1 TĨMOTEO 5

1Suhayire omundu mukulu, nĩkwa umulemba-lembe nga tata wawe. Uhane abalwana nga ni bagala benyũ. 2Kandi uhane abakekulu ng'abokoyo, n'abakalĩ balere ng'abali benyũ, igunemuhana n'omutima ate kw'ebibi. 3Ukenge abakwakalĩ abali bakwakalĩ kwenene. 4Nĩkwa omũkwakalĩ amabya awite abana kutse abitsikulu, batsũke erirembera ab'enyũmba yabo, omw'ikenga Nyamuhanga n'erĩswawatĩkya ababũtĩ babo n'aboso-kulu babo, kusangwa ekĩ kĩkasĩmawa na Nyamuhanga. 5Nĩkwa oyuli mũkwakalĩ kwenene, oyutawite mundu w'erĩmũwatĩkya, abĩhĩra amaha wuwe uku Nyamuhanga, akakwamirira erisaba n'erĩmũbũlya erĩmũwatĩkya omo kiro n'omw'itungi. 6Nĩkwa omũkwakalĩ oyũkayĩtsemesaya nĩ mũholĩ nomo angabya akineho. 7Neryo uhanebo emyatsi eyĩ, sibabye bakahulwa nabi. 8Nĩkwa omundu amatendirembera ab'ekĩtũnga kiwe, kutse kwilaba ab'enyũmba yiwe, omundu oyo abirigana ekisomo, kandi ni mubi kwilaba oyũtĩkĩrĩrye. 9Sĩmũhĩre omũkwakalĩ okw'iganza ly'abakwakalĩ, emyaka yiwe yamatindalaba emyaka makũmĩ ndatu, iniabiribya mũkalĩ w'omundu muguma. 10Kandi abye ĩnĩakũmayĩre busana n'emĩbĩrĩ yowene; kandi amabya oyo wabĩrĩkũlya abana bo ndeke, kandi amabya ĩnĩabĩrĩkokya abagenĩ b'ehali, kutse ĩnĩabĩrĩnabya ebisando by'abandu ba Nyamuhanga, kandi amabya abĩrĩwatĩkya abali omo bũlĩge, kandi amabya abiriyiha erikola obuli mũbĩrĩ owene. 11Nĩkwa ugane erihandika abakwakalĩ balere, kusangwa omugulu bakakwa esyongumbu esikaleka ibanza eriheruka, neryo bakaleka Kristo. 12Neryo bakaya oko lubanza, kusangwa babĩrĩtwa erilaga lyabo ly'erĩmbere. 13Kandi bakabegera erigala-ganda n'erirendera-lendera omo manyũmba w'abandu. Kandi butsira erigala-ganda lisa, nĩkwa bakabya mbandanganĩa, n'erĩyĩhĩra omo myatsi y'abandi, ĩbakabũga emyatsi eyitatolere. 14Neryo ingye nyanzĩre abakwakalĩ balere ibaheruka, babute abana, bategeke amanyũmba wabo, sibahe esyonzĩgũ syetu omwanya w'eritwahula nabi. 15Kusangwa abandi bakwakalĩ babiritswa n'erikwama Satanĩ. 16Kandi omũkalĩ kutse omulume oyuli Mukristo, amabya awite abakwakalĩ omo nyũmba yiwe, alemberebo, sĩalũhaye ekanĩsa, neryo ekanĩsa itoke erirembera abakwakalĩ abatawite eky'erĩwatĩkyabo. 17Abakulu abakasondola ndeke baganzawe ng'abatolere erihembwa kabiri. Kandi kwilaba aho, abakulu abakakola kutsibu omo mũbĩrĩ w'erĩtũla Engulu Yowene, n'erĩkangĩrĩrya bandu. 18Kusangwa Amasako ati, Simusyeboha obuno bw'enume y'ende omugulu ĩkahũmba engano. Kandi ati, Omũhĩngĩ atolere obũhĩngĩ buwe. 19Sũlĩge eritsongera busana n'omukulu ahate abalangĩrĩ babiri kutse basatu. 20Abakakola ebibi ukungebo embere sy'abandu bosĩ, abandi nabo batoke eriubaha. 21Ngakuhana embere sya Nyamuhanga, n'embere sya Kristo Yesu, n'embere sy'abamalaĩka abo ayisoga nyiti, Ukwame amategeko aya, sutswere ute watondesya, kandi sũlebaye ndi nandi. 22Siwanguhe erĩhĩra ebyala oko mundu busana n'omũbĩrĩ w'Omukama. Kandi susangire ebibi by'abandi, nĩkwa ũyĩtegaye eribya n'omutima ate kw'ebibi. 23Sũpũlaye amagetsi masa, nĩkwa wĩmaye ebĩnyũ bike busana n'endwala y'enda yawe, kusangwa wabere ukalwala-lwala. 24Ebibi by'abandi bandu biminyikere ndeke, kandi bikatangabo okw'itswera lyabo; n'abandi, ebibi byabo bikaminyikala enyũma. 25Kandi litya emĩbĩrĩ yowene ikaminyikala ndeke. N'emĩbĩrĩ eyĩtowene siritoka erĩbĩswa.

will be added

X\