2 PETERO 1

1Ĩngye Srmonĩ Petero, omugombe n'o mũkwenda wa Yesu Kristo, ngasakira abo babiribana erĩkĩrĩrya ng'eryo tuwite busana n'eritunganene lya Nyamuhanga wetu n'Omũlamya Yesu Kristo. 2Olukogo n'obuholo bunene bibye nenyũ, kusangwa mwabiriminya Nyamuhanga n'Omukama wetu Yesu. 3Obũtokĩ bwa Nyamuhanga bwabirituha emyatsi yosĩ eyitutolere, busana n'eribyaho omo ngebe ya Nyamuhanga, n'erikenga Nyamuhanga. Abirituha emyatsi eyĩ kusangwa twabiriminya kwenene oyo watubirikira erisangira olukengerwa luwe n'obubuya buwe. 4Kandi abirituha esyondagane siwe nene, sy'esyonzwere nene, itwatoka erisangira omo buNyamuhanga buwe, imwamabibala eritsanda ly'esyongumbu sya muna-kihugo. 5Busana n'omwatsi oyũ, muyitsinge, mutomeke obubuya okw'ĩkĩrĩrya lyenyũ, kandi oko bubuya bwenyũ mutomeke eriminya; 6n'okw'iminya lyenyũ, mutomeke erĩyĩteya; n'okw'ĩyĩteya lyenyũ mutomeke erĩyĩyĩnĩa; 7n'okw'ĩyĩyĩnĩa lyenyũ mutomeke erikenga Nyamuhanga, n'okw'ikenga Nyamuhanga mutomeke obugenge, n'oko bugenge bwenyũ mutomeke olwanzo. 8Mwamakola mutya n'erikwamirirabyo, mwasyatoka, kandi mwasyakanyirira omw'iminya ndeke ly'Omukama wetuYesu Kristo. 9Nĩkwa oyutekola emyatsi eyĩ nĩ ndĩmatĩme, kandi akabula ameso, iniabiribirirwa kw'abĩrĩerĩbwa kw'ebibi biwe bya kera. 10Neryo balĩkyetu, mubye n'omũhwa w'erĩhanganĩa ndeke eribirikirwa lyenyũ, n'eriyisogwa lyenyũ, kusangwa mwamakwama mutya, simwendisyatoga na kera. 11Nĩkwa mwasyabana ehamũlĩ yosĩ y'eriingira omo Bwami bw'erikota bw'Omukama n'Omũlamya wetu Yesu Kristo. 12Neryo nasyabya ĩnyĩnasĩkĩre ebiro byosĩ erĩbĩbũkya emyatsi eyĩ, nomo mwangabya ĩmũnasĩyo n'erihangana ndeke omo mwatsi w'ekwenene ogo munawite. 13Kusangwa ngaganza nyiti, litolere omugulu nyikine omo mubiri wage, erĩbĩbũkyago. 14Kusangwa nyasĩ ngoko nyĩkĩsĩya ĩnalũa omo mubiri oyũ. Kandi Omukama wetu Yesu Kristo, abĩrĩnyĩmĩnyĩsya omwatsi oyũ. 15Neryo nasyakola n'omũhwa, imwatoka eryibuka ebiro byosĩ emyatsi eyĩ enyũma w'erigenda lyage. 16Kusangwa motutakwama amalagu w'amenge omugulu twabowĩsaya obũtokĩ n'eriasa ly'Omukama wetu Yesu Kristo, nĩkwa motwalangira obukulu buwe omo meso wetu. 17Twabyaho omugulu Nyamuhanga Tata amuha erĩsĩkya n'olukengerwa, omugulu omulenge alũa omo Lukengerwa Lũkangĩre ati, Oyũ ni Mugala wage mwanze, oyo wabĩrĩnyĩtsemesya ndeke. 18Ĩtwe netu, motowa omulenge oyũ akalũa elubula, omugulu twabya haguma naye oko kitwa kĩbũyĩrĩre. 19Busana n'omwatsi oyũ, tukayiketera ekĩnywa ekyabũgawa n'abamĩnyererĩ. Nenyũ mutolere imwatsomanakyo ng'etala eyĩkakoleraya ahali omwĩrĩmya, erĩhĩka okw'ikya ly'eKiro ekyo, n'erĩhĩka aho mugulu engũnũnũ y'engyakya-ngyakya yasyakolerya omo mitima yenyũ. 20Nĩkwa mũtsũke eriminya omwatsi oyũ: Sihali mundu oyo wangakũmbũla eriminyerera ly'amasako ĩyowene-wene. 21Kusangwa sihali eriminyerera eryahĩka na kera omw'isonda ly'omundu, nĩkwa abandu mobabũga ebĩnywa ebyo Nyamuhanga ahabo, ĩbakasondolĩbawa n'Omũlĩmũ Abũyĩrĩre.

will be added

X\