2 ABANYA KORĨNTO 6

1Omo mũbĩrĩ ogo tukakola haguma na Nyamuhanga, tukabalemba-lemba tuti mwabiriangirira olukogo lwa Nyamuhanga, neryo simuleke lukabya busa. 2Kusangwa Nyamuhanga ati, Monakowa oko mugulu w'erĩsĩmwa, Kandi monakũwatĩkya omo kiro ky'omulamo. Ũlebaye, lino ni saa itolere, ũlebaye, lino ni kiro ky'erĩlamĩbwa. 3Sitwekola omwatsi owangagalya mundu, neryo omũbĩrĩ wetu siaponawe. 4Nĩkwa omo myatsi yosĩ tũkayĩkanganaya ng'abagombe ba Nyamuhanga, ĩtũkayĩyĩnaya kutsibu, itukalola oko malĩge, n'eribula ebitolere, itukagalawa. 5Tũkahũnzawa, tũkahĩrawa omo mũlĩkĩ, tukasangirirawa, tukanuba omo mũbĩrĩ, n'erĩteya n'eritindayato, n'eribula akalyo. 6Tukayisolola oko bĩtĩsĩrĩre, tukabya n'eriminya, tukayibombeka, tũkakangaya obwenge, tukamatikana n'Omũlĩmũ Abũyĩrĩre, tukanza ekwenene. 7Tuwite ekĩnywa ky'ekwenene, n'obũtokĩ bwa Nyamuhanga, kandi tuwite ekitunganene ng'ebindu by'amalwa omo byala by'amali n'eby'amalembe. 8Tũkasĩkĩbawa, kandi tukahemulawa; tukatsumulawa, n'erĩsĩmwa, bakatuganza ng'ababehĩ, nĩkwa tũkabũga eby'ekwenene. 9Tuli ng'abandu abatasĩbwe, nĩkwa tũkũmayĩre; tuli ng'abandu abakahola, nĩkwa lebaya, tuneho ndeke. Tukasuyirawa, nĩkwa sĩbetwĩta. 10Tuli ng'abandu b'obũlĩge, nĩkwa tukatsema ebiro byosĩ; tuli ng'abera, nĩkwa tukayira abandi mo bateke; isituwite kindu, nĩkwa tuwite ebindu byosĩ. 11Abalĩkyetu b'eKorĩnto, twabiribabwiririra, twabiribabwira ebyosĩ ebiri omo mitima yetu. 12Sĩtũbahatatenĩe, nĩkwa muhatatene omo mitima yenyũ. 13Ngabũga nenyũ ng'abana bage, nyiti mutukole ngoko twabiribakola, mũtũkangaye ebiri omo mitima yenyũ. 14Simumatikane n'abatĩkĩrĩrye; kusangwa ekitunganene kyangasangira kiti n'ekibi kwehĩ? Kutse ekyakakala kyanganasakana n'omwĩrĩmya kwehĩ? 15Kandi Kristo anganasangana n'eSatanĩ kwehĩ? Kutse oyo wĩkĩrĩrye anganasangira haguma n'oyũtĩkĩrĩrye kwehĩ? 16Ehekalũ ya Nyamuhanga yanganasakana n'esyosanamu kwehĩ? Kusangwa ĩtwe tuli ehekalũ ya Nyamuhanga oyuliho. Ngoko Nyamuhanga abĩrĩbũga ati, Nasyĩkala omwisi wabo, nasyalendera omo katĩkatĩ kabo; Nasyabya Nyamuhanga wabo, nabo basyabya bandu bage. 17Kusangwa Omukama akabũga ati, Neryo mũlũe omo katĩkatĩ kabo, muyisolole. Kandi sĩmũtũle oko kindu ekĩtĩsĩrĩre. Nage nasyabakokya, 18Nasyabya Tata wenyũ, Nenyũ mwasyabya bagala bage n'abali bage, Omukama w'Obũtokĩ Bosĩ akabũga atya.

will be added

X\