2 TĨMOTEO 1

1Ĩngye Paũlo, omukwenda wa Kristo Yesu omw'isonda lya Nyamuhanga, natumawa erĩkanganĩa engebe eyalagawa busana n'abandu ababirimatikana na Kristo Yesu. 2Ngakusakira uwe Tĩmoteo, mugala wage mwanze: Olukogo, n'eriganyira, n'obuholo, bibye uk'uwe bĩkalũa uku Nyamuhanga Tata, na Kristo Yesu Omukama wetu. 3Ngaha Nyamuhanga oyo ngakolera yo wasĩngya, omo bunya-mutima obute mw'ebibi, ngoko aboso-kulu wage bakola. Kandi ngamuha ewasĩngya omugulu ngakwibuka ebiro byosĩ omw'isaba lyage, omo kiro n'omw'itungi. 4Namibuka emĩsonĩa yawe, kandi nyĩkwĩre olukando lw'erikulolako, obutseme bwage bwosũle. 5Neryo ngibuka erĩkĩrĩrya lyawe ly'ekwenene; ng'eryo mukaka wawe Loĩsĩ na koyo wawe Eũnĩkĩ babya bawite. Kandi nawe nyasĩ uwiteryo nibya. 6Busana n'omwatsi oyũ, Ngakwĩbũkaya nyiti, Ũtegaye olũsũnzo olo Nyamuhanga akuha omugulu nakũhĩra kw'ebyala. 7Kusangwa Omũlĩmũ ogo Nyamuhanga abirituha sialireka tukubaha; nĩkwa Omũlĩmũ wuwe akatũsũlaya omo bũtokĩ n'olwanzo, n'erĩyĩteya. 8Neryo subye n'esĩsonĩ erĩtũla omwatsi busana n'Omukama wetu; kandi subye n'esĩsonĩ busana nage ĩngye mundu w'omũlĩkĩ wuwe. Nĩkwa usangire nage omo malĩge busana n'Engulu Yowene omo maka ago Nyamuhanga akakuha. 9Iye abĩrĩtũlamya n'eritubirikira eribya bahigulwa buwe-buwe. Mwatakola atya busana n'emikolere yetu, nĩkwa busana n'erĩyĩsũnza liwe n'olukogo luwe. Kandi mwatuha olukogo olũ omwisi wa Kristo Yesu embere w'erĩtsũka ly'emigulu. 10Nĩkwa lino lwabĩrĩtũbĩsũlĩrwa omw'ibutuka ly'Omũlamya wetu Kristo Yesu. Kusangwa Kristo abiribuga amaka w'oluholo, kandi abĩrĩmĩnyĩkalya engebe n'eritindahola omo Ngulu Yowene. 11Nyamuhanga abĩrĩnyĩhĩra erĩtũla Engulu Yowene n'eribya mukwenda n'omũkangĩrĩrya. 12Busana n'omwatsi oyũ, ngagalawa omo myatsi eyo. Nĩkwa sinyĩkwĩre esĩsonĩ, kusangwa nyĩnasĩ oyo nabĩrĩkĩrĩrya, kandi nyĩnasĩ ndeke kw'akatoka erĩteya ebyo abĩrĩhĩra omo byala byage erĩhĩka oko kiro ekyo. 13Uhambe ndeke ebĩnywa by'ekwenene ebyo nakũkangĩrĩraya, ebikakuha olulengo lw'erikwama. Wĩkale omw'ĩkĩrĩrya n'olwanzo ebĩkabya byetu busana n'erimatikana na Kristo Yesu. 14Ũtegaye emyatsi mibuya eyo wabirihabwa, omo maka w'Omũlĩmũ Abũyĩrĩre oyo wĩkere omwisi wetu. 15Kandi ũnasĩ ngoko abosĩ abali omo kihugo ky'eAsĩa babirinyitswako, haguma na Fĩgelo na Hermogene. 16Omukama aganyire enyũmba ya Onesĩforo, kusangwa esyongendo nyingi ĩnĩakanyĩsĩkaya omutima. Kandi mwatabya n'esĩsonĩ busana n'amahulula wage omo nyũmba y'omũlĩkĩ. 17Nĩkwa ekiro ahĩka eRoma mwanyisonda-sonda kutsibu, neryo mwanyibana. 18Omukama amuhe eribana eriganyira ly'Omukama oko kiro ekyo. Kandi ũnasĩ ndeke ebyosĩ anyikolera eEfeso.

will be added

X\