2 ABANYA KORĨNTO 1

1Ĩngye Paũlo, omukwenda wa Kristo Yesu, omw'isonda lya Nyamuhanga, haguma n'omũlĩkyetu Tĩmoteo, tukabasakira ĩnywe kanĩsa ya Nyamuhanga eyiri eKorĩnto haguma n'abandu bosĩ ba Nyamuhanga abali ehosĩ eAkaya. 2Nyamuhanga Tata wetu n'Omukama Yesu Kristo babahe olukogo n'obuholo. 3Nyamuhanga apipawe, ye Tata w'Omukama wetu Yesu Kristo, ye Tata w'eriganyira, na Nyamuhanga w'erĩkĩranĩa lyosĩ. 4Ni iye yũkatũkĩranaya omo malĩge wetu gosĩ, netu tutoke erĩkĩranĩa abali omo malĩge w'emĩsĩndo yosĩ. Kusangwa tũkakĩranayabo omw'ĩsĩkĩbwa eryo Nyamuhanga akatũkĩranayamo netu. 5Kusangwa ngoko tukasangira amalĩge mangi wa Kristo, litya tukasangira omwisi wa Kristo erĩkĩranĩa liwe lĩnene. 6Nĩkwa twamagalwa ni busana n'erĩbakĩranĩa n'erĩbalamya. Kandi twamakĩranĩbwa nenyũ mũkakĩranĩbawa, n'erihabwa amaka erĩyĩyĩnĩa n'eriyibombeka omo malĩge ago tukagalawamo netu. 7Neryo amaha wetu busana nenyũ asĩkĩre, ĩtũnasĩ ngoko mukasangira amalĩge wetu, ko mukasangira mutya erĩkĩranĩa lyetu. 8Kusangwa balĩkyetu, sĩtwanzĩre mukabya butaminya amalĩge wetu ago twabana eAsĩa. Nĩkwa motwagalwa kutsibu kwilaba obũtokĩ bwetu,kyaleka itwabula amaha w'eribyaho, tuti tukandihola. 9Nĩkwa twabya nga tukandihola, itwatoka eritindayiketera itwe ĩtwebene-bene, nĩkwa eriyiketera Nyamuhanga oyũkalũbũkaya abaholĩ. 10Kandi mwatũlamya oko bwĩko bosĩ bw'oluholo, kandi asyatũlamya kubo; kandi tuli n'amaha kw'akandĩsyatũlamya kandi, 11omugulu mukarũwatĩkaya omw'isaba lyenyũ. Neryo abandu bangi abakasaba busana netu batoke eriha Nyamuhanga ewasĩngya busana n'erĩwatĩkya liwe. 12Kusangwa tukayihalamba omo mwatsi oyũ: tuti obunya-mutima bwetu bũkatũlago buti, tukayitwala omo kihugo, kandi omo katĩkatĩ kenyũ, omo myatsi mibuya n'ey'ekwenene embere sya Nyamuhanga, kandi tukayitwala omo lukogo lwa Nyamuhanga butsira omo menge w'abandu. 13Kusangwa ebyo tukabasakira bye n'ebyo mukatoka erisoma n'eriminya, kandi tuli n'amaha ko mwasyaminya ndeke-ndeke. 14Emyatsi eyo mwabiriminya hake-hake lino, imwatoka eriyihalamba busana netu, netu itwayihalamba busana nenyũ oko Kiro ky'Omukama wetu Yesu. 15Busana n'eriyiketera omwatsi oyũ, nabya nyanzĩre erĩbahĩkako erĩmbere, imwatoka eribana omũyĩsa go kabiri. 16Kusangwa nyiti nabya nyanzĩre erilaba ewenyũ omo lugendo lwage lw'eriya eMakedonĩa, kandi eriswalaba ewenyũ omugulu ngalũa eMakedonĩa, imwatoka erĩnyĩwatĩkya omo lugendo lwage lw'eriya eYũdea. 17Neryo omugulu nasonda erikola litya, nabya mundu oyukakola litya-litya kwehĩ? Kutse ekyo ngasonda erikola ngakolakyo ng'omundu nyiti ega ega, kandi iyihi, iyihi, oko saa nguma kwehĩ? 18Nĩkwa ngoko Nyamuhanga sialiregula, ekĩnywa kyetu busana nenyũ mokitetabya ega, kandi iyihi. 19Kusangwa Kristo Yesu Omugala wa Nyamuhanga, oyo twabatũlĩra omo katĩkatĩ kenyũ, ĩngye, na Sĩlvano, na Tĩmoteo, iye si inga, kandi iyihi, nĩkwa iye ni Ega. 20Kusangwa ni iye oyuli Ega busana n'erilaga lyosĩ lya Nyamuhanga. Neryo busana na Yesu Kristo tukaha eAmina yetu, oko lukengerwa lwa Nyamuhanga. 21Kusangwa ni Nyamuhanga oyũkatũhanganaya haguma nenyũ omo ngebe yetu, erimatikana na Kristo, kandi Nyamuhanga yukatuhigula. 22Naye abĩrĩtũhĩra kw'ekĩmĩnyĩsyo kiwe, n'erituha Omũlĩmũ wuwe omo mitima yetu ng'omuwato. 23Nĩkwa ngabirikira Nyamuhanga ng'omũlangĩrĩ wage, iye anasĩ omutima wage, nyiti, busana n'erĩbabalya kyaleka ĩndahĩka eKorĩnto. 24Sĩtwanzĩre eritabala okw'ĩkĩrĩrya lyenyũ. Nĩkwa twanzĩre erikola haguma nenyũ, n'eribaha obutseme; kusangwa mukahangana ndeke omw'ĩkĩrĩrya lyenyũ.

will be added

X\