2 ABANYA TESALONĨKA 2

1Neryo balĩkyetu, omo mwatsi w'erĩhĩka ly'Omukama wetu Yesu Kristo, n'erĩhĩndana lyetu haguma naye, tukabalemba-lemba tuti, 2Sĩmũsũka-sũkanĩbawe omo malengekanĩa wenyũ, kutse simuleke omutima wenyũ akalũa omo nda, busana n'ekĩrĩmũ, kutse busana n'eriambuka ambu nĩ kĩnywa kyetu, kutse ebarua yetu biti, Ekiro ky'Omukama kyabĩrĩhĩka. 3Simuleke mundu akabatebya omo mwatsi n'omuguma. Kusangwa Ekiro ekyo sikyendisyasa eripona n'erisuba enyũma bite byahĩka, n'Omubi Oyo ate abutuka, oyo wasyaherĩbwa. 4Iye akalwa n'esyosĩ esyo abandu bakahula mo nyamuhanga, n'ebyosĩ abandu bakaramaya. Asyayĩhamya endata oko syosĩ, n'eriya omo Hekalũ ya Nyamuhanga, n'erĩĩkala oko kĩtũmbĩ omo Hekalũ, n'eriyahula mo Nyamuhanga. 5Simulyibuka ngoko nababwira emyatsi eyĩ omugulu nabya nyikine nenyũ kwehĩ? 6Kandi mũnasĩ ekĩkamũkakĩraya lino, erĩhĩka oko mugulu Omundu Mubi oyo asyabĩsũlwa. 7Nĩkwa Obubi obũbĩsĩre bukakola na lino, nĩkwa oyũkakakĩrĩrayabo asyakakĩrya erĩhĩka oko mugulu asyalũsĩbwaho. 8Neryo Omundu Mubi oyo asyabĩsũlwa, n'Omukama Yesu asyamwĩta omo muka w'obuno buwe, n'erĩmũtogotya omo lukengerwa lw'erihuluka liwe. 9Neryo Omundu Mubi oyo asyasa omo bũtokĩ bw'eSatanĩ n'erikola ebitiko-tiko by'emĩsĩndo yosĩ n'ebĩmĩnyĩsyo by'amabehĩ, n'eby'eriswekera. 10Kandi asyakola omo mĩsĩndo yosĩ y'eriteba nabi busana n'abakandisyahera. Nabo basyahera kusangwa mobatangirira kutse erianza ekwenene, eyangaleka ĩbalamĩbwa. 11Busana n'omwatsi oyũ, Nyamuhanga akatumirabo eriteba erĩkalĩre, erikaleka ĩbĩkĩrĩrya eby'amabehĩ. 12Neryo kyasyaleka abosĩ abatĩkĩrĩrye oko mwatsi w'ekwenene, nĩkwa bakatsemera ebibi, ĩbasĩngwa. 13Nĩkwa litutolere eriha Nyamuhanga y'ewasĩngya emigulu yosĩ, busana n'ĩnywe balĩkyetu, ĩnywe banze b'Omukama. Kusangwa Nyamuhanga ayisoga nywe erĩmbere eribana erilama busana n'Omũlĩmũ oyukabahigula, kandi kusangwa mwabĩrĩkĩrĩrya omwatsi w'ekwenene. 14Nyamuhanga mwababirikira busana n'ekĩ omugulu twabakangĩrĩraya Engulu Yowene, imwatoka eribana olukengerwa lw'Omukama wetu Yesu Kristo. 15Neryo balĩkyetu, muhangane ĩmũnasĩkĩre, kandi muhambe ndeke emyatsi y'ekwenene eyo twabakangĩrĩraya, omo bĩnywa byetu n'omo barua yetu. 16Neryo Omukama wetu ye Yesu Kristo, na Nyamuhanga Tata wetu, oyo watwanza, n'erituha busana n'olukogo luwe erĩsĩbĩkya ly'erikota n'amaha mabuya, 17asĩbĩkaye emitima yenyũ, n'erĩbasĩkya omo buli mwatsi mubuya mukakola kutse mũkabũga.

will be added

X\