2 ABANYA KORĨNTO 13

1Eyĩ ni ngendo y'akasatu ngabahĩkako. Kĩsakĩre kiti, Obuli mwatsi asyaminyikala nga ni kwenene omw'ĩtũlago ly'abalangĩrĩ babiri, kutse basatu. 2Nyanzĩre eribabwira ĩnywe mwahalaya erĩmbere, n'abandi bosĩ. Monabũga oko lugendo lwage lw'akabiri, nĩkwa lino ngabũgakyo kandi isinyiriho, nyiti, namaswahĩka eyo, sĩndĩendĩsyabalya mundu. 3Kusangwa mukasonda-sonda ekĩmĩnyĩsyo ko Kristo akabũga omo buno bwage. Naye si molo omo myatsi yenyũ, nĩkwa akakola n'obũtokĩ omo katĩkatĩ kenyũ. 4Kusangwa kwenene mwahanikwa oko musalaba busana n'obolo bw'omubiri, nĩkwa aneho omo bũtokĩ bwa Nyamuhanga. Netu nibya tuli bolo nga ye, nĩkwa twasyabyaho haguma naye omo bũtokĩ bwa Nyamuhanga omo myatsi yenyũ. 5Muyirengeko nga mukakwama omw'ĩkĩrĩrya; muyitswere! Sĩmwasĩ kwenene ko Kristo Yesu amatikene nenyũ kwehĩ? Mutetatoka ekyo imwabiritaluka. 6Nĩkwa indi n'amaha ko mwasyaminya ĩtwe sitwenditaluka omo mwatsi oyũ. 7Neryo tukasaba Nyamuhanga tuti simukole ekibi, sĩ'bũga ambu tuminyikale nga twamataluka. 8Kundi sitwangatoka erilwa n'ekwenene ya Nyamuhanga, nĩkwa tukimanira ekwenene eyo. 9Tukatsema omugulu tuli bolo, nĩkwa ĩnywe muli n'amaka; kandi tukasaba tuti, mũhĩkane ndeke. 10Busana n'emyatsi eyĩ, ngabasakira omugulu nyite haguma nenyũ, neryo omugulu nasyabahĩkako, isinangakala omo hamũlĩ eyo Mukama abirimba. Kusangwa amba ehamũlĩ eyo busana n'erĩbahĩmba, si busana n'erĩbahĩmbũla. 11Neryo balĩkyetu, obuholo! Mukwame erĩhĩkana, mowe ebyo ngabũga; mubye n'obũlengekama buguma, musibe buholo; na Nyamuhanga w'olwanzo n'ow'obuholo asyabya haguma nenyũ. 12Mũkeranaye omw'iwanako lĩbũyĩrĩre. 13Abandu bosĩ ba Nyamuhanga bakabakeraya. 14Olukogo lw'Omukama Yesu Kristo, n'olwanzo lwa Nyamuhanga, n'erĩsĩbĩkya ly'Omũlĩmũ Abũyĩrĩre, bibye n'ĩnywe bosĩ.

will be added

X\