2 ABANYA TESALONĨKA 3

1Neryo eribuga omwatsi, balĩkyetu, tuti, mutusabire, ekĩnywa kya Nyamuhanga kitsungane lũba n'erikengwa, ngoko mukakengakyo nenyũ. 2Kandi mutusabire Nyamuhanga atũlamaye oko bandu batsibu n'ababi. Kusangwa si bandu bosĩ abakĩkĩrĩraya. 3Nĩkwa Omukama sialiregula, kandi asyabasĩkya n'erĩbateya oko Mubi Oyo. 4Kandi Omukama akaleka itwayiketera nywe, tuti munemukola, kandi mwasyakola ebyo tukabategeka. 5Neryo Omukama asondole emitima yenyũ omo lwanzo lwa Nyamuhanga n'omw'ĩyĩyĩnĩa eryo Kristo akaha. 6Neryo balĩkyetu, tukabahana omo lĩna ly'Omukama wetu Yesu Kristo tuti, musage abalĩkyetu bosĩ abakagalaganda isibalikwama erihana twahabo. 7Nenyũ mũnasĩ ngoko litolere imwakola ngoko netu twakola; kusangwa motutagalaganda omugulu twabya omo katĩkatĩ kenyũ. 8Motutalira omw'omundu mo busa butaliha, nĩkwa motwakola n'erinuba omo kiro n'omw'itungi, tuti sĩtũlũhaye mundu ũkw'ĩnywe. 9Motutakola tutya ĩtukabula ehamũlĩ y'erikola tutya, nĩkwa motwakola tutya eribaha ekĩmĩnyĩsyo ekyo mwangakwama. 10Kusangwa omugulu twabya haguma nenyũ, motwabahana tuti, Oyũtanzĩre erikola omũbĩrĩ, siahabawe akalyo. 11Kusangwa tũkowa ngoko hali abandi abakagalaganda omo katĩkatĩ kenyũ, sibekola omũbĩrĩ, nĩkwa bakayigusa omo mĩbĩrĩ y'abandi. 12Neryo omo lĩna ly'Omukama Yesu Kristo, tukahana n'erisaba bandu ng'abo, tuti, Litolere ibakola omũbĩrĩ g'obuholo n'eriyikumbirira. 13Nenyũ, balĩkyetu, simuluhe erikola ndeke. 14Hamabya omundu omo katĩkatĩ kenyũ oyukagana erikenga ekĩnywa kyetu omo barua eyĩ. Muminye omundu oyo, kandi simutambe naye n'ahake, abane erihemuka. 15Nĩkwa simumuganze ng'enzĩgũ, nĩkwa mumuhane ng'omũlĩkyenyũ. 16Neryo iye Omukama w'obuholo, abahe obuholo emigulu yosĩ omo myatsi yosĩ. Omukama abye n'ĩnywe bosĩ! 17Ĩngye Paũlo ngasaka erĩkerya erĩ omo byala byage. Ko ngasaka nyitya omo syobarua syage syosĩ. 18Olukogo lw'Omukama wetu Yesu Kristo lubye n'ĩnywe bosĩ.

will be added

X\