2 ABANYA KORĨNTO 3

1Tũkatsũka kandi erĩyĩmĩnyĩsya ũkw'ĩnywe ng'abandu babuya kwehĩ? Kutse litolere, ng'abandi, tukabana esyobarua sy'erĩtũsĩma embere syenyũ, kutse esyobarua esĩkalũa ewenyũ kwehĩ? 2Ĩnywe muli barua yetu, eyĩsakĩre omo mitima yetu, abandu bosĩ batoke eriminyayo n'erisomayo. 3Kandi mukaminyikala ko muli barua eyo Kristo asaka, netu tukatwalayo. Kandi ebarua eyĩ sĩsakĩre omo bwĩno, nĩkwa ĩsakĩre n'Omũlĩmũ wa Nyamuhanga oyuliho. Kandi sĩyĩsakĩre oko bisayi by'amabwe, nĩkwa ĩsakĩre oko mitima y'abandu. 4Tũkabũga tutya kusangwa Kristo akatuha eriyiketera Nyamuhanga. 5Ĩtwe bene situliyiganza nga twangatoka erikola kindu, nĩkwa eritoka lyetu lĩkalũa uku Nyamuhanga, 6oyukaleka itwatoka omũbĩrĩ w'endagane nyihya-nyihya. Endagane nyihya-nyihya eyĩ si y'emigambo eyĩsakĩre, nĩkwa nĩ y'Omũlĩmũ, kusangwa emigambo eyĩsakĩre ĩkĩta, n'Omũlĩmũ akaha engebe. 7Emigambo yabya ĩbatsĩre oko bisayi by'amabwe, kandi yahabawa omo lukengerwa lwa Nyamuhanga. Neryo abana ba Ĩsraelĩ mobataluka erisamalira obũsũ bwa Musa busana n'olukengerwa ly'obũsũ buwe, olwabya lukakeha. Neryo omwatsi w'emigambo eyikaleta oluholo mwahĩka omo lukengerwa lungaha, 8nĩkwa omwatsi w'Omũlĩmũ sialireta olukengerwa lunene kwilaba aho kwehĩ? 9Kusangwa omwatsi w'omũbĩrĩ w'emigambo owakasĩnga omundu abya n'olukengerwa, neryo omũbĩrĩ w'omwatsi owakayira omundu mo mutunganene alabĩre kutsibu omo lukengerwa. 10Kusangwa omwatsi owabya n'olukengerwa erĩmbere, lino ali nga siawite olukengerwa, wamalingĩrĩranĩalo n'olukengerwa olũlabĩre lino. 11Kusangwa ekikakeha kyamabya n'olukengerwa, ekĩkasĩgala kiwite olukengerwa kwilaba aho. 12Neryo kusangwa tuwite amaha aya, tuwite obulume-lume ndeke. 13Situli nga Musa oyo wahĩra akakimba oko bũsũ buwe, abana ba Ĩsraelĩ sibalangire erĩkangabasanĩa eryabya likakeha, n'erihwa. 14Nĩkwa amalengekanĩa wabo abya akalĩre; n'erĩhĩka mũnabwĩre ekitambara ekyo kikinaswika amalengekanĩa wabo omugulu bakasoma erilagana lya kera. Kusangwa ekitambara ekyo kĩkalũsĩbawa omugulu omundu akamatikana na Kristo. 15Kandi mũnabwĩre omugulu bakasoma ekitabu kya Musa, ekitambara ekyo kikaswika amalengekama wabo. 16Nĩkwa kĩsakĩre kiti, Akakimba ka Musa mokalũsĩbwaho omugulu abya akabindukira Omukama. 17Nĩkwa Omukama oyo nĩ Mũlĩmũ; kandi aho Mũlĩmũ w'Omukama ali, ho hali obwĩranda. 18Neryo kusangwa situwite ekitambara oko bũsũ bwetu, tũkakanganaya ng'omo kiyo olukengerwa lw'Omukama. Kandi busana n'olukengerwa luwe tũkahĩndũkĩbawa omo kĩsosekanĩo kiwe omo lukengerwa luwe, kusangwa lũkalũa oko Mukama oyuli Mũlĩmũ.

will be added

X\