2 ABANYA KORĨNTO 5

1Kusangwa tũnasĩ ehema eyo tulimo, muna-kihugo yamabĩhĩmbũlwa, neryo tukandisyabya n'enyũmba eyĩkalũa uku Nyamuhanga, eyĩtahĩmbawa omo byala, eyikandisyakota elubula. 2Kusangwa tũkasĩmba omo nyũmba eyĩ, ĩtũnanzĩre kutsibu eribana obwĩkalo obũkalũa elubula. 3Neryo twamabibanabo isitwangabanika tutawite omubiri. 4Kandi omugulu tukine omo hema y'eno, tũkasĩmba ĩtũkanũbĩbawa. Sĩtwanzĩre erireka omubiri w'eno, nĩkwa twanzĩre eribana omubiri w'elubula, neryo omubiri w'engebe atoke eribya omo mwanya w'omubiri owakahola. 5Neryo Nyamuhanga abĩrĩtũtegekanĩa busana n'omwatsi oyũ, kandi abirituha Omũlĩmũ mo muwato. 6Neryo tukahanda omutima emigulu yosĩ. Kusangwa ĩtũnasĩ omugulu tukine omo mubiri situli eka w'Omukama. 7Kusangwa tukakwama omw'ĩkĩrĩrya, butsira omw'ilangira. 8Neryo tukahanda omutima, ĩtũnanzĩre erĩlũa omo mubiri oyũ, n'eribya ew'Omukama. 9Neryo ekyo twanzĩre ndeke nĩ 'tsemesya Omukama, kutse eno, kutse ewuwe. 10Kusangwa litolere ĩtwe bosĩ itwahuluka embere sya Kristo n'eritswerwa naye, neryo obuli mundu inialihwa busana n'emikolere eyo akola omo mubiri wuwe, yamabya ĩyowene, kutse yamabya ini mibi. 11Neryo kusangwa tũnasĩ olubahwa lw'Omukama, tukahanirira abandu, nĩkwa tuminyikere uku Nyamuhanga; kandi tuli n'amaha ko mwasyatuminya ndeke omo mitima yenyũ. 12Sĩtũlĩyĩmĩnyĩsaya ũkw'ĩnywe nga babuya, nĩkwa tukabaha omwatsi owangaleka imwayihalamba busana netu, imwatoka erĩsũbĩrya abakayihalamba busana n'erilolwako n'abandu butsira busana n'omwatsi w'omutima. 13Neryo twamabya ng'abasĩre, ni busana na Nyamuhanga; kandi twamabya bandu b'obũlengekanĩa, ini busana nenyũ. 14Kusangwa olwanzo lwa Kristo lukatutabalako, kandi twabiriminya ndeke ngoko mundu muguma mwahola busana n'abandu bosĩ, neryo liri ng'abandu bosĩ babirihola haguma naye. 15Kandi mwahola busana n'abosĩ, neryo abakabyaho sibabyeho busana nabo ĩbobene, nĩkwa babyeho busana n'oyo waholerabo, kandi mwalũbũkĩbwa busana nabo. 16Nĩkwa lino sitweganza omundu ngoko bandu b'omubiri bakaganza. Kandi nomo twangaganza Kristo ng'abandu b'omubiri ko bakaganza, nĩkwa lino sitwesyamuganza tutya. 17Kusangwa omundu amabya amatikene na Kristo, ni mundu muhya-muhya; emyatsi ya kera yabirirenga, neryo emyatsi mihya-mihya yabĩrĩhĩka. 18Nyamuhanga yo wabirikola ebyosĩ ebĩ, oyo watũsanganaya ukw'iye omwisi wa Kristo, kandi abirituha omũbĩrĩ w'erĩsanganĩa abandi b'ukw'iye. 19Tuti, Nyamuhanga akasanganaya bandu bosĩ ukw'iye busana na Kristo, isialiganzirabo amalolo wabo. Kandi abirituha ekĩnywa ky'erĩsanganĩa abandu ukw'iye. 20Neryo tuli bakwenda busana na Kristo, neryo Nyamuhanga akabalayira n'eribalemba-lemba. Tukabalemba-lemba busana na Kristo, tuti, Mũsanganĩbawe uku Nyamuhanga, 21Kristo mwabya butsira ebibi, nĩkwa Nyamuhanga mwamuyira ng'ow'ebibi busana netu, itwatoka eriyirwa mo batunganene ba Nyamuhanga busana n'erimatikana na Kristo.

will be added

X\