2 ABANYA KORĨNTO 7

1Neryo ĩnywe banze betu, kusangwa tuwite esyondagane esĩ, tũyĩtegaye oko bĩtĩsĩrĩre byosĩ eby'omubiri n'eby'ekĩrĩmũ, kandi tusonde eribya ababũyĩrĩre ndeke, n'erirendera omo lubahwa lwa Nyamuhanga. 2Muyire omwanya busana netu omo mitima yenyũ; sitwetakola omundu yo nabi, sitwetatsandya mundu, sitwetateba mundu. 3Sindibabwira busana n'erĩbasĩnga, kusangwa monabũga erĩmbere nyiti muli banze b'emitima yetu, kutse busana n'erihola haguma, kutse busana n'eribyaho haguma. 4Ĩnywe ngayiketera kutsibu, kandi ngayihalamba kutsibu busana nenyũ; nabĩrĩkĩranĩbwa ndeke, ngayĩsyandira ndeke omo malĩge wetu gosĩ. 5Kusangwa twabere twahĩka eMakedonĩa motutabana obuholo. Kusangwa motwabana amalĩge ehosĩ; abandu babya bakalwa netu, n'emitima yetu yabya n'eriubaha. 6Nĩkwa Nyamuhanga oyũkakĩranaya abakabula omutima g'omo nda, mwatũkĩranĩa eritutumira Tĩto. 7Kandi si busana n'erĩhĩka lya Tĩto lisa, nĩkwa engulu aleta moyasũbya emitima yetu y'omo nda, kusangwa mwatubwira omwatsi wenyũ ngoko mwamũkĩranaya, kandi ngoko muli n'olukando busana nage, n'eririra lyenyũ, n'omuhwa wenyũ busana nage. Kyo kyaleka lino inatsema ndeke. 8Kusangwa nomo barua yage yanabĩta obũlĩge, sinyitsomene busana n'erisakayo, nĩkwa omugulu nalangira obũlĩge ebarua yage yabaletera, nanganatsomene. 9Nĩkwa lino ngatsema butsira busana n'erĩbĩta obũlĩge nĩkwa kusangwa obũlĩge obo mobwaleka imwabindula omutima. Kandi Nyamuhanga mwakola omo bũlĩge obo, neryo motutabakola nabi. 10Kusangwa obũlĩge obo Nyamuhanga akalĩga busana netu bukaleta eribindula omutima, n'eribana erilama eritawite eriswatsomana. Nĩkwa obũlĩge bw'ekihugo bukaleta oluholo. 11Neryo talebaya ngoko Nyamuhanga mwakola omo bũlĩge bwenyũ erireka ĩmwakwa omũhwa, kandi imwayihanganira. Mwaleka imwahitana, ĩmwakwa obuba, imwabya n'olukando busana nage, imwayitsinga, imwasuyira ebibi! Omo byosĩ mwabĩrĩyĩkangya ko mute ko musango omo mwatsi oyũ. 12Kandi nomo nanabasakira ebarua eyo si busana n'oyo wakola ekibi, kutse oyo wakolawa nabi. Nĩkwa nasakayo imwatoka eriminya omũhwa wenyũ busana netu embere sya Nyamuhanga. 13Omwatsi oyo alekĩre ĩtwayĩhamya. Kandi omw'ĩkĩranibwa lyetu Tĩto mwaleka ĩtwayĩsyandira busana n'obutseme, kusangwa omutima wuwe mwasuba omo nda busana n'ĩnywe bosĩ. 14Kusangwa monabũga emyatsi yosĩ omo kwenene, litya eriyihalamba lyetu busana nenyũ embere sya Tĩto, lyabiriminyikala ko liri kwenene. 15Neryo olwanzo luwe busana nenyũ lukakanyirira, omugulu akibuka ngoko ĩnywe bosĩ mwabya n'omutima w'erĩowa, kandi ngoko mwamũkokaya omo lubahwa n'erititimana. 16Ngatsema kusangwa ngatoka omo myatsi yosĩ eriyiketera nywe.

will be added

X\