2 PETERO 2

1Nĩkwa mohahuluka abamĩnyererĩ b'amabehĩ omo katĩkatĩ k'abandu, kandi litya abakangĩrĩrya b'amabehĩ basyahuluka omo katĩkatĩ kenyũ. Nabo basyĩngĩrya erĩkangĩrĩrya ly'amabehĩ, erĩkaheraya. Abo basyagana Omukama oyo wagulabo, ibakayiretera erihera lyo lũba. 2Kandi abandu bangi basyakwama emyatsi yabo eyĩtĩsĩrĩre, kandi busana nabo, abandu basyahula enzira y'ekwenene mo nabi. 3Neryo omo muhuguru wabo abakangĩrĩrya b'amabehĩ aba, basyababana kw'endũndĩ omo malagu wabo abakangĩrĩrya b'amabehĩ aba, bakera, kandi erihera lyabo likalindirirabo. 4Kusangwa Nyamuhanga mwatabalya abamalaĩka abakola ebibi, nĩkwa mwagusabo omo lĩfero eyo bakabikawa omo mahulula n'omo mwĩrĩmya, eririndirira ekiro ky'eritswera. 5Kandi Nyamuhanga mwatabalya ekihugo kya kera, nĩkwa mwateya Noa omũtũlĩ w'eritunganene haguma n'abandi balinda, mwabalyabo ekiro aleta erigunga ly'amagetsi oko kihugo ky'abandu abatakenga Nyamuhanga. 6Kandi Nyamuhanga mwahĩra omusango oko mĩyĩ y'eSodomo na Gomora, mwasindulayo, n'eriyirayo mo kĩmĩnyĩsyo busana n'abandu abatendisyakenga Nyamuhanga. 7Kandi Nyamuhanga mwalamya Lotĩ, omundu oyutunganene. Lotĩ abya akagalwa busana n'emikolere eyĩtĩsĩrĩre y'abandu b'omwaga. 8Kusangwa omundu oyutunganene abya ĩkere omo katĩkatĩ kabo. Nĩkwa ebiro byosĩ Lotĩ mwalangira, kandi mowa emĩbĩrĩ yabo y'erĩhalya, n'omutima wuwe owatunganene mwagalwa kutsibu busana n'emĩbĩrĩ mibi yabo. 9Neryo Omukama anasĩ erĩlamya abakamukenga okw'irengwako. Nĩkwa akabika ababi erisuyirabo erĩhĩka oko kiro ky'eritswera. 10Kwilaba aho, akabikabo busana n'erisuyirabo ekiro ky'eritswera abakakwama esyongumbu syabo esĩtĩsĩrĩre sy'omubiri, isibetsomana ehamũlĩ ya Nyamuhanga. Abakangĩrĩrya aba bakalĩre, kandi bakayipipa, n'erikola erisonda lyabo. Sibekenga ab'olukengerwa b'endata, nĩkwa bakatsumabo. 11Nĩkwa abamalaĩka abalengĩrebo omo maka n'obũtokĩ sibetsongerabo n'eritsumabo embere sy'Omukama. 12Nĩkwa abandu aba balingene ng'esyonyama esitawite menge, esĩterengekanaya, esikabutawa busana n'erihambwa n'erikerwa. Bakatsuma ebyo batasĩ, kandi basyaherĩbwa haguma n'esyonyama esyo. 13Kandi basyahembwa eriagalwa busana n'erikolera abandi bo nabi. Bakatsemera erĩkũnda omw'itungi, n'eritsanga omo syongumbu syabo. Bakaleta esĩsonĩ n'obũlĩge omugulu bakalya haguma nenyũ, kusangwa bakateba. 14Ameso wabo oswĩre m'oluteto n'erikwama emyatsi yosĩ y'ebibi, bakasondola abandu batasĩkĩre, n'emitima yabo yoswĩre n'omururu; ni bana Nyamuhanga abiritakira. 15Babirikita omo nzira n'eritala, ibamabikwama enzira ya Balama, omugala wa Beorĩ, oyo wanza oluhembo lw'erikola ebitatunganene. 16Nĩkwa mwahayirwa busana n'erĩhalya liwe. Kusangwa epunda itawite menge moyabũga omo mulenge w'omundu, n'erĩkakĩrya erĩsĩre ly'omũmĩnyererĩ. 17Abandu aba balingene ng'esĩsoko esitawite amagetsi, kandi bali ng'ebĩtũ ebikahekawa n'ekihunga. Nyamuhanga abiribikirabo ahali omũhĩndanĩa. 18Kusangwa bakabũga ebĩnywa eby'obusa by'eriyipipa, ibakabirikira abandu n'eritebabo omo mwatsi w'esyongumbu sy'omubiri n'esy'erĩsĩngĩra. Abandu aba babya bakateba, babya bandu abakasonda erĩlũa ukw'abo bĩkere omo luhabo. 19Abatebya abo mobalagabo obwĩranda, nĩkwa kwesĩ nabo ni bakobe b'emibere y'esyonye; kusangwa ekĩkakĩnda omundu kikabya omukama wuwe. 20Kusangwa bamabibala ebĩtĩsĩrĩre by'ekihugo busana n'eriminya Omukama n'Omũlamya wetu Yesu Kristo, bamaswayĩgobya mubyo n'erĩkĩndwa mubyo, abandu ng'abo babiritsanda kwilaba erĩmbere. 21Kusangwa kumbe lĩlwe lyowene busana nabo eritindaminya n'ahake enzira y'eritunganene kwilaba eriminyayo, n'eritswa erĩlũa oko kihano kĩbũyĩrĩre ekyo bahabawa. 22Omwatsi abĩrĩhĩka kubo ng'omũsyo w'ekwenene owakabũga ati, Embwa ikasuba oko bisalo byayo, kandi ati, Engulube eyĩryanabĩbawa ĩkaswayĩgala-galaya omo londo.

will be added

X\