2 ABANYA KORĨNTO 12

1Litolere inayihalamba, nomo lite lyangagasakĩ. Nĩkwa lino ngandĩkanĩa busana n'erilota n'erĩbĩsũlĩrwa ebĩkalũa oko Mukama. 2Nyasĩ Omukristo muguma, hamatalaba lino emyaka erĩkũmĩ n'eyĩnĩ, oyo watwalawa oko lubula lw'akasatu. (Sĩnyasĩ nga mwayayo omo mubiri, kutse nga siabya omo mubiri, Nyamuhanga anasĩ ekyo.) 3Kandi nyĩnasĩ omundu oyo mwatwalwa omo Paradĩso (kandi sĩnyasĩ nga mwaya omo mubiri, kutse nga siabya omo mubiri, Nyamuhanga anasĩ ekyo). 4Neryo omundu oyo mowa ebĩnywa ebitetoka erĩbũgwa, kandi ebĩnywa ebyo sibitolere erĩbũgwa n'omundu. 5Neryo ngandiyihalamba busana n'omundu oyo; nĩkwa sindiendiyihalamba busana nage, mo n'omo myatsi y'obolo bwage. 6Kumbe nyanzĩre eriyihalamba, sinangabya mũkĩrũ, kusangwa nangabũga eby'ekwenene. Nĩkwa sindiendisyayihalamba, sihabye omundu oyukanyiganza nga mundu mubuya kwilaba ebyo akalangira n'erĩowa omo migendere yage. 7Nĩkwa isinangayiheka n'erĩyĩhamya busana n'erĩbĩsũlĩrwa lĩnene erĩlabĩre, monahabwa endwala y'omubiri eyabya ng'omukwenda w'eSatanĩ w'erĩnyĩhũnza, erĩnyĩkakĩrya okw'iyiheka. 8Monasaba Omukama esyongendo ĩsatu busana n'omwatsi oyũ n'erĩmũbũlya nyiti anyĩlũsaye yoko. 9Naye mwanyĩsũbĩrya ati, Olukogo lwage lukakutoka, kusangwa obũtokĩ bwage bũkahĩkana omo bolo bwawe. Neryo nasyayihalamba omo butseme busana n'emyatsi y'obolo bwage, obũtokĩ bwa Kristo bunyibyeko. 10Neryo ngatsemera obolo, bw'eritsumwa, n'amalĩge, n'erĩendererĩbwa, n'emyatsi eyĩkalĩre, busana na Kristo. Kusangwa omugulu indi molo, indi mbangĩ. 11Nabiribya ng'omũkĩrũ, nĩkwa ĩnywe mwaleka, kusangwa nabya nyitolere erĩsĩmwa nenyũ. Nomo nangabya isindi mundu, kwenene sindi muke n'ahake oko bakwenda abo mukahula mo bakulu. 12Ebĩmĩnyĩsyo by'obukwenda bwage mobyakanganĩbwa omo katĩkatĩ kenyũ omw'iyibombeka lyosĩ. Mohabya ebĩmĩnyĩsyo, n'eby'eriswekera n'ebitiko-tiko. 13Kandi momwaganzwa ng'abake oko wandi makanĩsa kwehi? Omo kiguma kisa eky'eritindabanũbya busana n'obwaga bwage. Mondakola ndeke, munyibuyire. 14Eyĩ ni ngendo y'akasatu nyĩsĩkĩre erĩbahĩkako, kandi sĩndĩendĩsyabanũbya busana n'ekindu; kusangwa sindisonda-sonda ebindu byenyũ, n'ĩnywe ngasonda-sonda. Kusangwa si ba bana abatolere eribikira ababũtĩ babo, nĩkwa ababũtĩ bo batolere eribikira abana babo. 15Nage ngandĩhĩtya n'obutseme n'erĩyĩnũbya busana n'erĩbawatĩkya. Namabanza kutsibu, ekyo kyangaleka imwanyanza hake kwehĩ? 16Neryo mwanganalĩga ngoko ĩngye mondabanũbya, nĩkwa ogundi anganabũga ati, monabahamba omo menge omo kitego. 17Monabanyega kw'ekindu omo bandu abo nabatumira kwehĩ? 18Monasaba Tĩto nyiti agende, kandi monatuma omũlĩkyetu haguma naye. Ko Tĩto mwabanyega ko kindu kwehĩ? Netu situlirendera n'omutima muguma kwehĩ? Kandi situlikwama olugobe luguma kwehĩ? 19Mbino mwabere mũkaganĩrya muti tukayilwira embere syenyũ. Iyihi! Nĩkwa embere sya Nyamuhanga, tũkabũga ebyo Kristo anzĩre ĩtwabũga. Kandi abanze betu, ebyosĩ ebyo tukakola ni busana n'erĩbahĩmba. 20Kusangwa ngubaha nyiti, omugulu ngabahĩkako, nasyabeya isimuli n'omutima ogo nanganza, kandi nasyaminyikala ũkw'ĩnywe nga singwite omutima ogo mwanganza. Kandi mbino hasyabya malwa, obũha, erihitana, kutse obuhaka, n'eritsuma, eritonga bandu, kutse emiyiheko, kutse omwaga. 21Kandi ngubaha nyiti omugulu nasyaswahĩka, Nyamuhanga wage asyanyihemulira embere syenyũ. Neryo nasyalira busana n'abandu bangi ababĩrĩhalya, n'erĩsĩngĩra, n'erikwama esyongumbu nyibi, isibetabindula emitima yabo n'erireka ebibi ebyo.

will be added

X\