2 ABANYA TESALONĨKA 1

1Ĩtwe Paũlo na Sĩlvano na Tĩmoteo, tukasaka ebarua eyĩ oko bandu ab'ekanĩsa eyiri eTesalonĩka, abandu ba Nyamuhanga Tata wetu, n'Omukama Yesu Kristo. 2Nyamuhanga Tata, n'Omukama Yesu Kristo babahe olukogo n'obuholo. 3Balĩkyetu, litutolere eriha Nyamuhanga ewasingya busana nenyũ oko migulu yosĩ! Kandi lyowene itwakola tutya, kusangwa erĩkĩrĩrya lyenyũ linemukula kutsibu, kandi olwanzo lw'obuli mundu omo katĩkatĩ kenyũ lunemukanyirira busana n'abandi balĩkyetu bosĩ. 4Ekyo kikaleka itwayihalamba busana nenyũ omo katĩkatĩ k'amakanĩsa wa Nyamuhanga. Tukayihalamba busana n'erĩyĩyĩnĩa lyenyũ n'erĩkĩrĩrya lyenyũ omw'endererĩbwa lyenyũ lyosĩ, n'amalĩge wenyũ, ebyo mukagalawamo. 5Ebĩ nĩ bĩmĩnyĩsyo by'eritswera litunganene lya Nyamuhanga, imwatoka eriganzwa ng'abatolere obwami bwa Nyamuhanga. Nenyũ mukagalawa kwenene busana n'obwami obo. 6Nĩkwa Nyamuhanga atunganene; asyagalya abakabagalaya. 7N'ĩnywe mukagalawa asyabaha eriluhuka, haguma netu, omugulu Omukama Yesu asyabutuka omo muliro owakaka erĩlũa elubula haguma n'abamalaĩka buwe b'amaka. 8Kandi asyasuyira abatasĩ Nyamuhanga, n'abatekenga Engulu Yowene y'Omukama wetu Yesu. 9Basyasuyirwa omw'ihera lya kera na kera, n'erisololwa embere sy'Omwami Mukulu, n'oko lukengerwa lw'obũtokĩ buwe, 10ekiro ekyo asyasa n'eripipwa n'abandu buwe bosĩ, n'erĩsĩkĩbwa n'abosĩ abakĩkĩrĩraya. Nenyũ mwasyabya haguma nabo kusangwa mwĩkĩrĩraya omwatsi twabatũlĩra. 11Ekĩ kyalekĩre itwabasabira emigulu yosĩ. Tuti Nyamuhanga wetu abayire mo bandu abatolere eribirikirwa lya Nyamuhanga. Kandi tuti omo maka wuwe aberereraye erisonda lyenyũ ly'erikola ekibuya, n'erĩhĩkanĩa obuli mũbĩrĩ mukakola omw'ĩkĩrĩrya. 12Litya mwasyapipa erĩna ly'Omukama Yesu, naye asyabapipa. Ebĩ ni busana n'olukogo lwa Nyamuhanga wetu n'Omukama Yesu Kristo.

will be added

X\