩkwa lĩkatsandaya abandu abakahulikirira. 15Uyire omũhwa erĩsĩmwa embere sya Nyamuhanga ng'omũkolĩ w'omũbĩrĩ oyutehemuka busana n'omũbĩrĩ wuwe. Kandi oyũkakangĩrĩraya ndeke-ndeke omwatsi w'ekwenene wa Nyamuhanga. 16Usage ebĩnywa bitya-bitya ebitekenga Nyamuhanga, kusangwa bikatwala abandu eritendiswakenga Nyamuhanga. 17Kusangwa erĩkanĩa lyabo likandisyatanda ng'ekironda kibi. Ababiri oko bakangĩrĩrya aba nĩ Hĩmeneo na Fĩleto. 18Ababiri aba babiritala oko mwatsi w'ekwenene, ĩbakabũga bati erĩlũbũka lyabirilaba, ĩbabĩrĩtsandya erĩkĩrĩrya ly'abandi bandu. 19Nĩkwa ekibanza ekyo Nyamuhanga ahĩmba kĩsĩkĩre ndeke, kandi kĩsakĩreko ebĩnywa ebĩ biti, Omukama anasĩ abandu buwe nga ni bahi. Kandi, Obuli mundu oyũkabũga ati ni w'Omukama aleke ebibi. 20Omo nyũmba nene muli ebibindi n'ebĩbo by'emihanda yosĩ. Ebindi nĩ by'ekĩtsĩpa n'eby'esyamagetsi, kandi ebindi ni by'omuti kutse eribumba. Ebindi ni by'omũbĩrĩ owene, n'ebindi ni by'omũbĩrĩ mutya-mutya. 21Omundu amera oko myatsi mibi eyĩ, asyabya ng'ekibindi ky'emĩbĩrĩ yowene, iniabirihigulwa erigasira Omukama wuwe, neryo abĩrĩsĩka busana n'obuli mũbĩrĩ owene. 22Usage esyongumbu sy'obũlwana, ukwamirire ekitunganene, erĩkĩrĩrya, olwanzo, obuholo, haguma n'abandu abakalakira Omukama omo mutima owate mo bibi. 23Nĩkwa usage ebĩnywa bĩkĩrũ ebite n'amenge, eby'obuhaka, kusangwa ũnasĩ kw'ebĩnywa ebĩ bikaleta erinegena. 24Kandi omugombe w'Omukama siatolere erinegena, nĩkwa abye mubuya oko bosĩ, abye oyo wasĩ erĩkangĩrĩrya, iniakayibombeka omugulu akakolawa nabi. 25Kandi ahehere omugulu akakunga abakalwa naye. Mbino Nyamuhanga asyahabo eribindula emitima yabo erireka ebibi, n'eriminya omwatsi w'ekwenene. 26Neryo basyaswabana obũlengekanĩa bowene n'eribala ekitego kya Dĩabolo, oyukahambabo busana n'erikola erisonda lyayo.

will be added

X\