2 ABANYA KORĨNTO 8

1Balĩkyetu, twanzĩre erĩbamĩnyĩsya ebyo lukogo lwa Nyamuhanga lwabirikola omo syokanĩsa sy'eMakedonĩa. 2Babirirengwako kutsibu busana n'amalĩge balolako. Nĩkwa obutseme bwabo bunene mobwaleka ĩbahĩra omo kĩbo mo bingi, nomo banabya bera kutsibu. 3Kusangwa ngababwira kwenene, mobahĩtya ebyosĩ ko bangatoka, na kwilaba aho. Kandi mobahĩtya n'omutima w'olwanzo, 4ibakatuhatikana n'eritulemba-lemba, bati babane omwanya w'erisangana omo mũbĩrĩ w'erĩwatĩkya abandu ba Nyamuhanga. 5Mobakola kwilaba obũlengekanĩa bwetu, kusangwa mobatsũka eriyiha uku Nyamuhanga, n'enyũma w'aho mobayiha ũkw'ĩtwe n'erisonda lya Nyamuhanga. 6Kyaleka itwahatikana Tĩto, oyo watsũka omũbĩrĩ oyo, tuti, abuge omũbĩrĩ mubuya oyo omo katĩkatĩ kenyũ. 7Ĩnywe mukakanyirira omo myatsi yosĩ, omw'ĩkĩrĩrya, n'omw'ĩbũga ekĩnywa, kandi omw'iminya, n'omo mũhwa munene, n'omo lwanzo lwenyũ busana netu. Neryo kandi mukanyirire omo mũbĩrĩ mubuya w'erĩhĩtya. 8Kandi sindibahana omo mwatsi oyũ, nĩkwa erĩbakanganĩa omũhwa w'abandi, ngalenga eriminya ekwenene y'olwanzo lwenyũ nibya. 9Kusangwa mũnasĩ olukogo lw'Omukama wetu Yesu Kristo. Nomo anabya muteke, mwayiyira mo mwera busana nenyũ, neryo imwatoka eribya bateke busana n'obwera buwe. 10Neryo ngaganĩraya nyiti, litolere busana nenyũ, mubuge omũbĩri ogo mwatsũka oko mwaka owalaba. Kandi ĩnywe mwabya b'erĩmbere erisonda erikola omũbĩrĩ oyo, kandi nĩna nywe mwatsũka erikolago. 11Nĩkwa lino mubugego; ngoko mwabya n'omũhwa w'erisondago, lino mubye n'omũhwa w'eribugago ndeke ngoko mwangatoka. 12Nĩkwa mwamabya n'omũhwa w'erĩhĩtya, Nyamuhanga akalĩga ebyo mundu awite, butsira ebyo atawite. 13Sĩndĩbũga nyiti, abandi banguhirawe, nenyũ mũlĩtoherawe, nĩkwa busana n'erĩrĩngĩrĩranĩa omũbĩrĩ. 14Lino obungi bwenyũ bubye busana n'erĩwatĩkya obwaga bwabo, neryo kandi obungi bwabo ĩbwawatĩkya obwaga bwenyũ, neryo omũbĩrĩ alingirirane. 15Ngoko kĩsakĩre kiti, Oyo wakuma-kuma bmgi mwatasakya, N'oyo wakuma-kuma bike mwatabulabyo. 16Ngaha Nyamuhanga y'ewasĩngya kusangwa abiriha Tĩto y'omũhwa ng'owetu busana n'erĩbawatĩkya. 17Kusangwa mwalĩga erisaba lyetu, nĩkwa kwilaba aho kusangwa abya n'omũhwa, mwayisoga omo mutima wuwe eriya ewenyũ. 18Kandi twabirituma haguma naye, omũlĩkyetu, oyũsĩmĩrwe omo makanisa gosĩ busana n'omũbĩrĩ wuwe w'erĩtũla Engulu Yowene. 19Kandi amakanĩsa abirimuha omũbĩrĩ oyo w'erirendera netu omo mũbĩrĩ mubuya ogo tukakola busana n'olukengerwa lw'Omukama, n'erĩkanganĩa omũhwa wetu busana nenyũ. 20Tũkalebaya ndeke sihabye mundu oyukatutonga busana n'omũbĩrĩ wetu oyũ, w'eritegeka ekĩbo kibuya ekĩ. 21Kusangwa twanzĩre erikola ekitolere embere sy'Omukama, n'akandi embere sy'abandu. 22Neryo tukatuma haguma nabo ogundi mũlĩkyetu. Twabirirenga mũlĩkyetu oyũ omo myatsi mingi, twabĩrĩrebya kw'ali mundu w'omũhwa, kandi kusangwa akayiketera nywe, awite omũhwa munene erĩbawatĩkya. 23Tĩto naye, nĩ mũsangĩrĩ haguma nage, kandi akakola haguma nage busana nenyũ. Abandi balĩkyetu abo ni bakwenda b'amakanĩsa, kandi bakaleta olukengerwa uku Kristo. 24Neryo mũkanganayebo olwanzo lwenyũ embere w'amakanĩsa, ibatoka eriminya busana nakĩ tukayihalamba busana nenyũ.

will be added

X\