2 PETERO 3

1Balĩkyetu banze, eyĩ ni barua y'akabiri ngabasakira. Omw'ĩbĩrĩ syosĩ ngalenga erĩbũkya oko bũlengekanĩa bubuya. 2Mwangibuka ebĩnywa abamĩnyererĩ babũyĩrĩre babũga kera, n'ekihano, ky'Omukama n'Omũlamya, ekyo abakwenda benyũ babaha. 3Nĩkwa mũtsũke eriminya omwatsi ono, oko biro by'enyũma abasĩnĩngũlĩ basyahuluka, abakakwama esyongumbu syabo. Basyabasĩnĩngũlĩra bati, 4Mwatalaga ati akandisyasa kwehĩ? Abotata wetu babirihola, nĩkwa emyatsi yosĩ ine ngoko yitula okw'ihangikwa ly'ekihugo. 5Kusangwa omugulu bakabũga batya, bakagana eryĩbũkya omwatsi oyũ, ngoko kera Nyamuhanga mwabũga ekĩnywa, neryo olubula n'ekihugo mobyahangikwa. N'ekihugo mokyahangikwa erĩlũa omo magetsi, 6kandi busana n'amagetsi. Kandi ekihugo ky'omugulu oyo mokyaherĩbwa omw'igunga ly'amagetsi. 7Nĩkwa olubula lwa sesene, n'ekihugo kya sesene, omo kĩnywa kya Nyamuhanga, bĩbĩkĩre busana n'erĩhĩsĩbwa omo muliro. Bĩbĩkĩre busana n'ekiro ekyo abandu abatakenga Nyamuhanga basyatswerwa n'erĩherĩbwa. 8Nĩkwa abanze, simwibirirawe omwatsi muguma oyũ, ngoko Mukama akalangira ekiro kiguma ng'emyaka elfu nguma (1000), n'emyaka elfu nguma (1000) ng'ekiro kiguma. 9Nĩkwa Omukama sialiamala busana n'erilaga liwe ng'abandi ko bakaganĩraya. Nĩkwa akayitsingirira busana nenyũ, ĩsĩanzĩre omundu n'omuguma akahera, nĩkwa anzĩre abandu bosĩ ibabindula emitima yabo n'erireka ebibi. 10Nĩkwa Ekiro ky'Omukama kyasyahĩka ng'omũrahĩ. Oko kiro ekyo, olubula lwasyalũaho omo lukanda lunene, n'ebyosĩ ebyahangikawa omo lubula byasyaka omo muliro, n'erĩherĩbwa. N'ekihugo n'emĩbĩrĩ yakyo byasyahĩsĩbwa. 11Neryo kusangwa emyatsi yosĩ eyĩ yasyaherĩbwa itya, ĩnywe mwangabya bandu b'omũsĩndo wahi kwehĩ? Mwangabya bandu b'emigendere ĩbũyĩrĩre n'erikenga Nyamuhanga. 12Mubye mukalindirira n'erĩhatanĩa erĩhĩka ly'ekiro kya Nyamuhanga. Oko kiro ekyo, olubula lwasyahĩsĩbwa n'erihera, n'ebyahangikawa omo lubula byasyanũna omo muliro akalĩre. 13Nĩkwa Nyamuhanga abiritulaga olubula n'ekihugo bihya-bihya, aho ekitunganene kikasiba. 14Neryo abanze, kusangwa mukalindirira emyatsi eyĩ, muyitsinge eribanika embere sya Nyamuhanga ng'abandu babuya butsira ebĩtĩngũ, ĩmwĩkere naye buholo. 15Kandi muganze eriyitsingirira ly'Omukama wetu nga ni mugulu w'erilama. Mũlĩkyetu mwanze Paũlo, mwabasakira atya, omo menge ago Nyamuhanga amuha. 16Kandi Paũlo akasaka atya omo syobarua siwe syosĩ n'eriahula emyatsi eyĩ. Omo syobarua siwe, hali emyatsi eyĩkalĩre eriminya ndeke. Nĩkwa abandi bandu abatasĩ n'abatasĩkĩre bakahengemaya emyatsi eyo, ngoko bakahengemaya awandi Masako. Aba bakayiretera erihera. 17Neryo ĩnywe banze, mwabiriminya emyatsi eyĩ, mũyĩtegaye, mukasyahekwa omo luhabo lw'abandu b'omwaga, n'eritoga erĩlũa aho mwabya mũsĩkĩre. 18Nĩkwa mubye mukakula omo lukogo n'eriminya ly'Omukama n'Omũlamya wetu Yesu Kristo. Ukw'iye habye olukengerwa, lino, n'erĩhĩka na kera. Amina.

will be added

X\