2 ABANYA KORĨNTO 10

1Neryo ĩngye Paũlo, oyuli molo embere syenyũ, nĩkwa oyũkalĩre omugulu nde haguma nenyũ, ngabalemba-lemba busana n'obolo n'obubuya bwa Kristo, 2Nyiti, Simuleke ngasyakala omugulu ngabahĩkako, kusangwa nyasĩ nangakala ukw'abo bakaganĩraya bati tukakola ng'abandu b'ekihugo. 3Ni kwenene twĩkere omo kihugo, nĩkwa situlilwa ng'abandu b'ekihugo. 4Ebindu byetu by'amalwa si by'ekihugo, nĩkwa ni bindu by'amaka bya Nyamuhanga busana n'erĩherya ahakongotere, 5Tũkaheraya obuhaka bw'amabehĩ, n'obuli mwatsi w'eriyiheka owakapona eriminya lya Nyamuhanga. Kandi tukahamba obuli bũlengekanĩa erĩhĩrabo erĩowa Kristo. 6Kandi omugulu mwamabĩkangya erikenga lyenyũ, ĩtwe netu tũsĩkĩre erisuyira obũtowa bosĩ. 7Ĩnywe mulangire emyatsi ngoko iri kwenene. Omundu amayiganza kw'ali mundu wa Kristo, aganĩraye kandi omwatsi wuwe, kusangwa ngoko iye ni wa Kristo, netu ko tuli ba Kristo nibya. 8Kandi nomo nangayihalamba busana n'ehamũlĩ yage kwilaba eritolere, sĩndĩkwa esĩsonĩ. Kusangwa Omukama mwamba ehamũlĩ eyo busana n'erĩbahĩmba, si busana n'erĩbaherya. 9Neryo sĩnyanzĩre eribya nga ngabũbahaya omo syobarua syage. 10Kusangwa bati, Esyobarua sya Paũlo sĩkalĩre kandi sikalamene, nĩkwa omugulu ali netu, ni mundu w'omubiri molo, n'ebĩnywa biwe ni buyira! 11Omundu ng'oyũ aminye, ngoko tũkabũga omo syobarua syetu omugulu tuteho, ko tukakola tutya omugulu tuli haguma nenyũ. 12Sĩrũlĩyĩhanaya eriyiganza kutse erĩyĩrĩngĩrĩranĩa n'abandi abakayipipa; nĩkwa omugulu bakayibanira olulengo olo bakayirengeramo, n'erĩyĩrĩngĩrĩranĩa ĩbobene, isibali n'amenge. 13Nĩkwa ĩtwe sitwendisyayihalamba kwilaba olulengo lutolere. Kusangwa tukakwama olulengo lw'omũbĩrĩ ogo Nyamuhanga abirituha, nenyũ muli omo mũbĩrĩ oyo. 14Neryo kusangwa muli omo mũbĩrĩ oyo, motutalaba olulengo olo lw'omũbĩrĩ wetu omugulu twabahĩkako n'eribaletera Engulu Yowene ya Kristo. 15Neryo sitwendisyalaba olulengo lw'omũbĩrĩ olo Nyamuhanga abirituha, n'eriyihalamba omo mĩbĩrĩ y'abandi. Nĩkwa tuli n'amaha, tuti erĩkĩrĩrya lyenyũ lyasyakula, itwatoka erikola omũbĩrĩ munene kwilaba omo katĩkatĩ kenyũ omo lulengo olo Nyamuhanga abirituha. 16Neryo twasyatoka erĩtũla Engulu Yowene omo bindi bihugo eyisirya kwĩnywe. Isitwendisyayihalamba omo mĩbĩrĩ eyabirikolwa n'ogundi mundu. 17Nĩkwa ngoko kĩsakĩre kiti, Oyukayihalamba, ayihalambe busana n'Omukama. 18Kusangwa, si yo yukayipipa yũkasĩmawa, nĩkwa omundu oyo Mukama akapipa.

will be added

X\