1 TĨMOTEO 6

1Abakobe bosĩ baganze abakama babo ng'abandu batolere erĩsĩkya lyosĩ, neryo erĩna lya Nyamuhanga n'erĩkangĩrĩrya lyetu sibitsumawe. 2Kandi abawite abakama Bakristo sibaponebo, kusangwa nĩ balĩkyabo. Nĩkwa, litolere ibakolerabo ndeke kwilaba, kusangwa abakabana omugaso w'omũbĩrĩ wabo ni Bakristo abanzĩre. Ukangĩrĩraye n'erihana emyatsi eyĩ. 3Omundu amaleta erĩkangĩrĩrya ly'ogundi mũsĩndo, ĩsĩalĩrĩga ebĩnywa by'ekwenene by'Omukama wetu Yesu Kristo, kutse erĩkangĩrĩrya erĩkakenga Nyamuhanga, 4omundu oyũ awite omutwe munene, ĩsĩasĩkĩ. Kandi awite omutima w'obuhaka, n'erinegena omo bĩnywa, ebikaleta obũha, n'erigabana, n'ebĩtsũmĩ, n'erĩganĩrya ibi. 5Kandi bikaleta erinegena omo katĩkatĩ k'abandu b'obũlengekanĩa obũtsandĩre, isibakiwite omwatsi w'ekwenene. Bakaganĩraya bati, erikenga Nyamuhanga likaleta endũndĩ y'ebindu. 6Nĩkwa erikenga Nyamuhanga likaleta endũndĩ nene, omundu amabya akatsemera ebyo awite. 7Kusangwa motutasa n'ekindu omo kihugo, kandi sitwendisyatoka eritwala kindu, twalũamo. 8Neryo twamabya n'akalyo n'eky'eriyiswika, tutsemere ebyo. 9Nĩkwa abakayĩtsũtsa eribya bateke bakawa omw'irengwako, n'erihambwa omo kitego ky'esyongumbu nyingi nyĩkĩrũ, esĩkagalaya. Esyongumbu esĩ sĩkatsandaya bandu n'erĩheryabo. 10Kusangwa erianza ebindu likaleta emĩsĩndo yosĩ y'ebibi. Abandi bandu abakasimbirirabyo babirireka erĩkĩrĩrya, babĩrĩyĩta omo malĩge mangi. 11Nĩkwa uwe, mundu wa Nyamuhanga, usage emyatsi yosĩ eyĩ, ukwamirire eritunganene, erikenga Nyamuhanga, erĩkĩrĩrya, olwanzo, erĩsĩka, erihehera. 12Uyitsinge omo malwa owene w'erĩkĩrĩrya, kandi uhambe ndeke engebe y'erikota eyo Nyamuhanga akubirikirira. Kandi mowakangya ndeke erĩkĩrĩrya lyawe embere sy'abalangĩrĩ bangi. 13Ngakuhana embere sya Nyamuhanga, oyukaha engebe oko byosĩ, kandi embere sya Kristo Yesu, oyo wakanganaya ndeke embere sya Ponto Pilato. 14Ngakuhana nyiti, ũtegaye amategeko aya butsira kahinira kutse erigusa, erĩhĩka oko Kiro ky'eributuka ly'Omukama wetu Yesu Kristo. 15Nyamuhanga asyaleta eributuka eryo oko mugulu atolere. Nyamuhanga nĩ mũtabalĩ ĩyowene, oyukapipawa, ni Mwami w'abami, ni Mukama w'abakama. 16Iye ĩyowene yukakota; kandi ĩkere omo kyakakala ekite kyangahĩkwamo. Sihali mundu oyo wabirimulolako, kandi sihali mundu wangatoka erimulolako. Erĩsĩkya n'obũtokĩ bwa kera na kera bibye ukw'iye, Amina. 17Uhane abateke ab'ebindu b'ekihugo kino sibayiheke, kutse erĩhĩra amaha wabo oko bindu ebyangahwaho. Nĩkwa bahĩre amaha wabo uku Nyamuhanga oyukatuha ndeke-ndeke ebindu byosĩ eritsemerabyo. 18Kandi uhanebo uti, bakole ebibuya, babye abateke omo mikolere yowene bahĩtaye ndeke, kandi basangire ebindu byabo n'abandi. 19Litya basyayibikira obuteke obwasyawatĩkyabo omo mugulu owakandisyasa. Neryo basyabana engebe eyiri ngebe kũndũ. 20Uwe Tĩmoteo, ũtegaye ndeke ebyo wabirihabwa eribika. Usage ebĩnywa bitya-bitya ebitekenga Nyamuhanga n'obuhaka bũkĩrũ b'omwatsi owakahulawa nabi mo menge. 21Abandi bakabũga bati babiribana amenge ayo, nĩkwa babiritala n'erireka erĩkĩrĩrya. Olukogo lwa Nyamuhanga lubye nenyũ.

will be added

X\