2 ABANYA KORĨNTO 9

1Kusangwa sinangasyakusakira omwatsi w'erĩwatĩkya abandu ba Nyamuhanga abali eYũdea. 2Kusangwa nyĩnasĩ omũhwa wenyũ w'erĩwatĩkya, kandi nabiribahalambira oko bandu b'eMakedonĩa. Nyiti, abandu abali omo kihugo ky'Abagĩrĩkĩ, babya basĩkĩre oko mwaka owalaba. Kandi omũhwa wenyũ abirireka abangi ba kubo nabo ibanza erĩhĩra omo kĩbo ekyo. 3Neryo lino ngatuma abalĩkyetu aba, neryo eriyihalamba lyetu busana nenyũ siribye buyira omo mwatsi oyũ. Neryo ngoko nabya ngabũga, imwabya ĩmũnasĩkĩre. 4Neryo abandi ab'eMakedonĩa bamasa haguma nage, bakasyabeya ĩsĩmũsĩkĩre, itwamahemuka, nenyũ nibya, busana n'omwatsi w'eriyihalamba lyetu busana nenyũ. 5Kyaleka ĩnaganĩrya nyiti, litolere itwalemba-lemba abalĩkyetu ĩbatsũka erigenda ewenyũ erĩmbere, n'erĩtegekanĩa olũsũnzo lubuya olo mwalaga erĩmbere, litya olũsũnzo olo ilwabya lũsũnzo lw'ekwenene butsira olũsũnzo lw'erihatikanwa. 6Uminye ekĩ, oyukabiba bike asyagesa bike; n'oyukabiba bingi asyagesa bingi. 7Obuli mundu ahĩre omo kĩbo ngoko abiriyisoga omo mutima wuwe; siahe n'obuhemu, kutse erĩkũnwa; kusangwa Nyamuhanga anzĩre omundu oyukaha n'erĩyĩsyandira. 8Kandi Nyamuhanga akatoka eribaha ebĩlabĩre obwaga bwenyũ, imwabya n'ebyosĩ ebibatolere, n'ebikabwaga busana n'obuli mũbĩrĩ owene. 9Ngoko kĩsakĩre kiti, Akahĩtaya ndeke busana n'abera, Obwenge buwe ni bw'erikota. 10Neryo Nyamuhanga oyukaha embuto okw'oyukabiba, n'obundu bw'erirya asyabaha embuto, n'erĩlasyayo ndeke, n'erireka imwagesa binene busana n'ekibuya kyenyũ. 11Asyabatekesya omo byosĩ imwatoka erĩhĩtya ndeke, neryo abandu bangi basyaha Nyamuhanga y'ewasĩngya busana n'olũsũnzo olo mukatuma omo byala byetu. 12Kusangwa erikola omũbĩrĩ oyũ siendisyabuga obwaga bw'abandu ba Nyamuhanga busa, nĩkwa kwilaba aho asyaleka abandu ibaha Nyamuhanga y'ewasĩngya nene. 13Kandi busana n'ekĩmĩnyĩsyo ky'omũbĩrĩ wenyũ oyũ, abangi basyaha Nyamuhanga olukengerwa ĩbakalebaya ngoko mukakenga Engulu Yowene ya Kristo, eyo mukakwama. Kandi ĩbakalebaya ngoko mukakola ebibuya erisangira ebindu byenyũ haguma nabo n'abandi bandu. 14Neryo basyabasabira omo lwanzo lunene busana n'olukogo lunene olo Nyamuhanga abĩrĩbakangya. 15Tuhe Nyamuhanga y'ewasĩngya busana n'olũsũnzo luwe olute lwangatoka erĩkanĩbwa.

will be added

X\