2 ABANYA KORĨNTO 11

1Nyiti kumbe mwanganyihulikirira omo bũkĩrũ bwage buke, nyiti, kĩsĩ-kĩsĩ munyihulikirire . 2Kusangwa nyĩbanzĩre kutsibu ngoko Nyamuhanga naye abanzĩre. Kandi nabĩrĩbasĩmolya ng'omumbesa mubuya oko mundu muguma ye Kristo. 3Nĩkwa ngubaha nyiti, Ngoko Eva atebĩbawa n'amenge mabi w'enzoka, kw'amalengekanĩa wenyũ asyatsandĩbwa atya, imwaleka erikwama Kristo n'olwanzo lwenyũ losĩ, n'omutima wenyũ gosĩ. 4Kusangwa mũkahũlĩkĩrĩraya lũba omundu oyukasa n'erĩtũla omwatsi w'ogundi Yesu, butsira Yesu oyo twabakangĩrĩraya. Kandi mukangirira ekindi kĩrĩmũ ekite Omũlĩmũ ogo mwangirira erĩmbere, kandi mũkalĩga eyindi ngulu eyite Engulu Yowene eyo mwalĩga erĩmbere. 5Kusangwa ngaganĩraya nga sindi muke n'ahake oko bakwenda abo mukahula mo bakulu. 6Nomo nangabya ĩsĩnyasĩ erĩbũga ndeke-ndeke, nĩkwa sindibula menge; ngoko twabĩrĩbakangya ehosĩ engendo nyingi. 7Omugulu nabatũlĩra Engulu Yowene ya Nyamuhanga mondabalĩhĩsya kindu, kandi monayĩkehya, imomwatoka erĩhamĩbwa. Monakola nabi kwehĩ? 8Omugulu nabya ngabakolera, awandi makanĩsa mobanyihemba. Nabya nga ngĩba eby'awandi makanĩsa busana n'eribakolera. 9Kandi omugulu nabya omo katĩkatĩ kenyũ inyine n'obwaga, mondanũbya mundu; nĩkwa abalĩkyetu abalũa eMakedonĩa mobanyiretera ebyosĩ ebyo nabya ngabula. Neryo omo myatsi yosĩ mondabanũbya, kandi sindiendĩsyabanũbya nibya. 10Ngoko mwatsi w'ekwenene wa Kristo ali omwisi wage, ngabũga kwenene, sindiendĩsyũmbya eriyihalamba busana n'omwatsi oyũ omo bihugo byosĩ by'Abagĩrĩkĩ. 11Ngabũga nyitya busana nakĩ kwehĩ? Kusangwa sĩnyĩbanzĩre kwehĩ? Iyihi, Nyamuhanga anasĩ ko nyĩbanzĩre. 12Nĩkwa ebyo ngakola, byo ngandisyakola, inatoka erĩkakĩrya abandi bakwenda abo eribana omwanya w'eriyihalamba, n'erĩbũga bati, bakakola ngoko ĩtwe tukakola. 13Abandu abo ni bakwenda b'amabehĩ abakateba, bakayĩsosekanaya ng'abakwenda ba Kristo. 14Oyũ si mwatsi w'eriswekera, kusangwa Satanĩ nayo ĩkayĩsosekanaya ng'omũlaĩka w'ekyakakala. 15Neryo si mwatsi akalĩre busana n'abagombe bayo, bamayĩsosekanĩa ng'abagombe b'eritunganene. Nĩkwa oko ndũlĩ basyahembwa ng'emĩbĩrĩ yabo ko yiri. 16Kandi ngabũga nyiti, sihabye mundu oyukanyiganza ng'omũkĩrũ. Nĩkwa wamanyiganza utya, neryo ũnyĩkokaye ng'omũkĩrũ, inatoka eriyihalamba hake. 17Ebyo ngabũga lino sĩndĩbũgabyo ng'eby'Omukama, nĩkwa omo mwatsi w'eriyihalamba ngabũga ng'omũkĩrũ. 18Nĩkwa kusangwa hali bangi abakayihalamba ng'abandu b'ekihugo, nage ngandiyihalamba nibya. 19Kusangwa ĩnywe muli bandu b'amenge, mũkahũlĩkĩrĩraya abakĩrũ n'obutseme. 20Ĩnywe mũkahũlĩkĩrĩraya omundu oyũkabanũbaya, kutse eribanyega, kutse erĩyĩhamya, kutse abakabaswĩraya omo bũsũ. 21Ngakwa esĩsonĩ kusangwa twabya bandu bolo abatetoka erikola batya. Nĩkwa omundu amasonda eriyihalamba, ngabũga ng'omũkĩrũ, nage ngasonda eriyihalamba. 22Nabo ni Baebrania kwehĩ? Nage ko nyine nyitya. Nabo nĩ Baĩsraelĩ kwehĩ? Nage ko nyine nyitya. Nabo ni bana ba Abrahamũ kwehĩ? Nage ko nyine nyitya. 23Nabo ni bagombe ba Kristo kwehĩ? (ngabũga ng'omũsĩre), Nage ko nyine nyitya kutsibu! Nabirikola kwilababo kutsibu, nabĩrĩhĩrwa omo mũlĩkĩ esyongendo nyingi kwilababo, nabĩrĩswĩrĩbwa ngendo nyingi kwilaba, nabiribya hakũhĩ n'oluholo ngendo nyingi kwilababo. 24Esyongendo ĩtanu monaswĩrĩbwa esyonyambĩ makũmĩ asatu n'omwenda. 25Esyongendo ĩsatu monahũnzwa omo myũtso, engendo nguma monaswĩrĩbwa. Esyongendo ĩsatu monasonda erisenda omo bwato, n'engendo nguma monasiba omo magetsi esyosaa makũmĩ abiri n'esĩnĩ. 26Nabiribya oko lugendo esyongendo nyingi, omo bwĩko bw'esyonyũsĩ, omo bwĩko bw'abarahĩ, omo bwĩko b'Abayũda b'ewetu, omo bwĩko bw'Ebihanda, omo bwĩko omo mũyĩ, omo bwĩko omo mbwarara, omo bwĩko bw'engetsi, omo bwĩko bw'abalĩkyetu b'amabehĩ. 27Nabya ngakola n'eribana obũlĩge; ngendo nyingi ĩnĩngakũbato, ĩnĩngakwa enzala n'enyota, esyongendo nyingi iningabula akalyo, ĩnĩngakwa embeho, n'eribula esyongimba. 28Kandi butsira eriahula emyatsi eyo misa, ngwite omũbĩrĩ owakalĩre w'erĩteya amakanĩsa gosĩ. 29Omugulu omundu akabya molo, nage sindibya molo kwehĩ? Omundu amakola ebibi, nage sindiagalĩbawa kwehĩ? 30Lyamabya litolere inayihalamba, ngandiyihalamba omo myatsi eyĩkakangaya obolo bwage. 31Nyamuhanga na Tata w'Omukama Yesu, erĩna liwe lipipawe kera na kera, iye anasĩ ko ndebiha. 32Omugulu nabya eDamasĩkĩ, omũtabalĩ w'omwami Areta mwabya akateya esyongyo sy'omũyĩ, ati akanyihamba. 33Nĩkwa mobanyandagalya omo kitiri omo mwanya w'olũhĩmbo, neryo monabala ebyala biwe.

will be added

X\